Kangaatsiami eqqagarpassuit naalakkersuisup takusarniarai

Kangaatsiami eqqaavissuarmi eqqagarpassuit ukiuni arlaqalersuni ajornartorsiutaasut naalakkersuisumit siullermeerluni takuniarneqartussanngorput. Avatangiisinut, Pinngortitamut, Nukissiutinut, Ilisimatusarnermullu Naalakkersuisoq Jørgen Rosbachip sapaatip-akunnerata tulliani takusartussanngoramigit.

Kangaatsiami eqqaavissuaq ukiorpassuarni taama isikkoqarpoq.

Assi: Kommune Qeqertalik

Arnaq Nielsen Arnaq Nielsen tusagassiortoq

Saqqummersinneqarpoq 16. Juuli 2026 - 14:22

Naalakkersuisut marluk, tassa Naalakkersuisut Siulittaasuat Jens Frederik Nielsen (D) aamma Avatangiisinut, Pinngortitamut, Nukissiuutinut Ilisimatusarnermullu, Naalakkersuisoq Jørgen Rosbach (D) ulluni makkunani angalapput.

Angalanerminni innuttaasut qanimut naapillugit kaffisoqatigeqattaarpaat. Taakkuli saniatigut Uummannami innaallagissiorfik qanittukkut ikuallattoq Uummannami eqqaanilu angalanerminni takusagaannut ilaavoq.

Angalanerminni ingerlaqqikkunik Kommune Qeqertalik sapaatiuppat tikeraarfigilissavaat. Kaffisoqatigiinnerullu saniatigut Kangaatsiami eqqaavissuaq ataasinngorpat takusalerunikku tipimiuussagunavipput. Tamaanimi eqqagarpassuit ukiuni arlariinni qaleriiaaginnalernikuupput.

Ussassaarut

Oqartussaaffiginngikkaluarlugit takorusukkai

AAMMA ATUARUK

Kangaatsiami eqqaavissuaq imaarneqalersoq

Eqqakkanik isumaginninneq kommunit akisussaaffigaat, Jørgen Rosbachilli eqqakkat eqqartorneqartuarsimasut nammineq isiminik takorusuppai.

- Soorunami pisariaqarpoq, killiffiat takorusuppara. Ilisimasakka annertusarusuppakka innuttaasut tikillugit, Jørgen Rosbach oqarpoq.

Kangaatsiami eqqakkat qaleriiaaginnalernikut piiarneqassasut Kommune Qeqertalimmi kommunalbestyrelsip juunip aqqarnani aalajangiuppaa. Eqqavissuaq novembarimi imaarneqarluni piareersimassasoq naatsorsuutigineqarluni.

- Taakkua eqqaaveqarnermikkut maannakkorpiaq atugai takorusuppagut, uangalu imatut imminut suliakkernikuuvunga, assinik nassassuunga. Uppernarsaatit taakkua aamma angerlaatissuakka. Sulisoqarpunga, aamma assigiinngitsutigut pilersaarutitsinnut iluaqutaasinnaammata, Jørgen Rosbach oqarpoq.