Kalaallit Nunaata kitaani januaari aatsaat taama kiatsigisoq — ukiut 109-t matuma siornatigut kiannerpaaffia qaangerneqarpoq
Nuummi agguaqatigiissillugu 0,1 gradimik kiannerusoq DMI-mit ilisimatitsissutigineqarpoq, Nuummi januaari nalinginnaasumit agguaqatigiissillugu 7,8 gradinik kianneruvoq. Illoqarfiit sineriammiittut allat aamma taama ipput, DMI allappoq.
Januaarimi kiarujussuarnera pissutigalugu Nuummi majuartaat uninngatinneqarpoq.
Assi: Oscar Scott Carl
Nuummi januaarimi kiannera aputeqannginnerlu pissutigalugit majuartaat uninngatinneqartoq Sermitsiami siusinnerusukkut allaaserineqarpoq.
DMI-p maanna januaarimi kiassutsimik uuttuinerit misissorsimalerpai, qaammallu taanna sila pillugu oqaluttuarisaanermi januaari aatsaat taama kiatsigisoq inerniliutigalugu.
Nuummi januaarip ulluini kiannerpaammat 11,3 gradit sinnerlugit kiatsigisimasoq, qaammallu tamaat agguaqatigiissillugu 0,1 gradinik kiannerusimasoq, DMI tusagassiuutitigut nalunaarummi allappoq.
Tamanna kiannerpaaffik nutaaq, silaannaap nalinginnaasumik kissassusianit (1991-2020) 7,8 gradinik kiannerullunilu Nuummi ukiut 109-t matuma siornatigut kiannerpaaffimmit 1917-imeersumit 1,4 gradinik kianneruvoq.
Sinerissami aamma taamaattoqartoq
Nuummiinnaanngitsoq aammali kitaata sineriaani tamarmi qaammatini kingullerni aatsaat taama kitsigisoq DMI allappoq.
Ilulissani agguaqatigiissillugu januaari 1,6 gradinik issippoq. Tamanna 1929-mi kiannerpaaffiusumit 1,3 gradinik kianneruvoq, nalinginnaasumillu januaarimi 11,0 gradinik kiannerulluni:
- Kalaallit Nunaata kitaa tamarmi kiappoq, illoqarfiillu arlallit ukiup taamaalinerani kiassuup nalaaniittutut oqaatigineqarsinnaapput.
- Silaannaap uunartup Kalaallit Nunaannut ingerlaartarnera ilaatigut pisarpoq, imaluunniit nunasarneq ullut ilaanni ullormi ataatsimi marlunniluunniit kiannerutitsisarpoq. Piffissamili taama sivisutigisumi nunamilu taama angitigisumi taama maluginiarnartigisumik nikerartoqarnera tupigusuutigaarput, DMI-mi silap pissusianik ilisimatusartoq Caroline Drost Jensen oqarpoq, nangillunilu:
- Februaarimi kiassutsip uuttuutai nakkutigiuarpakka, Kalaallit Nunaanni ukiukkut aatsaat taama kiatsigilersinnaavoq.
