Inuit Ataqatigiit isumartik mumikkaat - naalakkersuisoqatitik isumaqatigileraat

Qeqertarsuup Tunuani, Uummannami Upernavimmilu, aamma aqutsiveqarfik 47-mik taaneqartartumi, qaleralittassanik niuerutigineqarsinnaasunik nammineq pigisanik pigisaqartut, pisassaatimik 75 procentii, aalisarnermut inatsit atuuttoq naapertorlugu aalisartussaatitaavaat.

AAMMA ATUARUK:

Naalakkersuisoqatigiit aalisartut kattuffiisa kissaataannut assigiinngitsunik isummertut

Aalisartup ukiumut pisassami 75 procentii angullugit, ukiuni kingullerni pingasuni aalisarsimanngikkunigit, pisassaatimi qaqinneq ajukkami tuniniarnissaanut ukioq nutaamit pisussaaffeqalissaaq. Taama iliunngikkuni Naalakkersuisut piginnittoq sinnerlugu pisassanik tuniniaasuussasut, aalisarnermut inatsimmi allassimavoq. 

Sermitsiaq Inatsisartuni partiit tamaasa, aalisarnermullu naalakkersuisup, Peter Borgip (D), 75 procentimik atuisussaatitaanermut isumaat pillugit, sapaatit akunnerisa siuliani allaaserisaqartarpoq.

Kalaallit Nunaanni aalisartut kattuffii pingasuusut tamarmik, qaqutigoortumik ataatsimoorlutik, aalisarnermut naalakkersuisumut apuussipput. Allakkiami tassani pisassat 75 procentiannik atuisussaatitaaneq ukiuni tallimani atuukkunnaarallassasoq kissaatinut ilaavoq. 

Jerimiassen: Isummagut allanngunngillat naleqqussarpugulli

Tamanna Inuit Ataqatigiit partiini kisiartaallutik sapaatit akunnerisa siulianni akerleraat. Taakkuami aalisartut pisassaatimik 75 procentiat angullugu aalisartariaqartut sapaatit akunnerisa siuliani isumaqarput. Taakkuali isumaat maanna allanngorpoq. Partiit sinnerisa isumaattut taakkua maanna isumaqalerput.

AAMMA ATUARUK:

Aalisarnermut ataatsimiititaliami siulittaasoq: 75 procentimik atuisussaatitaaneq TAC-lu annertuallaarput

- 75 procentimik piumasaqarneq massakkut anguneqarsinnaanngilaq. Aalisartunut anguneqarsinnaanngitsumik inatsiseqarsinnaanngilagut. Taamaattumik ukiuni tallimani atorunnaarsitsigallarnissamik kattuffiit pingasut oqariartuutaat Inuit Ataqatigiinninngaanniit tusarnaarparput, Kristian Jerimiassen (IA) Sermitsiamut oqarpoq.

Susoqarmanuna isumarsi mumittoq naalakkersuisoqatissilu isumaasa assiginik isumaqalerlusi?

- Naleqqussartuaannartariaqarpugut. Taamaaliorluta angusassarput annerpaaq angusinnaaniassagatsigu siunissami. Oqanngilanga isummagut allanngorartut, kisianni aap naleqqussarpugut, taanna oqarpoq.

Amerlasuut pisassaatiminnik annaasaqarsinnaasut

Aqutsiveqarfik 47-mi pisassaatilinni 694-ini 50-it, piumasaqaammik ukioq manna maannamut naammassinneqqasut, Sermitsiap oktobari aallartittoq paasivaa. Tassa imaappoq inatsit maanna atuuttoq allanngortinneqanngippat qaleralinniat 100-likkaat qaleralittassaatiminnik, nammineq pigisaminnik, nalilinnik, tuniniaasariaqalissapput.

Inatsisilli taassuma allanngortinneqartussanngornera maanna ilimanarluarpoq. Tamannami Inatsisartuni partiit tamarmik maanna piumasarilerpaat.

75 procentimik atuisussaatitaaneq Inatsisartunut ilaasortat, aalisarnermut inatsisip allanngortinneqarnissaa pillugu septambarip naanerani oqallinneranni eqqartukkanut ilaavoq.