Kalaallit Nunaanni silaannakkut angallannermi Nuummi mittarfissaq nutaaq 2024-miilli sammineqartorujussuuvoq. Kujataani avannaanilu mittarfissat ukioq manna aamma sammineqartussanngussapput, Qaqortumi apriilip 16-iani Ilulissanilu oktobarimi mittarfiit ammarneqartussaapput.
Anna Eva Villefrance tamatumunnga tunngatillugu qitiusumik atuuffeqarpoq. Naviairimi ukiuni 35-ni sulisimanini pissutigalugu silaannakkut angallannermik suliassat amerlanernit ilisimasaqarfigineruai. Greenland Airportsimi 2025-mi atorfinippoq.
Kalaallit Nunaanni silaannakkut angallannermi Nuummi mittarfissaq nutaaq 2024-miilli sammineqartorujussuuvoq. Kujataani avannaanilu mittarfissat ukioq manna aamma sammineqartussanngussapput, Qaqortumi apriilip 16-iani Ilulissanilu oktobarimi mittarfiit ammarneqartussaapput.
Anna Eva Villefrance tamatumunnga tunngatillugu qitiusumik atuuffeqarpoq. Naviairimi ukiuni 35-ni sulisimanini pissutigalugu silaannakkut angallannermik suliassat amerlanernit ilisimasaqarfigineruai. Greenland Airportsimi 2025-mi atorfinippoq.
Greenland Airportsimi pilersaarutinut aqutsisoq Anna Eva Villefrance. Naviairimi siornatigut atorfeqarnikoq.
Assi: Nammineq pigisaq.
– Qaqortumi Ilulissanilu ammaanissamut aqutsisuuvunga, taamaattumik mittarfissat ammartinnagut suut tamarmik ajunngitsumik piareerneqarsimanissat isumagisassaralugu. Soorunami aamma mittarfiit ammaanersiorneqareernerisa kingorna, oqarpoq.
Anna Eva Villefrance assigiinngitsorpassuarnik akisussaaffeqarpoq, maannakkulli isumannaallisaaneq samminerussavarput. Nuummi mittarfissuup ammarneqarnera ajornartorsiutaanikooqaaq, soorlu Sermitsiami aamma allaaserisaqattaarnikuugipput.
Greenland Airports tamatumunnga tunngatillugu pingaarutilimmik aalajangiisimasoq Villefrance aallarniutigalugu oqaluttuarpoq. Mittarfissat Nuummiit allaanerusumik aaqqissuunneqarput, Nuummimi angalasussat 2024-mi novembarip 28-anniilli ataatsimut misissorneqartarput.
– Nunap iluani angalasut nunanullu allanut angalasut immikkut misissorneqartalissasut aalajangerparput. Tassa Qaqortumiit Ilulissaniillu Kalaallit Nunaata avataanut angalaniartui aatsaat misissorneqarnissaq pisariaqalissaaq, oqarpoq, itisiliivorlu:
– Arlalinnik iluaqutissartaqarpoq. Siullermik soorunami nunami angalasut mittarfimmut isernissaat ajornannginnerulissaaq, uagullu Greenland Airportsimi sulisut ikinnerit pisariaqartilissavagut aningaasartuutikinnerussallutalu, taanna itisiliivoq.
Nunanut allanut timmisartuussinerit ikinnerit
Greenland Airportsip siunissami angallannerup qanoq ikkumaarnera misissoreerlugu taamatut aalajangerpoq. Anna Villefrancep silatusaarnertut taavaa:
– Mittarfissani nutaani nunanut allanut timmisartuussinerit Nuummiit ikinnerupput. Tassa ukiup ingerlanerani ullut amerlasuut nunanut allanut angalasussanik isumannaallisaanermik suliaqartariaqanngilagut, taamaattumillu angalasut immikkoortinnissaannut aaqqiissuteqarnissaq toqqarparput, oqarpoq.
Tamanna mittarfiit nutaat Nuummisulli ingerlariuseqaratik Kangerlussuarmut assingunerussapput, imaanngilarli Qaqortumi Ilulissanilu Greenland Airportsip suleriusitoqaanik attassiinnartoqassasoq.
- Aamma allatut periuseqartussaavugut, Anna Villefrance oqarpoq.
- Mittarfinni pisoqaanerusuni sulisut allanik suliaqartut isumannaallisaanermilu ikiuutaasarput. Taamatut periuseqarneq killormut saallugu isumannaallisaanermik suliaqartussanik aalajangersimasunik sulisoqassaaq, taakkulu piffissap ilaani allanik suliaqarsinnaasassallutik, oqarpoq.
Isumannaallisaasut najukkameersut
Aammattaaq pingaarutilimmik suliaqarfimmi aqutsineq eqqarsaatigineqartoq aamma oqaatigaa:
– Qaqortumi Ilulissanilu mittarfinni pisortat isumannaallisaanermut pisortaatigissapput. Taakku isumannaallisaanermut aqutsisoqassapput pisariaqartitsivimmi isumannaallisaanermut pisortatut atorneqarsinnaassallutik. Mittarfinni ataasiakkaanni najukkameersunik isumannaallisaasoqarnissaa siunertaavoq, oqarpoq.
Isumannaallisaasut pisariaqartitatit tamaasa atorfinitsereerpisigit?
– Qaqortumi sulisuvut tamarmik, aamma isumannaallisaasut, Narsarsuarmit tikinnikuupput. Ilulissani suli sulisunik amigaateqarpugut, sulisussarsiornerli aallartilluareerpoq.
Ilulissat One Stop Security-qalernissaat suli anguniagaava, angalasut taamaalillutik Islandimiit Danmarkimiillu timmisartumik ingerlaqqittussat isumannaallisaavikkooqqittariaarutissallutik?
– Siunissaq ungasinnerusoq eqqarsaatigalugu suli tamanna kissaatigaarput, maannakkulli tamanna pingaarnerutinngilarput. Nunanut allanut mittarfiit pitsaasut patajaallisullu inatsisinik maleruaasut silatusaartumillu ingerlanneqartut qulakkeernissaat pingaarnerutipparput. Taamaammat One Step Security kingusinnerusukkut uterfigiumaarlugu.
Nuummi apersorneqarnerata naammassilernerani Anna Villefrance ulloq taanna Narsarsuaq aqqusaarlugu Qaqortumukaartoq paasinarsivoq. Angallannermut Aqutsisoqarfimmit paasissutissiineq aamma illunut allaffiillu ilusilersorneqarnerannut tunngasunik apeqqutit ilaatigut oqaluuserineqassasut oqaatigaa.
- Apriilip 16-iaritinnagu suli suliassarpassuaqarpoq, najuullunilu aqukkuminarnerussallutik, pilersaarutinik aqutsisoq oqarpoq.
