MISISSUINEQ
Kalaallit Nunaanni digitalikkut ataqatigiinneq nunanit allanit tatineqarnermi nukittuvoq
Naak avataaneersunit tatineqarneq annertugaluaqisoq politikkikkullu isumaqatigiinngittoqaraluartoq, Kalaallit Nunaanni digitalikkut ataqatigiinneq annertusoq maluginiarnartoq misissuinermi inerniliunneqarpoq.
Kalaallit Nunaat nunanit allanit tatineqaraluarluni akiuussinnaassuseqarluarpoq, Nordic Safe Cities-imit misissuinermi 2024-mi aggustip aallaqqaataanit ukioq ataaseq ingerlanneqartumut tunngatillugu inerniliunneqarpoq. Donald Trump Jr. Trumpip timmisartua maluginiarnartoq ilaaffigalugu 2025-mi januaarip 7-iani Nuummut mimmat Kalaallit Nunaat nunanit tamalaanit malinnaavigineqarpoq.
Assi: Emil Stach/Arctic Creative/Ritzau Scanpix
- Kalaallit Nunaanni 2025-ip ingerlanerani ataatsimoornerup avataaniit digitalikkut oqaloqatigiinnermik sunniiniartunut akiuussinnaassuseqarneq takutippaa.
Aningaasarsiutiginagu suliniaqatigiiffik Nordic Safe Cities, ilaatigut aggustip aallaqqaataani 2024-miit ukiup ataatsip ingerlanerani Facebookimi allaaserisat 37.462-t oqaaseqaatillu 367.539-t tunngavigalugit misissuinermini taamatut inerniliivoq.
USA-p Kalaallit Nunaannut soqutiginninnera 2025-mi Inatsisartunut qinersinissaq sioqqullugu Kalaallit Nunaanni digitalikkut oqaloqatigiinnermut sunniuteqangaarsimassasoq misissuinermi inernerineqarpoq, aammattaarli Kalaallit Nunaanni digitalikkut ataqatigiinneq annertusimasoq erseqqissarneqarpoq.
IA-p siulittaasuata allagaa 20.000-init amerlanerusunit qisuariarfigineqartoq
NORDIC SAFE CITIES-IP MISISSUINERA
Misissuineq quppernerni 127-ni Kalaallit Nunaannilu gruppini ammasuni 36-ni allaaserisat 37.462-it oqaaseqaatillu 367.539-t kiisalu USA-mi politikerinit tusagassiuutinillu allaaserisat 1.950-it tunngavigalugit ingerlanneqarpoq, tassani Kalaallit Nunaat piffissap ingerlanerani quppernerni 1407-ini eqqaaneqarpoq.
Naliliinermi pingaarutillit pingasut misissorneqarput:
- Kalaallit Nunaanni qarasaasiatigut oqartussaaqataanermi sanngiiffiit.
- Sunniiniartoqaratarsinnaanera eqqunngitsunillu paasissutissiinerit.
- Tamat oqartussaanerisa nukittuujunerat iliuuseqarsinnaassuserlu.
Allaaserisaq tamarmi uani atuarneqarsinnaavoq.
Misissuineq Grønlandsbankenip Inuussutissarsiornermut Aningaasaateqarfianit tapiissutigineqarluni Common Consultancy for Nordic Safe Cities-imit suliarineqarpoq.
Kalaallit Nunaanni 2025-mi marsip 15-ani ataatsimoornissaq oqariartuutigalugu akerliussutsimik takutitsinermit assit takuneqarnerpaasimasut Nordic Safe Cities-imit erseqqissarneqarpoq.
IA-p siulittaasuata Múte B. Egedep allataa “Ataatsimoorpugut – Kalaallit Nunaat uagut pigaarput” 20.000-init amerlanerusunik qisuariarfigineqarsimasoq tallimaannaallu kamassimasut misissuinerup takutippaa.
Aammattaaq allaaserisaq tamanna assingusullu nunanit tamalaanit akillugit allaffigineqarput, tassani Canadamiut, Amerikamiut danskillu oqariartuut tapersersorlugu inuulluaqqussutinik nuannersunik allassimallutik.
- Allanit sunnerniarneqarnermut akerliusumik sunniuteqartoq
Pisimasoq alla erseqqissarneqartoq tassaavoq Múte B. Egedep taamani Naalakkersuisut siulittaasuattut nunami ataasiussuseqarneq takutinniarlugu 2025-mi januaarimi Erfalasutta amuneqarnissaanut kajumissaarinera.
Kajumissaarut tamanna akerlilersuinermik kinguneqaraluartoq innuttaasorpassuit ataasiussuseqarnertik ersersinniarlugu iliuuseqarnissaminnut periarfissatut atorsimagaat misissuinermi inerniliunneqarpoq:
- Erfalasutsinnik amusineq - aamma internetikkut erfalasutsinnik siammarterineq - ataatsimoortinneqarput. Amerlasuut peqataapput, allaaserisanut imaluunniit gruppini assigiinngitsuni akissuteqarlutik.
- Martsimi akerliussutsimik takutitsineq tamanna avataanit sunnerniarneqarnermut internettikkullu oqaloqatigiinnermi avissaartuutsitsiniartunut oqimaaqatigiissitsivoq, Nordic Safe Cities inerniliivoq.
