Air Greenlandip timmisartorsua Tuukkaq, timmisartuni siullersaalluni atlantikoq qulaallugu illoqarfiit pingaarnersaanni mittarfissuartaamut 2.200 meterisut takitigisumut mimmat, Nuummi innuttaasut tudilikkaat nuannapput. Mittarfissuaq atulerpoq, Kalaallit Nunaannilu silaannakkut angallanneq allanngorluinnarluni.
Ulloq oqaluttuarisaanermut ilannguttoq pineraniit maanna ukioq ataaseq qaangiussimalerpoq.
Ukiumik ataasinngortorsiornermut atatillugu Greenland Airportsip pisortaanera Jens R. Lauridsen Sermitsiamit pulaarparput. Pisumut tulluartumik allaffiani Kalaallit Nunaanni mittarfiit nutaat pillugit allagartarpassuit nivingapput.
– Taamaallunga utoqqaat illuanniileruma suliffigisarsimasamasa kingumut qiviarneranni Nuummi mittarfissuup atoqqaarfissiornera ulloq pingaarutilittut eqqaasassavara, Jens R. Lauridsen oqarpoq.
Atulerneraniilli nuannaarneq tusarsaavallaarunnaarpoq. Nuup mittarfiani ukioq ilungersunarsimaqaaq. Taamaasilluni angut Greenland Airportsimi qitiusumik inissisimaffeqartoq Kalaallit Nunaanni isornartorsiorneqarnerpaat ilagilerpaat. Taamaakkaluartoq Nuummi pisortaanerup allaffiani suli nukissaqarluni issiavoq.
- Suut tamaasa inuttut tigusartuugukkit sussaajunnaareersimassagaluarpunga, Jens R. Lauridsen oqarpoq.
Assoralisimaarneq sulerusussuseqalissutigisarput?
- Naluara assoralisimaaleraangama sulerusussusinittarnerlunga... kisianni suliassat imaannaanngileraangata ajornakusoortutullu isikkoqalerlutik uteriinnerulaalertarpunga, qanorluunniillu arlaatigut aaqqiissutissaqarnera kimigiiserfigilersarlugu, pisortaaneq oqarpoq, nangipporlu:
– Allanngueqataasinnaanera sulerusussusinitsitsisarpoq. Soorlu mittarfiit nutaat atulernerisigut taamaaliortugut. Nuummi taamaattoqarnera malugisimassavat, takornariat tikeraallu imaaginnavipput. Mittarfiup atulernera qanoq pingaaruteqartigineranik takussutissiisut. Naak akornutaasunik nalaataqarsimagaluarluni.
Aporfissarpassuaqarsimavorlu. Mittarfik 2025-p aallartinnerani januaarimi quasappallaarpoq. Angallannermut Aqutsisoqarfiup Kalaallit Nunaanniit avammut nassiussisinnaanermut akuersissut sapaatip-akunnerata missaani junuaarimi aamma atorunnaarsikkallarpaa.
Tamatuma kingorna angalasunik nakkutilliisut, mittarfimmi qulliit upalungaarsimanermullu tunngasut allarpassuit ajornartorsiorfiupput. Angallannermut Aqutsisoqarfiup apriilimi nakkutilliinermi ataatsimi Greenland Airportsip eqqumaffigisariaqangaanik 25-nik nassaartoqarpoq. Pisortaanertut suliassakinnarani.
– Nuup mittarfiata atulerneranit ukiut ataatsip qaangiunnerani kingumut qiviarlunga iliuuserineqarsinnaagaluartut soorunami eqqarsaatigaakka. Ukioq manna suliavut tamakkivillugit tulluusimaarutigalugit oqarsinnaanngilanga, Jens R. Lauridsen oqarpoq.
Ukiumut qaangiuttumut qiviarneq Aalajangersimasunik eqqarsaateqarpit?
– Sulisutta isumannaallisaanermik ilinniartinnissaannut naammattumik ilinniartissimannginnatsigu Angallannermut Aqutsisoqarfiup nunanut allanut timmisartuussinissamut akuersissummik arsaarinninnera assersuutitut taasinnaavara. Allat aamma eqqarsaatigalugit. Suliffeqarfimmut qiviarluta pikkorinnerpaasimannginnerput nassuerutigisariaqarparput, taakkulu mittarfittaassat eqqarsaatigalugit ilinniarfigisimanissaat qulakkeerlugu.
Nuummiit nunanut allanut timmisartuussisinnaanermut akuersissut augustip 26-ani arsaarinnissutigineqarpoq. Piffissarititaq torraanerpaanngilaq, Angallannermummi Aqutsisoqarfiup aalajangiineq nalunaarutigimmagu United Airlinesip timmisartua Nunatsinnukaarluni ingerlaarpoq. Tamannalu sioqqullugu aamma sulisunik nakkutilliisunik amigaateqarneq pissutaalluni timmisartuussinissat taamaatiinnarneqaqattaarnikuupput.
Pissutsit aaqqiivigipallanniarlugit Københavnimiit Billundimiillu angalasunik nakkutilliisunik ikiuuttussanik tikisitsisoqarpoq. Timmisartunilli soqutiginnittut timmisartortitseqatigiiffiit suleqatigineqartut nutaat Kalaallit Nunaannukarusukkunnaarnerannik kinguneqarsinnaanersoq eqqarsaatersuutigilereersimavaat. United Airlinesimiit, SAS-imit Airsevenimiillu 2026-mi timmisartuussisoqartaqinnissaa pissasoq nalunaarutigineqarpoq.
United Airlinesimik imaluunniit allanik nutaanik suleqateqarunnaarsinnaaneq aarleqqutigisimaviuk?
- Soorunami aappaagu tikiuteqqinniarnersut eqqarsaatigisarpara, tikeqqikkumaartulli ilimagiuaannarnikuullugu. Angallannerniit kisitsisit takusinnaavakka, taakkulu timmisartortitseqatigiiffinniit aningaasarsiorfiupput. Kisitsisit taakku ajoriinnagassaannginnamik.
Jens R. Lauridsenip SAS-imi pisortaq Anko van der Werff peqatigalugu Københavnimut aqqut nutaaq ammaraa.
Assi: Morten Okkels
Kingumut qiviaraanni, timmisartortitseqatigiiffiit nutaat Nuup mittarfianut tikittalernissat utaqqitissimasinnaagaluarnerpiuk?
– Oqaatigiuminaappoq. Teknikkikkut unammilligassarisimasavut eqqarsaatigalugit utaqqisimasuugutta pitsaassagaluarpoq. Taamaakkaluartoq mittarfissup nutaarluinnaap atulernerata kingorna timmisartuussinerit nutaat nutaarsiassatut immikkut naleqarnerupput. Ukiut marluk pingasulluunniit utaqqisimasuugutta timmisartortitseqatigiiffiit nutaat tikittalernissaat ajornakusoornerusimassagaluarpoq, Jens R. Lauridsen oqarpoq.
Suliassaq imaannaanngitsoq Mittarfiup sananeqaataasa iluani avataanilu aaqqissuussinerup qanoq ajornakusoortigisinnaanera aamma eqqartorparput.
- Mittarfiup ingerlannissaa qanoq pisariutigisarnera inuit ilaannikkut paasiuminaatsittarunarpaat, pingaartumik mittarfik nutaaq inatsisinik piumasaqaatinillu mittarfinnut pisoqqanut atuutinngitsunik maleruaasariaqarmat, Jens R. Lauridsen oqarpoq.
Ukioq mannali ajornartorsiutit annerpaat ilaat tassaavoq ilissi inatsisitigut piumasaqaatit sinnerlugit anguniagaqarpallaarnersi. Tassa ilaatigut angalasut tamarmik nakkutilliivikkooqqaartussaanerat eqqarsaatigalugu?
– Ilumoorputit, tamannalu ilaasunut pitsaanerusumik atugassaqalersitsiniarluta iliuuseqarfigaarput. Aap, immaqa piumasaqaatit eqqarsaatigissagaanni immitsinnut inorsissimasinnaavugut, ullulli ilaanni One Stop Security-qalernissarput akuersissutigineqarumaarpoq. Taamaalillutik sullitatta tikeraattalu Københavnimiit allamut ingerlaqqinniartut ajornannginnerusumik angalasinnaalerumaarlutik, Jens R. Lauridsen oqarpoq.
Greenland Airportsimut suli tunniussassaqarnerlunga eqqarsaatersuutigaara. Atorfimmi uanga akisussaaffigisanniissagaanni imminut taamatut ilaatigut aperisinnaasariaqarpoq.
- Jens R. Lauridsen
One Stop Security EU-mi akuersissutaavoq. Nunat Europamiittut mittarfiinni timmisartumut allamut ilaalluni ingerlaqqinniaraanni nakkutilliivikkooqqeqqaanngikkaluarluni allarnisamut periarfissaasoq.
Suliinnarnissamut piumassuseqarneq Ukiup ingerlanerani ajornartorsiutit amerligaluttuinnartillugit mittarfik politikkikkut aamma eqqumaffigineqalerpoq. Naalakkersuisut siulittaasuat Jens-Frederik Nielsen (D) kinguneqartitsiniarluni septembarimi aalajangerpoq. Siulersuisut immikkut ittumik ataatsimeersuartillugit taarserpai, Jens Wittrup Willumsenilu siulittaasunngortillugu.
Naalakkersuisut siulittaasuata pisortaq ataatsimeersuarnermi ilassigaa.
Assi: Oscar Scott Carl
Siulersuisut nutaat pisortaanerumi suliassaanik suliffeqarfianullu allannguisimanerannik assersuutissaqarnersoq Sermitsiap apeqqutigaa. Taama pisoqarsimappat tusarnissaa soqutiginarami, pisortaanerulli allaqqinnaat oqaluttuarai:
– Siulersuisunngortut peqatigalugit ulluinnarni suliassat allaaneruallaanngillat. Ingerlatsineq unammilligassallu maannakkut atukkavut tamaasa ukkatariniarpavut. Siulersuisunngortut qanoq sulisarnersugut siuliminnut sanilliullutik ilisimasaqannginnerungamik nutaanik apeqquteqarfigisarpaatigut. Taamaattuaannassaaq, Jens R. Lauridsen oqarpoq.
Allat taarserneqarmata illit taarserneqartariaqaraluannginnerit eqqarsaatigaajuk?
– Aap, Greenland Airportsimut suli tunniussassaqarnerlunga eqqarsaatersuutigaara. Atorfimmi uanga akisussaaffigisanniissagaanni imminut taamatut ilaatigut aperisinnaasariaqarpoq.
– Paasivara Greenland Airportsip kissaatigisattut inissisimalernissaanut suli piumassuseqarlungalu kissaateqarlunga, immaqalu aamma pisussaaffeqarlunga, Jens R. Lauridsen oqarpoq.
Paasissutissiissoqarumaartoq Nuup mittarfiata ukiumik ataasinngortorsiornerani Air Greenlandip timmisartuminik Dash 8-nik tamakkiisumik angallassisaqqilernissaa Greenland Airportsip unammilligassaani annerpaagunarpoq.
Angallannermut Aqutsisoqarfiup Nuummi timmisartuussinerit nalunaaquttap akunneranut amerlassusaannik killilersuinera nunap iluani angallannermik annertuumik eqquivoq. Tamanna aaqqiissutissarsineqassaaq, immaqa Nuummi timmisartunik aqutsisunik atorfinitsitsinikkut timmisartuussisinnaanerit amerlineqarsinnaalissallutik. Aalajangiinissamik suliaqarneq eqqarsaatigalugu oqaloqatigiinnerit isumaqatigiinniarnerillu matoqqasumik ingerlanneqartariaqartut, Greenland Airportsimiit isumaqarput.
- Paasissutissaateqalerutta paasitinneqarumaarpusi, Jens R. Lauridsen oqarpoq.
Pisortaaneq Angallannermut Aqutsisoqarfimmik aamma Greenland Airportsimi ataatsimiititaliat ilaannik apersuinitta kingorna ataatsimeeqateqarsimavoq. Jens R. Lauridsenip siulersuisut ataatsimiinnissaat piareersassavaa, kiisalu timmisartorsuup Atlantikoq qulaallugu mittup siulliup tallimanngornermi novembarip 28-ani ukiup ataasinngortorsiornera kaffillerutigineqassalluni.
Tamatuma saniatigut aappaagu sapaatip-akunnerini arlalinni Qaqortumiinnissaq pilersaarusiorpaa, tassani mittarfiup pilersaarutit malillugit apriilip 16-ani 2026-mi ammarnissaanut peqataassalluni. Kingorna Ilulissani aamma taamatut.
Sulinngikkaangavit sulkerisarpit?
- Aap, suliffiga initusaqaaq. Ilaannikkulli allaanerulluinnartunik suliaqarnissara pisariaqartittarpara. Ingammik ukioq manna aqqusaakkagut eqqarsaatigissagaanni, Jens R. Lauridsen oqarpoq.
- Sapaatip-akunneranut ataasiarlunga saunaguseriartarpunga. Tassani qasuersaartarpunga, mobilera qimallugu tassani qasukkarsimaarnissara kisiat eqqarsaatigisarpara.
