KL

DK

ISUMASIUINEQ

Kalaallit utoqqasaat kunngikkormiunik pingaartitsinerusarput

Kunngikkormiut inuusunerumaanut sanilliullugit utoqqarnit pingaartinneqarnerusut misissuinerup takutippaa.

Hollie Olsen Kielsen Tusagassiortoq
Saqqummersinneqarpoq

Kunngikkormiut innuttaasunit pingaartinneqarnerat pillugu qanittukkut isumasiuinermi paasisaqartoqarpoq. Isumasiuineq naapertorlugu kunngikkormiut innuttaasuni ukioqqortunerusuni pingaartinneqarnerupput.

Misissuineq kalaallinit 610-nit akissutisiffigineqarpoq, qinersinermilu misissuisartumik Sune Steffen Hansenimit Copenhagen Postimeersumit ingerlanneqartoq paasissutissat Opinion Danmark A/S-imit pissarsiarineqarput.

Innuttaasut 18-iniit 34-nut ukiullit qanoq akisimanersut misissoqqaarutsigu, taakkua 18 procentii kunngikkormiut inuttut pingaartingaarlugit oqarsimapput.

Ukioqatigiit taakkua 14 procentii kunngikkormiut inuttut soqutiginagit isumaqarput.

ISUMASIUINEQ QANOQ INGERLANNEQARPA?

• Isumasiuineq Kalaallit Nunaanni innuttaasut 18-ileereersimasut akornanni ingerlanneqarpoq.

• Inuit 610-t internetikkut oqarasuaatikkullu apersorneqarput.

• Internetikkut apersuineq januaarip 16-ianniit 26-anut.

• Telefonikkut apersuineq januaarip 19-ianniit 28-anut ingerlanneqarpoq.

• Akissutigineqartut suiaassutsit, ukiut, kommuninit tallimanit tamaneersut assigiinngitsunillu ilinniagaqarsimasut naapertorlugit agguataarneqarput.

Misissueqqissaartartoq: Nuannarineqarnerujartuinnassagaanni iliuuseqartoqartariaqarpoq

Utoqqaat 65-it sinnerlugit ukiullit akornanni kisitsisit allaanerulluinnarput. Taakkunani 53 procentit kunngikkormiut pingaartilluinnarpaat.

65-ileereersimasut 9 procentiinnaat kunngikkormiut inuttut soqutiginagit oqarsimapput.

- Kinguaariit inuusunnerusut kunngikkormiunut misigissutsikkut attaveqannginnerusarput, tamannalu Kunngikkormiut siunissami kalaallit kinguaariikkuutaani nuannarineqartuarnissaat anguniarlugu iliuuseqarnerusariaqartoq isumaqarpoq, Sune Steffen Hansen misissuinerup inernera pillugu oqarpoq.

Taamaammat inuusuttut kunngikkormiunik soqutiginninnginnerusut kisitsisit takutippaat.

Ukioqatigiiaat taakku marluk kunngikkormiunik pingaartitsisut 35 procentinik assigiinngissuteqarput, ukioqqortunerusullu kunngikkormiunik pingaartitsinerupput.

Kunngip 2026-mi februaarip 18-iani Kalaallit Nunaannut tikeraarnissani pilersaarutigaa.

innuttaasut inuiaqatigiit sune steffen hansen kunngikkormiut isumasiuineq kalaallit nunaat

Atorfiit tamaasa takukkit

PODCASTI

Se alle jobs

Powered by Labrador CMS