Meeqqat pillugit oqaaseqartartup nuna tamakkerlugu aalakoornartumut politikkimik suliaqarneq nangeqqeqqugaa
Meeqqat pillugit oqaaseqartartup Stina Sværdip Naalagaaffiit Peqatigiit nunarsuaq tamakkerlugu meeqqanut novembarip 20-ani ullorititaanut atatillugu imigassamik atornerluinerup qanoq kinguneqarsinnaanera unitsinneqartariaqarneralu pillugu kajumissaaruteqarpoq.
- Nunatsinni meeqqat oqaaseqartartuattut paatsuugassaanngitsumik erseqqissarusuppara: Meeqqat kikkulluunniit aalakoornartup kingunerisaanik timikkut tarnikkulluunniit innarlerneqarnerit atugaralugit inuussanngillat, Stina Sværd oqarpoq.
Assi: Privat
MEEQQAT PILLUGIT OQAASEQARTARTUP KAJUMISSAARUTAI
1.
Nuna tamakkerlugu aalakoornartoq pillugu politikki meeqqat
aalakoornartumit ajoquserneqannginnissaannik najoqqutassiamik
tunngaveqassasoq. Najoqqutassiaq taanna “ukiorpassuarni
atuuttussamik aalakoornartoq pillugu politikkimut ilisimatusarnermik
tunngaveqartumut kaammattuutini” qitiulluinnarpoq.
2.
Politikkikkut aalajangernerit – aningaasaqarnikkut uungaannaq
isiginermik tunngaveqarnatik – uppernarsaatinik, misilittakkanik
inuiaqatigiinnilu aningaasaqarnermik siammasissumik
misissueqqissaarnernik tunngaveqassasut.
3.
Ilaqutariit aalakoornartumik ajornartorsiutillit pillugit
pitsaaliuineq tapersersuinerlu inersimasunik katsorsaanertulli
pingaartitsigineqassasut.
4.
Oqartussaasut, innuttaasut inuiaqatigiillu suleqatigiinnerat
pitsaanerulissasoq meeqqat taamaalillutik ajornartorsiutit
annertunerulinnginneranni tapersersorneqarniassammata.
5.
Meeqqat inuusuttullu politikkit inuunerminnut siunissaminnullu
attuumassutillit ilusilersorneqarnerannut akuutinneqartuassasut.
Inersimasut imigassamik atornerluinerat inuiaqatigiinnut aningaasatigut aamma meeqqanut inuusuttunullu inuttut akisuvoq.
Taamaattumik politikerit nuna tamakkerlugu imigassamut politikkimik, meeqqat atugarissaarnissaat toqqissisimasumillu inuuneqarnissaminnut pisinnaatitaaffiannik pingaarnerpaatitsisumik, suliaqarneq aallarteqqittariaqaraat, meeqqat pillugit oqaaseqartartoq Stina Sværd isumaqarpoq.
MIO-p Naalagaaffiit Peqatigiit meeqqanut ullorititaannut- novembarip 20-ani - atatillugu tusagassiuutitigut nalunaarummi allappoq.
- Nunatsinni
meeqqat oqaaseqartartuattut paatsuugassaanngitsumik
erseqqissarusuppara: Meeqqat kikkulluunniit aalakoornartup
kingunerisaanik timikkut tarnikkulluunniit innarlerneqarnerit
atugaralugit inuussanngillat.
- Ajoraluartumik ullumikkut meeqqat
inuusuttullu amerlavallaarujussuartut taama atugaqarput. Meeqqat
aalakoornartumik atornerluiffiusumi peroriartortut amerlanertigut
inuusarput toqqissisimanatik, sumiginnarneqarlutik sakkortuunillu
nalaataqartarlutik inersimasunngoreernermi suli
kingunerluutigineqartartunik, Stina Sværd oqarpoq.
Taakku pisinnaatitaaffimmik unioqqutitsinerusut meeqqat pillugit oqaaseqartartoq oqarpoq.
Imigassaarniarneq pisortanit aqunneqartoq
Naalakkersuisut imigassaq aalakoornartortalik pillugu ukiunut arlalinnut politikkissamut, ilisimatusarnermit tunngavilimmut, inassuteqaatit 18-it tigusatik oktobarip aallartinnerani saqqummiuppaat.
Ilaatigut imigassap akitsorneqarnissaa, imigassartornissamut ukiut killigititat amerlinissaat aalakoornartumillu pisisinnaanermut piffissaq aalajangersimasunngortinneqarnissaa inassuteqaatit ilagaat.
Aamma imigassap pisortanit aqunneqarluni tuniniarneqarsinnaanngornissaa.
Inassuteqaatit Peqqissutsimut Naalakkersuisoqarfiup Innuttaasut Peqqissusiannik Ilisimatusarfik qanimut suleqatigalugu suliarineqarput. Inatsisartuni 2023-mi upernaakkut ataatsimiinnermi aalajangiinerat tunngavigalugu imigassap atornerlunneqarnerata akiorniarnissaanut ilisimasanik tunngaveqarluartunik Naalakkersuisut suliaqaqquneqarmata taanna suliarineqarpoq.
Meeqqat pillugit oqaaseqartartup maanna alloriartoqaqqinnissaa kissaatigaa.
- Nuna
tamakkerlugu aalakoornartoq pillugu politikki inuiaqatigiit
siunissarpullu pillugit iliuuseqarnertut isigissavarput –
killilersuutitut aningaasartuutitulluunniit isigissanngilarput.
Meeqqat angerlarsimaffimmi toqqissillutik peroriartorsinnaasut
ilaqutariillu tapersersorneqartut inuiaqatigiillu qajannarnerpaanik
sernissuisut pillugit iliuuseqarneruvoq. Ataatsimoorluta inuiaqativut
aningaasaqarnerpullu pillugit iliuuseqarneruvoq, Stina Sværd
erseqqissaavoq, nangipporlu:
- Koruuni
ataaseq pitsaaliuinermut, siusissukkut suliniuteqarnermut
ilaqutariillu qajannartumik inissisimasut pillugit tapersersuinermut
atorneqartoq annertoorujussuarmik pissarsiaqarfiusarpoq – tassa
meeqqat peqqinnerulertarmata, ilaqutariit nukittunerulertarmata
inuiaqatigiillu imminnut napatinnerusinnaalertarmata.
Inuiaqatigiinnut akisusoq
Imigassamik ajornartorsiuteqarneq angerlarsimaffiup avataanut inissiinerit, peqqinnissaqarfimmut aningaasartuutinik, sulinngitsoornermik, pinerlunnermik inuuniarnikkullu ajornartorsiutinik kinguneqarsinnaammat inuiaqatigiit aningaasaqarnerannik annertuumik eqquivoq.
- Piffissami
nunatta aningaasaqarnikkut tatineqarfiani aalakoornartumik
atornerluinerup inuiaqatigiinni aningaasaqarnermut akisoorujussuunera
unneqqarilluta qissimittariaqarparput, Stina Sværd oqarpoq, imigassamillu ajornartorsiuteqarnerup peqqinnissaqarfimmut, suliffeqarfinnut, kommuninut politiinullu qanoq akisutigisinnaasarnera eqqarsaatigeqqullugu.
- Christina
Viskum Lytken Larsenip eqqortumik erseqqissarpaa inuit
ataasiakkaat aalakoornartumik tuniniaaneq iluanaarutigisaraat,
aningaasartuutilli tamanit akilerneqartussaasut. Taamaattumik
ataatsimoorluta akisussaaffigivarput meerartatta, peqqissutsitta,
ilorrisimaarnitta ataatsimoorlutalu aningaasaqarnitta piffissami
sivikitsumi aningaasaqarnikkut isertitanit pingaarnerutinnissaannut
sinaakkusiinissaq.
Christina Viskum Lytken Larsen Innuttaasut Peqqissusiannik Ilisimatusarfimmi professoriuvoq, Imigassaq aalakoornartortalik pillugu ukiunut arlalinnut politikkissamut inassuteqaatinik suliaqarnermi siuttuuvoq.
Naalagaaffiit Peqatigiit Meeqqat pisinnaatitaaffii pillugit isumaqatigiissutaat Kalaallit Nunaanni meeqqat innarleqarnissaannut, ilaatigut angajoqqaanit imigassamik atornerluinerannut, illersuinissamik pisussaaffiliivoq. Taamaattumik nuna tamakkerlugu imigassamik politikki meeqqat pisinnaatitaaffiinik tunngaveqartariaqartoq, tassa toqqissisimanissamik, peqqissuunissamik ineriartornissaanillu pisinnaatitaaffeqarnerannik, meeqqat pillugit oqaaseqartartoq isumaqarpoq.
