ICC IMO-mi ataavartumik siunersuisartutut inissisimalersoq
Inuit Issittormiut Siunnersuisoqatigiivisa ICC-p nunarsuaq tamakkerlugu imaatigut angallanneq pillugu nunani tamalaani politikkimut suleqataanerat attatiinnarneqarluni, Inuit issittumut isiginnittaasiat oqariartuutigisassavaat. Siunnersuisoqatigiit ataavartumik siunnersuisartutut inissisimaffeqalerput.
Tindbæk Jørgensen (Imarsiornermut Siunnersuisartoq, ICC Kalaallit Nunaat) ICC-p allagartaata tunuani issiavoq, taannalu maannakkut Imarsiorfiit pillugit Suliniaqatigiiffimmi ataavartumik siunnersuisuuvoq.
Assi: ICC
Inuit Issittormiut Siunnersuisoqatigiivi (ICC) Nunani Tamalaani Imarsiornermik Suliniaqatigiiffimmi (IMO), imarsiornermi isumannaallisaanermut mingutsitsinermillu pinaveersaartitsineq pillugu piumasaqaatinut tunngasunik aalajangersaaviusartumi, ataavartumik siunnersuisartutut inissippoq.
Tamanna ICC-mut ukiorpassuarni tunniusimalluinnarluni sulinerup kingorna angusaq pingaaruteqarpoq.
ICC Facebookimi quppernermini allappoq.
ICC nunat inoqqaavisa kattuffiini siullersaalluni siunnersuisartuugallartuunikuuvoq, maannalu IPO-ni kisiartaalluni IMO-mi siunnersuisartutut atuuffeqalerluni.
- Aalajangerneq taanna nunarsuatsinni imarsiornermi Inuit pisinnaatitaaffiinik, piginnaasaannik, ilisimasaannik siuttuunerannillu paasinninneruvoq pingaarutilik. Imarsiorneq pillugu Suleqatigiiffimmi ataavartumik tusarniaavigineqartartutut atuutilerneq aqqutigalugu Inuit nipaat ilisimasaallu tusaaneqaannaratik kisiannili nunat tamalaat ingerlaasiinut nunagisatsinnut sunniuteqartunut ilusilersueqataasarnerat nanginneqassaaq, ICC-ip siulittaasuata tullia Herb Nakimayak oqarpoq.
Allanut maligassiuineq
ICC-mi siulittaasup Sara Olsvigip IMO-p aalajangernera nuannaarutigaa, pisorlu oqaluttuarisaanermut pingaarutilik inuiaqatigiinnut toqqaannartumik sunniuteqassasoq oqaatigalugu.
- Imarsiorneq pillugu Suleqatigiiffimmi aalajangiineq oqaluttuarisaanikkut angusaavoq malunnaatilik. ICC-ip Imarsiorneq pillugu Suleqatigiiffimmi peqataanera uatsinnut inuiaqatigiinnut sunniuteqartarpoq, aalajangersimasumik tusarniaaviusartutut atuutilernikkut nunarsuatsinni imarsiornermi ingerlaatsinut Inuit isiginnittaasii sunniuteqartuaannarnissaat qularnaarneqarpoq. Taama akuerineqarneq Inuit peqataanerannik nukittorsaaginnarani Nunat inoqqaavisa suliniaqatigiiffiisa allat imarsiorneq pillugu aalajangiisarfinni peqataallualernissaannik kinguneqaqqunaqaaq, ICC-p siulittaasua Sara Olsvig oqarpoq.
ICC-p siunnersuisartutut inissisimanini atorlugu IMO-mi suleqatigiissitat arlallit peqataaffigissavai, Inuit isiginnittaasaat pingaarnersiuinerallu nunani tamalaani imarsiornermi politikkimi ersersinneqarnissaat qulakkeerniarlugu, ilaatigut issittumi piujuartitsisumik ineriartortitsinissaq eqqarsaatigalugu.
