Naalakkersuisoqatigiit aalisartut kattuffiisa kissaataannut assigiinngitsunik isummertut

Qeqertarsuup Tunuani, Uummannami Upernavimmilu, aamma aqutsiveqarfik 47-mik taaneqartartumi, qaleralittassanik niuerutigineqarsinnaasunik nammineq pigisanik pigisaqartut, pisassaatimik 75 procentii, aalisarnermut inatsit atuuttoq naapertorlugu aalisartussaatitaavaat.

Tamanna pinngippat aappaagumit pisassanik nalilinnik Naalakkersuisoqarfimmit arsaarinniffigineqarsinnaanerat aarlerinartumiippoq.

Naak aalisartut amerlasuut aarlerinartorsioraluartut Inatsisartut Aalisarnermut Piniarnermut Nunalerinermullu ataatsimiititaliaani ilaasortaq, Kristian Jeremiassen (IA), inatsimmik allannguerusunnatik Sermitsiamut oqaqqaarpoq.

AAMMA ATUARUK:

Aalisartut kattuffii: Atuinissamut piusaqaat atuukkunnaarallarlunilu qaleralittassiissutit oqilillik

- 75 procenti taanna aalajangiusimavarput. Isumaqarpugut taanna aalajangiusimaneqartariaqartoq, Kristian Jeremiassen oqarpoq.

Aalisarnermut inatsit maanna atuuppoq. Allannguisoqanngippallu pisassaatillit, pisassaatimik 75 procentianik aalisarsimanngitsut, pisassaatiminnik nalilinnik aappaagumit ilanngartuunneqalissapput. Aqutsiveqarfik 47-mi pisassaatilinni 694-ini 50-it, piumasaqaammik ukioq manna maannamut naammassinneqqasut, Sermitsiap oktobari aallartittoq paasivaa.

Imminut assortortoq

Inuit Ataqatigiinneersup inatsit atuuttoq, tassa pisassat pigineqartut 75 procentii ukioq manna aalisarneqarsimanngippata aappaagu pisassaatigineqartut ikiliartortinneqarnissaat, illersoriarlugu aamma killormuanik apersuinermi tassani kingusinnerulaakkut oqaaseqarpoq.

- Aalisartunit uagut tigooraanianngilagut (qaleralittassiissutinik, aaqq.), Kristian Jeremiassen oqarpoq.

Inatsimmi allassimasoq 75 procenti aalajangiusimariarlugu pisassanik tigooraaniannginneq oqariartuutigaa. Aalisarnermili qaqitat maanna piviusut inatsillu eqqarsaatigalugit taama oqarneq tamakkiisumik naapertuuttuunngilaq.

Inatsit allanngussanngitsoq aalajangiusimavarsi naaperiaarusullusilu. Taava qanoq naaperiaassuisi?

- Immaqa appalaarneqarsinnaavoq, taamaalilluni qaleralinniat aamma eqqorneqaratik ingerlasinnaaniassammata, Kristian Jeremiassen oqarpoq.

Inuit Ataqatigiit atuisussaatitaanerup procentianik qanoq appaatigisinnaanersut pillugu apeqqut taassuma akiumanngilaa.

AAMMA ATUARUK:

Aalisarnermut ataatsimiititaliami siulittaasoq: 75 procentimik atuisussaatitaaneq TAC-lu annertuallaarput

Isuma allanngoqqittoq

Sermitsiamit apersuisoq qinikkap imminut assortortumik oqaaseqarnera pillugu apereqqippoq.

Ukiuni tallimani atuukkunnaarallartitsisoqassappat Inuit Ataqatigiinnit qanoq isummerfigissuisiuk?

- Naamik tassa atuuttariaqarpoq. (inatsit maanna atuuttoq, aaqq.) Aamma aalisagartassat taakkua pisarineqartariaqarput, Kristian Jeremiassen oqarpoq.

Demokraatit: Kattuffiit tusaassavagut

Kalaallit Nunaanni aalisartut kattuffii tamarmik, tassa KNAPK, SQAPK aamma QAK, qaqutigoortumik ataatsimoorlutik, aalisarnermut naalakkersuisumut, Peter Borg-imut (D), ernumaatiminnik kissaatiminnillu sapaatit akunnerisa siuliani apuussipput. Allakkiami tassani pisassat 75 procentiannik atuisussaatitaaneq ukiuni tallimani atuukkunnaarallassasoq kissaatinut ilaavoq. 

Naalakkersuisoqatigiinni partii anginerpaaq, Demokraatit, Inuit Ataqatigiit isumaannit killormut isumaqarput. Taakkua aalisartut kattuffiisa kissaataat tusaarusuppaat. 

 - Isumaqarpugut kattuffiit atorunnaarsitsigallarnissamik kissaataat pissusissamisoortoq.

- Kattuffiit oqariartuutaat tusaasariaqarpagut soorunalimi. Taakkuupput ullut tamaasa taakkuninnga atuisuullutillu tamanit ilisimasaqarnerit. Taamaammat oqariartuutigisaat tusaasariaqarparput taannalu tunngavigalugu sulissaagut, Bo Martinsen (D), Sermitsiamut oqarpoq.

Aalisarnermut Naalakkersuisup kattuffiit kissaataat aamma qanillattorlugu Sermitsiamut sapaatit akunnerisa siuliani oqaatigaa.

- Aalisartut kattuffiisalu sumut ingerlarusunnerat ersarinnerusumik maanna ilisimasaqarfigilerpara. Naalakkersuisunit 75 procentimik qalluisussaatitaanermi apeqqummi aaqqiisariaqarnerput killiffigereerparput. Maannakkullu aaqqiissutissaq sorlerpiaassanersoq naniniagassarilerparput, Peter Borg oqarpoq.

Bentiaraq Ottosen (A) aamma Jens Napãtôk’ (N) kattuffiit kissaataannik aamma tapersiisut, Sermitsiap marlunngornermi oqaluttuaraa.