Naalakkersuisut inuit innarluutillit atugaannik pitsanngorsaaniarput, inatsisissatullu siunnersuut annertuumik imalik tusarniaassutigineqarluni.
Siunnersuulli illoqarfiit pingaarnersaata kommunianit sakkortuumik isornartorsiorneqarpoq. Kommuneqarfik Sermersuumit inatsisissatut siunnersuutip siunertaa tapersersorneqarpoq, Naalakkersuisulli kommunit sumiginnarlugit suliassanik nutaanik arlalinnik naammattumik aningaasaliiffigineqanngitsunik suliassittussanngoraat isorineqarluni.
Naalakkersuisut inuit innarluutillit atugaannik pitsanngorsaaniarput, inatsisissatullu siunnersuut annertuumik imalik tusarniaassutigineqarluni.
Siunnersuulli illoqarfiit pingaarnersaata kommunianit sakkortuumik isornartorsiorneqarpoq. Kommuneqarfik Sermersuumit inatsisissatut siunnersuutip siunertaa tapersersorneqarpoq, Naalakkersuisulli kommunit sumiginnarlugit suliassanik nutaanik arlalinnik naammattumik aningaasaliiffigineqanngitsunik suliassittussanngoraat isorineqarluni.
Naalakkersuisut inatsisissatut siunnersuutip aningaasatigut kingunerisinnaasai nalilerpaat, inerniliinerallu naapertorlugu kommuninut aningaasartuutissat amerlillugit ukiumut 7,8 millionit koruuniunissaat naatsorsorneqarluni.
Naalakkersuisut aningaasaqarnikkut kingunissai naatsorsuutigineqartut, aningaasartuutissallu missingersuutigineqartut ilaat nalorninarujussuarsinnaanerat erseqqissaatigaat.
Sermersooq: Naatsorsuutit piviusorsiortuunngillat
Kommuneqarfik Sermersuumiit Naalakkersuisut naatsorsuutaat isumaqatigineqarpallaanngillat.
Kommunimiit inatsimmut tunngaviusumik naatsorsuinerit piviusorsiortuunngitsut imaluunniit amigaateqartorujussuusut, kommunilu nammassinnaanngisaminik akiligassaqalissasoq tusagassiuutitigut nalunaarummi atuarneqarsinnaavoq.
Assersuutigalugu inatsisit allanngortinneqarpata kommunimi sulisunut piumasaqaatit annertusineqarnissasut, aamma inunnut innarluutilinnut tunngasuni piginnaasalinnik sulisussaaleqineq kommunip ullumikkut ajornartorsiutigereerai eqqaaneqarput:
– Sulisussaqanngilaq. Paaqqinniffiliornissamut aamma najugaqatigiiffiliornissamut aamma illutassaqartoqanngilaq. Inatsisissatut siunnersuummi nunap immikkoortui isiginngitsuusaarneqarput nunalu tamakkerlugu annertuumik piumasaqaateqartoqarluni. Inatsimmik malinninnissaq kommuninut akisoorujussuanngussaaq innuttaasullu pisinnaatitaaffii pappiliaannarniiginnartoorsinnaapput, Kommuneqarfik Sermersuumiit allapput.
Wangenheim: Naalagaaffiit Peqatigiit isumaqatigiissutaat malinnissaat pisussaaffigaarput
Peqqissutsimut inunnullu innarluutilinnut naalakkersuisoq, Anna Wangenheim (D), inatsisissatut siunnersuut tusarniaassutigineqarmat akissuterpassuaqartoq, aamma aningaasanik sulisunilllu amigaateqarnerup ernummatigineqarnera uteqqianeqartoq Sermitsiamut allakkatigut akissuteqarnermini ilisimatitsivoq.
- Taamaakkaluartoq aamma nunatut Naalagaaffiit Peqatigiit inuit innarluutillit pillugit isumaqatigiissutaasa malinnissaanut pisussaaffeqarpugut, pingaaruteqarporlu tamatta pitsanngorsaaqataanissarput, naalakkersuisoq Anna Wangenheim oqarpoq.
Suliniutit nutaat eqqarsaatigalugit qanoq akeqarnissaannut apeqqummut paasissutissat amigaataammata akiuminaatsippaa. Sulisulli piginnaasallit amigaatigineqarnerat pissutaalluni inuit innarluutillit pisinnaatitaaffii killilersorneqarnissaanngitsut oqarpoq.
Kinguartitsinissaq siunnersuutigineqartoq
Inatsisissatut siunnersuut assingusoq ukiut marluk matuma siorna tusarniaassutigineqarpoq, Kommuneqarfik Sermersuullu inatsisip piareersarnerani naammattumik peqataatitsisoqaqqaarani maanna aamma tusarniaassutigineqarnera pakatsissutigigaa.
Kommuneqarfik Sermersooq inatsisip atuutilersinneqarnissaa kinguartillugu, aningaasartuutit naatsorsorluarneqartariaqartut kommunillu suliaqarnermi peqataatinneqartariaqartut siunnersuuteqarpoq.
Naalakkersuisoq Anna Wangenheim Naalakkersuisut kommunit, Tilioq inuillu innarluutillit peqatigiiffiat NIIK tusaaniarneqartut erseqqissaavoq.
- Maanna tusarniaanermut akissutit misissorpavut naatsorsuutigalugulu inatsisissatut siunnersuut 2026-mi UA-mi (ukiaanerani ataatsimiinnermi, aaqq.) saqqummiussinnaallutigu, Anna Wangenheim paasissutissiivoq.
Suliniutit amerlanerit
Naalakkersuisut inatsisissatut siunnersuut 2024-mi saqqummiunneqartoq allanngorlugu nutaamik maanna ilusilerneqartoq inatsisissatut siunnersuutip paasissutissartaani allapput.
Inatsimmi pineqartunut aamma inunnut innarluutilinnut sullissisunut atoruminarnerulernissaa siunertaralugu ilusiligaasoq Naalakkersuisut allapput.
Naalakkersuisut inatsisissatut siunnersuummi suliniutaasut uku taakkartorpaat:
”Pisarialimmik tapersersorneqarnissaq”-miit”eqqortumik tapersersorneqarnissaq”-mut allannguineq
Eqimattakkaanut ikiuineq tapersersuinermik neqerooruteqarneq
Isumaginninnikkut ikiorneqarnissami tapersersorneqarnissamut piffissami killilikkami inuit ataasiakkaat pillugit neqeroorut
Ikaarsaaneq
Qanigisaasup inuup innarluutilik paaqqitarinninnissaanut periarfissaq
Kommuninit akuerineqartumik ulloq unnuarlu paaqqinnittarfinnit periarfissat
Kinguaassiuutitigut atornerluisarnerit pinaveersaartinnissaat suliarisarnissaalu.
Naalakkersuisut innarluuteqarnermut politikiat innarluutinik, inuup piginnaasakinnerulersimasup inuiaqatigiinni naapittagaanik, inuiaqatigiinni pilersinneqartunik akimmiffigineqartunik paasinninnermik tunngaveqartoq naqissuserneqarpoq.
Inatsisissatut siunnersuummi inuit innarluutillit amerlanerusunik pisinnaatitaaffeqalernissaat kiisalu inuit innarluutillit inuit pisinnaatitaaffiinit aamma kiffaanngissuseqarnissamut tunngaviusumik pisinnaatitaaffiinik tamakkiisunik pissarsisarnissaat siunertaasut ilagaat.
