Jukkup politikkikkut pisunit sunnertisimanermini  Erfalasorput Ukkusissanut ullumi amussamaarpaa

Jukku Kielsen Nuummi Ukkusissanut ullumi pingasunngornermi nalunaaqutaq ataatsimut - tassa massakkut - majuarluni aallassaaq. Qummukarnermini Erfalasorput amussallugu siunertaraa. USA-p nunattalu akornanni pisut peqqutigalugit amusiartussalluni aalajangerpoq.

Ullumilu nunatta, Danmarkip USA-llu ataatsimeeqatigiinneranni amusiartornissaq piffissaalluartoq Jukku isumaqarpoq.

- Eqqarsaraluarama weekendi, kisianni tulluarsorigiga ullumiussasoq taamaammat suliffinninngaanniit soraajaariarlunga ilassarsioriarlunga majuassuunga, Jukku Kielsen oqarpoq.

Qummut majuarnissani nalunaaquttap aappaa avillugu sivisussuseqassasoq naatsorsuutigaa. Aqqutaali quasassammat misilittagaqarnissaq, atortullu eqqortut nassarnissaat pisariaqarpoq. Qummut aqqutaa pikkunalaarsinnaagaluartoq peqataarusuttoqassasoq neriuutigaa.

- Marluugallarpugut, naluara allanik takkuttoqassanersoq. Ilaarusuttoqaraluarpoq, kisianni aamma ulluinnaagami inuillu sulillutik paasinarpoq periarfissaqanngikkunik, Jukku oqarpoq.

Politikkikkut pisunit sunnerteqqasoq 

USA-p nunattalu akornani pisut immini initusimaqisut Jukku Kielsen oqaluttuarpoq. Taamaammat Erfalasutta amunissaata saniatigut iluaallannissani neriuutigaa.

- Pisut ulluni kingullerni uanni initunermik, taamaalilluni immaqa taakkua eqqarsaatigilaarlugit qummukarujuussuunga immaqalu piiaalaarlunga katagarlugit, Jukku taama oqarpoq.

Peqataarusuttut Qinngorpumi Nukissiorfiit illuutaata eqqaani ataasinngunngilaattaa minutsit qulit sioqqullugit naapissapput. Peqataasussat sillimaniarneq nammineq akisussaaffigissagaat atortullu soorlu quaannaveeqqutit namminneq nassassagaat Jukkup erseqqissaatigaa..

Erfalasorput amuneqartussaq Stochholm Elteknikimit tunissutigineqarpoq.