AASIAAT
Inissiani attartortussat isertersinnaanngungajalerput
Kommune Qeqertalimmi kommunalbestyrelsip aalajangerpaa 2021-imi aalajangersarneqarsimasoq ineqarnermut akiliut ukiumut 1.250 kr. m²-mut attatiinnarneqassasoq. Suliassaq INI A/S-imut nassiunneqarpoq, taanna kommunip inissiaataanik nutaanik attartortitsinermik aqutsissammat, borgmesteri Simigaq Heilmann (D) ilisimatitsivoq.
Qaqortumik quassussuaq tassaavoq kalaallit namminersornerullutik oqartussaata attartortittagaa, qaqortumik quassussuaq sanianiippoq qaqortumik aamma qorsummik quassussuaq, taakkulu pigineqarput kommune qeqertalik-ip illuutaanik ingerlatseqatigiiffianit. Maanna apeqqutaalerpoq qaqugu attartortut kommunip attartortittagaanut nuussinnaalissanersut.
Foto: Bygherrer til boligerne, Kommune Qeqertalik og Grønlands Selvstyre
Kommune Qeqertalimmi kommunalbestyrelsi aalajangerpoq inissiaqarfiit kommunip attartortittagassai marluk katillugit 40-nik inissiallit Aasianni Svendborgip Aqqutaaniittut, 1.250 kr. m2-mut ukiumut akeqassasut.
Namminersorlutik Oqartussat namminneq inissiaatiminut attartortittakkanut akigititani aalajangereernikuuaat.
Taamaattorli kommunip attartortittagassaanut ineqarnermut akiliutissap aalajangersarnissaa ajornartorsiutaasimavoq, kommunip sanaartortitani taakku ingerlatseqatigiiffimminut tunniussimagamigit, tassani ineqarnermut akiliutip aalajangernissaanut ingerlatseqatigiiffinnut namminersortunullu maleruagassat allat atuummata.
Ineqarnermut akiliutissaq pillugu aalajangiiniarneq ajornakusoortoq
Kommunip inissiaatitaaminut attartortittagassanut akigitinneqartussat aalajangerniarneranut ajornakusoortitsineq pissuteqarpoq akit piginnittup qanoq piginnittuunera naapertorlugu aalajangersarneqartarmata:
- Namminersorlutik Oqartussat/kommune piginnittutut:
Akigitinneqartut ukiumut missingersuusiortarnerup malitsigisaanik aalajangersarneqartarput, ingerlatsinermut, aserfallatsaaliuinermut kiisalu aningaasaliinermut akilersuutit matussuserneqartarlutik. Akigitinneqartoq qaffanneqassappat qaammatit pingasut sioqqullugit ilimasaarereenikkut taamaallaat pisinnaavoq.
- Namminersortoq imaluunniit ingerlatseqatigiiffik piginnittutut:
Akigitinneqartoq aningaasartuutinut tunngassuteqartarpoq, aammalu attartortitsisup aningaasartuutai uppernarsarneqartut qaangerneqassanngillat, aningaasaliinermut, ingerlatsinermut, aserfallatsaaliuinermut kiisalu naapertuuttumik iluanaaruteqarsinnaaneq aallaavigalugit annertussusilerneqartarpoq.
Svendborgip Aqqutaani inissiat quleriiaat marluk sanaartorneqarsimasut kommunip ingerlatseqatigiiffiatigut aammalu taarsigassarsinikkut aningaasaliiffigineqarsimapput, taamaattumik akigitinneqartoq kommunip nammineq sanaartortitsilluni inissiaataanit qaffasinnerussaaq.
Tamanna isumaqarpoq inissiaqarfinni taakkunani inissiat assigiit pingasut assigiinngitsumik akeqarsinnaasut, piginnittup qanoq inissisimanera apeqqutaalluni, kommunalbestyrelsimut saqqummiussami nassuiarneqarsimavoq.
Illuutinik ingerlatseqatigiiffik aningaasanik taarsigassarsiniassaaq
Ineqarnermut akiliutit ineqartunit akilerneqarsinnaasut periarfissarsiuunneqarsimasut takuneqarsinnaavoq, tassungalu tunngatillugu kommunemi allaffissornikkut aqutsisunit kaammattuutigineqarsimanngilaq inissiat quleriaat taakku marluk kommunip ingerlatseqatigiiffimminit pisiarissagai.
- Kommunip toqqaannartumik nammineq pigilissappagit, tamanna taarsigassarsiniarnermik piumasaqarfiussaaq, ineqarnermullu akiliut appasinnerusoq aalajangiunneqassappat, tamanna ukiumut amigartoorluni ingerlatsinermik kinguneqassaaq. Tamannalu isumaqassaaq akileraartartut toqqaannanngitsumik ineqarnermut akiliutip ilaanik akilersuitinneqassasut. Tamanna pissanngippat aserfallatsaaliineq ilanngarteriffigineqarsinnaassagaluarpoq, tamannali inissiat aseroraluttuinnarnerannik aamma kinguneqassaaq – soorlu namminersorlutik oqartussat inissiaataanni arlalinni takuneqartareersoq, kommunip allaffissornikkut aqutsisui nassuiaapput nangillutillu:
- Paarlattuanik kaammattuuteqarpugut: - ineqarnermut akiliut m² -mut ukiumut 1.250 koruuniussasoq, - tamatumalu saniatigut najugaqatigiiffimmut tamakkiisumik aningaasaliinissamut neqeroortitsisoqassasoq (50 mio. kr.) kiisalu inissiaqarfinni marluusuni taakkunani taarsigassarsiat sinneri Kommunekredit aqqutigalugu taarsigaasarsiniarnikkut matussuserniarneqassasut.
Kaammattuutit tassaapput kommunalbestyrelsimit malissallugit toqqarneqarsimasut, tassungalu atatillugu naatsorsuutigineqarpoq Kommunekredit aqqutigalugu taarsigassarsiniarnermi erniakinnerunera pissutigalugu kommunalbestyrelsip ineqarnermut akiliutissatut anguniagai naammassineqarsinnaassasut.
Kommune Qeqertalimmi borgmesteri Simigaq Heilmann, Sermitsiamut ilisimatitsivoq inissiaqarfinni taakkunani marlunni iserterneq qaqugu piumaarnersoq suli ullulerneqarsinnaanngikkallartoq.
