Kommune Kujallermi 2024-mut naatsorsuutit novembarimi 2025-mi kiisami piareerput. Naatsorsuutilli kukkunersiuisartunit BDO-meersunit isornartorsiorneqarput, kommunimilu aalajangiisartuulluni atuarlugit nuannerpallaarunarani.
- Kommuni inatsisinik maleruagassanillu atuuttunik arlalitsigut unioqqutitsisimasoq paasivarput, kukkunersiuisut nalunaarusiaminni allapput.
Kommune Kujallermi 2024-mut naatsorsuutit novembarimi 2025-mi kiisami piareerput. Naatsorsuutilli kukkunersiuisartunit BDO-meersunit isornartorsiorneqarput, kommunimilu aalajangiisartuulluni atuarlugit nuannerpallaarunarani.
- Kommuni inatsisinik maleruagassanillu atuuttunik arlalitsigut unioqqutitsisimasoq paasivarput, kukkunersiuisut nalunaarusiaminni allapput.
Kommunit Namminersorlutillu Oqartussat missingersuutaat naatsorsuutaallu pillugit Namminersorlutik Oqartussat nalunaarutaat kommunip aningaasaqarnermut ataatsimiititaliaaniit malinngeqanngitsut, kukkunersiuisut ilaatigut isumaqarput.
Kommunip aningaasanik aqutsineq isumagissagaa nalunaarumimi tassani naqissuserneqarpoq. Kommunimi systemi arlaatigut ajoquteqarnissaannik atornerlunneqarnissaanilluunniit pinaveersaartitsisunik kommunip iluani nakkutilliisoqarnissaa ilaatigut isumagineqartussaalluni.
– Kommunip aningaasaqarnera ERP-systemip nutaap 2021-mi atuutilersinneqarnerata kingorna aqutsineq amigalerpoq, taamaattumillu tamanna pillugu isornartorsiuilluta oqaaseqarpugut, kukkunersiuisut ilanngullugu allapput.
- Aningaasanik aqutsinermi kommunip sipaarniarluni, angusaqarluarluni sunniuteqarluartumillu ingerlatsisimanera nalilerneqarsinnaanngilaq, nangipput.
Aqutsineq naammaginanngitsoq
ERP-systemi qarasaasiakkut atortorissaarutaavoq suliassanik assigiinngitsunik ataatsimut katersuisinnaasoq. Taannali ingerlalluarpallaarsimagunanngilaq.
- Aqutsisut ERP-systemimut nutaamut nuunnerup kingorna aningaasaqarnikkut ingerlatsinerup aqunneqarneratalu isumannaatsumik eqqorluartumillu pilersinneqarnissaanik qulakkeerinnittussanik, inunnik pisariaqartnik piginnaasalinnik ilisimasaqartunillu atorfinitsitsinissaq qulakkeersimanngilaat, kukkunersiuisut allapput, nangillutillu:
- Pisortat suliat pitsaassusiat nakkutiginngilaat, aamma akisussaaffimminnik eqqortumik naammassinninniarlutik iliuuseqanngikkaangata kinguneqartitsisoqarneq ajorpoq.
2024-mut naatsorsuutit pillugit kukkunersiuisut oqaaseqaataat ukiut siuliini ajornartorsiuterpassuarnik uteqqiineruvoq.
Kommune Kujallermi isumaginninnermut suliassat unammilligassaqarfiunerat pissutaalluni, Isumaginninnermut Naalakkersuisoqarfimmit 2024-mi akisussaaffigineqalerput.
2024-mi pitsanngoriartoqarsimasoq, sulili pisariaqartitsisoqartoq kommuni ukiumut nalunaarusiami siuleqummi allappoq. Kommunimi naatsorsuutit ukiorpassuarni kinguussaaqqanerat qaangerneqartoq siuariaatitut assersuutigineqarpoq.
Oqaaseqanngitsut
Sermitsiap borgmester Malene Vahl Rasmussen (D) aamma kommunimi pisortaaninngorlaaq Randi Vestergaard Evaldsen attaveqarfigai. Politikkikkut allaffissornikkullu aqutsisut 2025-mut naatsorsuutit eqqarsaatigalugit kukkunersiuisut assigusumik isornartorsiuissanersut paasiniaraluarparput.
Aammattaaq Sermitsiap Aningaasaqarnermut Ataatsimiititaliami ilaasortaq Stine Egede (IA), borgmesteritut 2024-mi Kommune Kujallermi akisussaanerpaasoq, oqaaseqaqquaa.
Taakkua pingasut arlaannaalluunniit saaffiginnissutitsinnut akissuteqanngillat.
