Kalaallit Nunaannik tapersiissutit Europamit takkussuupput

USA-p præsidentiata Donald Trumpip kingullermi oqaaseqarnerata kingorna, Tuluit Nunaata ministeriunera, Keir Starmer, Europami naalagaaffiit siuttuinut Kalaallit Nunaannik tapersiisunut ilannguppoq. 

- Kalaallit Nunaannut tunngatillugu manna qularutigineqassanngilaq, Kalaallit Nunaata siunissaa Kalaallit Nunaata Kunngeqarfiullu Danmarkip aalajangigassaraat, Starmer tusagassiorfik Sky News naapertorlugu oqarpoq.

AAMMA ATUARUK

Mette Frederiksen USA aarlerisaareqqunagu qinnuigaa – nunat avannarliit tapersiipput

Mette Frederiksenip (Socialdemokraatip) Trumpip Kalaallit Nunaannik qunusaarinera pillugu oqaaseqarneranik aperineqarluni, ”Arnaq taanna (Mette Frederiksen) isumaqatigalugu”, ministeriuneq ilanngullugu oqarpoq.

Mette Frederiksenip sapaatiummat aammaarluni Kunngeqarfik Danmarkip – taamaalillunilu aamma Kalaallit Nunaata – NATO-mut ilaanera, taamaalillunilu aamma iligiit imminnut illersoqatigiinnissamik qularnaareqatigiinneranut ilaanera, erseqqissarpaa.

Tassungalu atatillugu ”USA-p tungaanit oqaluttuarisaanermi qanimut iligisamik, nunamullu allamut inuiannullu allanut erseqqissumik tuniniagaanatik oqaaseqartunut qunusaarinerit unitsinneqarnissaat sakkortuumik kaammattuutigaa”.

Suli ”ikioqatigiinniartut”

Taamattaaq aamma EU-Kommissionip Kalaallit Nunaannut tapersiinini erseqqissaatigaa.

EU-Kommissionip oqaaseqartartuata Anitta Hipperip ataasinngornermi Danmarkimik Kalaallillu Nunaannik suli ”ikioqatigiissuteqarnissartik” oqaatigaa.

- Isumarput erseqqissumik oqaatigaarput. EU-p suli naalagaaffiit imminnut oqartussaaffigineranik, piffimminni innarlerneqartussaanngineranik, killeqarfiillu innarlerneqannginnissaanik FN-imilu isumaqatigiissummi periutsit attattuassavai.

- Periutsit tamakku nunarsuarmi atugaapput. Illersorneri unitsinnianngilarput, Anitta Hipper EU-Kommissioni sinnerlugu oqarpoq.

Taamaalilluni EU-Kommissionip oqariartuut ukiumi ataasinngulersumi Trumpip illuatungaanilu Danmarkip Kalaallillu Nunaata akornanni saqitsaannermi isummiussani uppernarsaqqippaa.

- Danmarki qanimut attaveqarfigaarput, suliallu ingerlanera tamakkerlugu Danmarki tapersersortuassavarput, Anitta Hipper EU-Kommissioni sinnerlugu oqarpoq.

Killeqarfiit pissaaneq atorlugu allanngortinneqarsinnaanngitsut

Tyskland Frankrigilu ataasinngornermi Kalaallit Nunaannik Danmarkimillu tapersiipput.

Tamanna ”killeqarfiit pissaaneq atorlugu allanngortinneqassannginnerannik” erseqqissaanikkut pivoq.

Franskit nunanut allanut ministereqarfiani oqaaseqartartoq Pascal Confavreux franskit TV-qarfiannut TF1-mut ima oqarpoq:

- Killeqarfiit pissaaneq atorlugu allanngortinneqarsinnaanngillat.

- Kalaallit Nunaat kalaallit danskillu pigaat, taakkulu qanoq ingerlatissanerlugu aalajangissavaat, Pascal Confavreux oqarpoq.

Pisut Danmarkimik nunanillu EU-mut ilaasortanik oqaloqatigiissutigalugit, tyskit naalakkersuisuisa oqaaseqartartuat, ataasinngornermi Reuters naapertorlugu oqarpoq.

Qaammatit marluk qaangiuppata Kalaallit Nunaat aarleqqutigissagaa

Oqariartuutit sapaatip akunnerata naanerani Amerikamiut præsidentiata Donald Trumpip Kalaallit Nunaannik tigusiniarluni qunusaarinerata kingorna pipput.

Ataasinngornermut unnuaani Trumpip ilanngullugu Kalaallit Nunaannut iliuuseqarnissaminik naatsorsuuteqarnini akiumanngilaa.

Præsidentip timmisartuani Air Force Onemi Trump Kalaallit Nunaannut “iliuuseqalersaarnersoq” tusagassiortumit aperineqarpoq.

- Qaammatit marluk missaat qaangiuppata Kalaallit Nunaat aarleqqutigissavarput. Atagu ullut 20-t qaangiuppata tamanna oqaluusereqqitsigu, Trump oqarpoq.