Issittumi sakkutooqarfiup oqartussaasut allat qanitaanniinnissaa pingaaruteqarpoq

Sermitsiamit Issittumi Sakkutuut qullersaqarfianni Nuummiittumi pulaarpugut. Illu attartugaavoq, taannalu Issittumi Sakkutuut kisimik najunngilaat, taamatuttaaq isumannaallisaanermut piumasaqaatinut, pingaartumik qarasaasiatigut isumannaallisaanermut naleqqutinngilaq, aammali Issittumi Sakkutuut qullersaqarfianni atorfilittat tamarmik tassaniissinnaanngillat. 

Illup mikivallaarnera pissutigalugu sulisut arlallit Nuummi sumiiffinni assigiinngitsuni attartortakkani siammarsimapput. Assersuutigalugu sulisut arlallit tarnip pissusaanik ilisimasallit illoqatigaat, allat Grønlandsbankip illuutaaniipput, allallu aamma Qinngutsinniillutik.

Oqartussaasut allat qanillugit inissisimanissaq pingaaruteqarpoq

Issittumi Sakkutooqarfiup pisortaa, Generalmajor Søren Andersen, iluarisimaarinnippoq qullersaqarfitsik Nuummiimmat:

- Nuummi inissisimaneq uannut pingaaruteqarpoq arlalinnik pissuteqartumik, pingaarnerpaavorli Namminersorlutik Oqartussanut, Kalaallit Nunaanni politiinut annaassiniartarnermullu suleqatigisartakkatsinnut qanittumik inissisimanerput, pingaartumik pisoqartillugu suleqatigiissutigisassatsinnik.

- Maaniinnerput, tassa Kalaallit Nunaanniinnerput Nuummiinnermik taamaallaat aallaaveqanngilaq, Kalaallit Nunaat tamaat najorparput, kisianni  qullersaqarfitsinni oqartussaasut allat qanikkatsigit inissisimanera naammagisimaarpara. 

- Aamma eqqaamassavarput maaniinnitta nukittorsarneqarnera sorsunnissamut tunngassuteqanngimmat, kisianni inuiaqatigiinni suliassat allat aamma pineqarmata, soorlu ujarlerneq annaassiniarnerlu kiisalu innuttaasunut allatigut sullissineq, sikumik aserorterineq kiisalu allanik assigiinngitsunik tapersersuineq Nuummeernerusunik aallaaveqarajuttunik, Arktisk Kommando-mi pisortaq, sakkutuut naalagaat Søren Andersen oqaluttuarpoq.

Qullersaqarfiup inoqarfimmit avinngarusimalaartumiinnissaa kissaatigineqarpoq

Søren Andersenip erseqqissarpaa qullersaqarfik pineqartillugu allaffimmi suliffiit pineqarmata, taamatuttaarlu qullersaqarfissap inissisimaffissaa pillugu kommune suleqatigineqartoq:

- Nuummeereerpugut, qullersaqarfik tassaavoq allaffissornermik suliaqarfik, kisianni maannakkutut isikkoqartillugu, ataqatigiissaarinikkut pitsaanerpaamik suliffiunngilaq, Nuummi sumiiffinni assigiinngitsuni siammarsimavugut, tamakku maanna ataatsimut katersorneqartussanngorput. 

- Neriuutigaara sumiiffimmik pitsaasumik naleqquttumillu nassaarumaartugut, aamma neriuutigaara illoqarfimmit avinngarusimalaartumiissinnaajumaarluta. Qullersaqarfiup inissiffigiumaagaa pillugu kommunimik oqaloqatiginnippugut, kisianni aperineqassaguma, kissaatigaara parnaarussivimmut qanittumi imaluunniit mittarfimmut qanittumi qullersaqarfipput inissinneqassasoq, taamaalilluta inoqarfimmit avinngarusimalaartumik inissinneqassagatta.

Talittarfik marloqiusamik atorneqassaaq

Søren Andersenip ilanngullugu erseqqissarpaa Issittumi Sakkutuut Nuup umiarsualivianik atuisooreersut, kisianni Kalaallit Nunaat ineriartormat, Nuummilu ineriartorneq aamma pimmat, Nuup umiarsualiviani tattoqisaanneq namminneq aamma misigigitsik:

- Kalaallit Nunaanni inuiaqatigiinni inoqarfinnilu ineriartorneq annertuumik pivoq, Nuullu ineriartorfiulluarpoq, tamatuma malitsigisaanik aamma uagut umiarsuatta allallu umiarsuisa talittarfimmut talittarnissaat pisariaqartitsinitsinnut unammillernarsinikuuvoq. Taamaattumik Sikuki umiarsualivimmik alliliinissaminik pilersaaruteqarpoq, aammalu uagut sakkutuut umiarsuisa talittarfissaannik sanaartortoqarnissaa siunniupparput, taannalu piviusumik oqaatigissagutsigu talittarfiussaaq nalinginnaasoq.

Søren Andersenip erseqqissaatigaa talittarfik, Issittumi Sakkutuut umiarsuinut naatsorsuussaagaluartoq, Issittumi Sakkutuut atunngikkaangassuk allanit atorneqarsinnaassasoq:

- Umiarsuagut imaani angalasarput, timmisartullu silaannarmiittarlutik, taamaattumik Issittumi Sakuutuut umiarsui sivisuumik uninngaannartussaanngillat. Umiarsuit qaammatip ulluini tallimani arfinilinni taleqqasarput, qaammatillu sinnerani umiarsuit angalasarput, taamaalilluni Sikukip Nuullu umiarsualiviata umiarsuit talinnissaannut atorneqarsinnaassaaq.

Upperinngilaa navianartorsiortitsisoqarsinnaanera annertusissasoq

Issittumi Sakkutuut, Arktisk Kommandop Nuummi qullersaqarfimmik nutaamik sanaartortitsilluni inerisaanissaa, aammalu talittarfimmik sakkutuut imarsiortut atugassaannik sanaartortitsisoqarnissaa pissutigalugu avataaniit immikkut ittumik annertusisamillu navianartorsiortitsisoqalersinnaanissaa Issittumi Sakkutuut pisortaata, Søren Andersenip ilimaginngilaa:

- Ukrainemi sorsunneq eqqaaginnarsinnaavarput, Ruslandillu sorsunnini qanoq ingerlanneraa eqqarsaatigalugu, taava takusinnaavarput tamatigut anguniagarigaa atortulersuutit pinngitsoorneqarsinnaanngitsut, napparsimmaviit, naalakkersuisoqarfiit, kommuni aammalu innuttaasut sakkutuujunngitsut eqqorniagarivai, arlaannaalluunniit immikkut qajassuunneqanngilaq. Ruslandimmi sorsunneq ingerlataa tassaavoq innuttaasut sorsuffigineqartut annertuumik sakkortuumillu eqqorneqarnissaat.

- Kisianni erseqqissaqqissavara, nunarsuarmi sumiiffiit pillugit politikkikkut pissutsit Kalaallit Nunaannut toqqaannartumik kalluaanngillat, aappaattullu erseqqissaatigissavara Nuummi qullersaqarfeqarneq allaffissornermut tunngassuteqarmat, sakkutooqarnikkullu ingerlatsinerit illoqarfiit avataani ingerlanneqarput, umiarsuit piffissap annersaani angalapput timmisartullu silaannarmiipput, timmisartullu Kangerlussuarmi imaluunniit Keflavik-mi Island-imi mittarput. Taamaattumik Nuummi ullumikkumut sanilliullugu sakkutooqarnerulernissaa anguniagaanngilaq.