Naalakkersuisoqarfiit, suliffeqarfiit kattufiillu nalunaaquttap allanngornerata kingunerisinnaasaannik tikkuussipput

Nalunaaqutaq UTC-3-mut utertinneqassanersoq aasaaneranilu nalunaaqutaq atorunnaarsinneqassanersoq, Inatsisartut pingasunngornermi aalajangissavaat.

Nalunaaqutaq UTC-3-mut utertinnissaanut siunnersuut aappassaaneerneqarnerani, Inatsisartunut ilaasortanit 31-usunit 18-it marlunngormat oktobarip 13-ianni inatsisartuni akueraat.

Siumut Naleqqallu piffissap aalajangersarneqarnissaanut inatsisissatut siunnersuuteqarput. Inatsisissatut siunnersuutit taakku marluk tusarniaassutigineqarput, namminersorlutik oqartussanilu naalakkersuisoqarfiit suliffeqarfiillu kattuffiillu innuttaasullu tusarniaanermut akissuteqarput.

Amerlanerit allannguutissaq iluarinngilaat, amerlanngitsullu tamanna isumalluarnartippaat.

Niuernermut sunniuteqarumaarnera pissutigalugu suliffeqarfiit arfinillit, naalakkersuisoqarfiit arfinillit kattuffiillu pingasut piffissap allanngortinneqarnissaanut akerliullutik oqariartuuteqarput.

Piffissap allanngortinneqarnissaanut tunngavilersuutit pingaartumik marlunnik tunngaveqarput: innuttaasut atugarissaarnissaat aamma aalisartut piniartullu sulisarnerat. Allannguutit peqqissutsimut annikitsumik iluaqutaasinnaasut Nunatta Nakorsaaneqarfia oqarpoq, KNAPK-li tusarniaanermut akissuteqanngilaq.

Apeqqummut tamatumunnga akissutit uani atuakkit.

Naalakkersuisoqarfiit

Naalakkersuisoqarfiit arfineq-marluk tusarniaanermut akissuteqarput, taakkualu ilaat sisamat allapput nalunaaquttap UTC-3-mut utertinnissaa aasaaneranilu nalunaaqutaq atorunnaarsinnissaa akerleraat, isumaqarlutillu nalunaaquttap allanngortinneqarneranit piffissaq sivikippallaartoq.

Aningaasaqarnermut Akileraartarnermullu Naalakkersuisoqarfik, Naalakkersuisut Siulittaasuata Naalakkersuisoqarfia, Inuussutissarsiornermut, Aatsitassanut, Nukissiuuteqarnermut, Inatsisinik Atuutsitsinermut Naligiissitaanermullu Naalakkersuisoqarfik, Ineqarnermut, Attaveqaqatigiinnermut Nunallu immikkoortuinut Naalakkersuisoqarfik, Aalisarnermut Piniarnermullu Naalakkersuisoqarfik aamma Peqqissutsimut Innarluutilinnut Naalakkersuisoqarfik tamarmik nalunaaquttap allanngornerata kingunerisinnaasai ajortut tikkuarpaat.

Piffissap aalajangersarneranik inatsimmik allannguikulasarneq, Naalakkersuisut siulittaasoqarfiata mianersoqqussutigaa. Angalanermi piffissamut aalajangersakkanut malittarisassat, angalanermut, angallannermut niuernermullu nunat akornanni pingaaruteqarput. Nunat piffissap aalajangersarneqarneranik ukiualuit allorlugit aaqqiisarpara, qulaani taaneqartut isumannaatsumik ingerlanneqarsinnaanissai ajornakusuulissapput.

"Naalakkersuisoqarfik isumaqarpoq tamatumunnga taarsiullugu allannguutissatut siunnersuutigineqartup kingunerisassaasa nalilersorneqarnissaat pingaaruteqartoq. Tamatumunnga atatillugu Naalakkersuisoqarfiup oqaatigaa allannguutissatut siunnersuutigineqartup suut tamaasa eqqarsaatigalugit Kalaallit Nunaanni Europamilu suliffeqarfiit allaffeqarfiillu akornanni suleqatigiinnissamut periarfissanut akornutaassasoq." UTC-3-mut nuunnissaq Nunatta Karsianut sunniuteqarnerlukkumaartoq, Aningaasaqarnermut Akileraartarnermullu Naalakkersuisoqarfik tusarniaanermut akissummini allappoq.

UTC-3-mut nuunnerup kingunerisaanik Danmarkimi kalaallit napparsimasut angerlarsimaffiat aamma Danmarkimi napparsimmaviit peqqinnissaqarfiillu suleqatigineqartut akunnermik ataatsimik suleqatigiissinnaanerannik ilanngarneqassasoq, Peqqissutsimut Innarluutilinnut Naalakkersuisoqarfik allappoq. Tamanna Kalaallit Nunaanni peqqinnissaqarfiup nunanilu allani suleqataasut akornanni pisariaqartinneqarluinnartumik suleqatigiissinnaanerat maannakkut pingaaruteqarpoq.

Niuernerup silarsuaa akerliuvoq

AAMMA ATUARUK

Air Greenland nalunaaquttap-akunneri pillugit: Aasaanerani timmisartuussisarnivut ajorsiartuinnassapput

Suliffeqarfiit arfineq-marluk tusarniaanermut akissuteqaamminni nalunaaquttap allanngortinnissaanut akerliunertik ersersippaat, tamanna Danmarkip Europallu nalunaaqutaat ungasinnerulernissaat, Danmarkimillu niuernikkut suleqateqarnissamut periarfissanut sunniuteqarnerlussinnaanerat oqariartuutigaat.

Suliffeqarfiit malunnaateqarnerpaartaat tassaagunarpoq Air Greenland, Sermitsiamut arlaleriarluni apersorneqarnermini nassuiaasarpoq piffissap aalajangersarneqarneranik allannguineq qanoq kinguneqassanersoq. Naleqqap siunnersuutaanut tusarniaanermut akissumminni allapput piffissaq UTC-3-mut utertinneqarpat millionilikkuutaanik tamanna annaasaqaataajumaartoq.

Air Greenlandip saniatigut Tusass, Visit Greenland, Greenland Airports, Bankivik, GrønlandsBanken aamma Modulo ApS tusarniaanermut akissuteqarput.

“Danskit akiliinermut systemii (soorlu ass. Nets) nunatsinni ullormi suliffiusartumiit matujaarnerusarput. Kukkusoqarsimatillugu Bankivik aaqqiissuteqarnissaminut periarfissai akunnermik ataatsimik sivikinnerulissaaq, kingunerisinnaallugulu akissarsiat aatsaat aningaaseriviup ullormi ammaffissaani tullermi tunniunneqarsinnaalernerat”, Bankivik allappoq.

Visit Greenlandip aamma piffissap ingerlaaqatigiiffiisa allanngortinnissaa aamma mianersoqqussutigaa:

"Takornarialerineq siunissamut ungasinnerusumut isigaluni suliffeqarfiuvoq, tassani angalanissat qaammatinik ukiunilluunniit arlalinnik sioqqutsilluni pilersaarusiorneqartarlutik. Pilerinarsaaniaraanni tikeraallu paariinnarnissaannut uagut tikitassatut aalaakkaasuulluta, tatiginarluta qularnaatsuunissarput apeqqutaalluinnarpoq. Nalunaaquttap nikisittarnerata aalajangersarneqarneratuulli pingaaruteqartigisunik allannguisaqattaarnerup taamatut aalaakkaasuunissaagaluaq tunngaviatigut qajannarsisissavaa Kalaallit Nunaatalu angalalluni ornitassagut pilerinartutut tikikkuminartutullu inissisimaneranut ajoqusiisinnaalluni.“

Kattuffiit

Kattuffiit pingasut allannguutissaq mianersoqqussutigalugu tusarniaanermut akissuteqaateqarput.

Sulisitsisut allapput nunatsinni inuussutissarsiorneq tamarmi maannakkut nalunaaquttap-akunneranut naleqqussartoq. Tamanna suliffeqarfiit assigiinngitsut akornanni pilersaarusiornermut annertuumik iluaqutaavoq, aamma piffissap allanngortinneqarnissaa aalisakkanik avammut niuernermut, timmisartuussinernut takornariartitsinermullu kingunerlukkumaartoq allapput.

"Kingullermillu taasaq immikkut erseqqissarneqartariaqarpoq; nunattami takornarialerisoqarnera allisassagutsigu, pingaartutut isaatitsissutissanngortillugu, taava nunarput sooq tikikkuminaannerusunngorsarneqassava?“ GE allappoq.

Sulisitsisut aamma suliffeqarfinnit kattuffinnillu 40-nit amerlanerusunit – ilaatigut Blue Waterimit, Polar Seafoodimit Pisiffimmillu – allakkatigut ernumassuteqalersitsisumik atsiornernik katersipput.

“Nalunaaquttap siunnersuutigineqartutut UTC -3-mut utertinneqarnissaa akuerineqassappat, taava suleriutsit tunngaviulersullu iluini allannguutit atorneqalereernikuusut allanngortinneqaannaratik aammali teknikikkut allannguinermut atatillugu aaqqissuussaasut allanngortinneqaqqittariaqalernissaat millionerpassuarnik akeqartussaassapput isumaqatigiissusiaasullu isumaqatigiissusiaasinnaalersussaagaluillu aningaasatigut annertoqisunik annaasaqarfiussapput, aningaasartuuteqarfigalugillu pilersinneqarnikut siunissaq isigalugu UTC -2 -mut ikaarsaartoqarnera tatigalugu atorneqarsimasut. Tamakku tamarmik toqqaannartumik inuiaqatigiinnut aningaasartuuterpassuarnik malitseqassapput.” Ernumassuteqarnermi allassimavoq.

Timersoqatigiit Kattuffianni erseqqissarneqarpoq ukiukkut ualinerani nalunaaquttap akunneranik ataatsimik qaamanerusalernera, timigissarnermut nalunaaquttap akunnera ataaseq atorneqarluarsinnaanera, iluaqutaasoq.

Nalunaaquttap akunnermik ataatsimik kinguartinnissaa akerleralugu, aasaaneranili nalunaaqutaq atorunnaarsinneqarnissaa tapersersorlugu, SIK allappoq.

Nunatta Nakorsaaneqarfia

Soorlu oqaatigineqareersoq inuit peqqissusaat piffissap allanngortinneqarneranut aasaaneranilu nalunaaquttap atorunnaarsinneqarnissaanut tunngavilersuutit ilagaat. Qanorli iluaqutaassava?

AAMMA ATUARUK

Ullaakkut qaammartarnera sinittarnitsinnut pingaaruteqarpoq - peqqissutsitsinnullu

Nunatta Nakorsaaneqarfia tusarniaanermut akissummini allappoq nunani tamalaani misissuinerit arlallit takutikkaat aasaanerani nalunaaqutaqarneq peqqissutsimut sivikitsumik sunniuteqarsinnaasoq, soorlu sinissaarutsitsisinnaalluni aamma ullup unnuallu ingerlaneranik allanngortitsisinnaasarluni.

Misissuinerilli arlallit periaatsimikkut killeqarneri pissutigalugit peqqissutsimut qanoq sunniuteqartarnersoq oqaatigiuminaatsinneqarpoq.

Aamma piffissap allanngoriartorneranut tunngatillugu nunanit tamalaanit misissuinerit arlallit, soorlu sininnermut, ilinniarnermut peqqissutsimullu tunngasut ilaat eqqarsaatigalugit, sumiiffimmik aalajangersimasumik piffissamik nikisitsineq misissorsimavaat.

Taakkua ilaasa takutippaat seqernup nalunaaquttallu akunnerisa assigiinngissutaat peqqissutsimut sunniuteqarsinnaasoq, tamannali Kalaallit Nunaanni pissutsinut nalinginnaasumik atuutilersikkuminaappoq, nakorsaaneqarfik allappoq.

"Inatsisissatut siunnersuummik tusarniaanermut akissummini Nakorsaaneqarfiup nalilerpaa pissusissamisoortoq naatsorsuutigissallugu aasaanerani nalunaaquttap – taamalu aamma ukiup affakkaartumik nalunaaquttap – allanngortinneqartarnera innuttaasut sinittarnerannut taamatullu aamma ullup unnuallu ingerlasarneranut ajunngitsumik sunniuteqarsinnaasut, peqqissutsikkullu sunniuteqassappata taakku killeqassagunarlutik.“

Innuttaasut

Naleqqap Siumullu siunnersuutaannut tusarniaanermi innuttaasut 46-t akissuteqarput, tamarmik UTC-3-mut allanngortitsinissaq aasaaneranilu nalunaaqutaq atorunnaarsinnissaa iluarisimaarpaat.

AAMMA ATUAKKAT

4.000-nit amerlanerusut piffissap immikkoortuanut pisoqqamut uteqqikkusupput

"Nalunaaquttap aalajangersarneqarnera nunagisami ullup ingerlarnganut sapinngisamik naapertuunnerpaaffissaminiitinneqassaaq: Seqineq qaqugukkut nuisarnersoq seqinerlu qaqugukkut tarrittarnersoq, kiisalu seqernup pullasinnerpaaffiani nalunaaqutaq ullup qeqqartartoq. Nunarsuup sinnerani taamaannerusarput taamaattumik Kalaallit Nunaanni aamma taamaattariaqaraluarpoq," Søren Hald Møller Nuummiu tusarniaanermut akissummi taama allappoq.

Taatsi Fleischer aamma atsiornernik katersuiniarpoq, 4230-llu tamarmik nalunaaqutaq UTC-3-mut uterteqqikkusullugu aasaaneranilu nalunaaqutaq atorunnaarsikkumallugu, maanna atsiorsimalereerput.

Nittartakkatigut isummanik siammarterisartoq siusinnerusukkullu politikkeriusoq Qupanuk Olsen assingusumik atsiornernik 2024-mi katersuivoq, atsiortullu 2700-t missaanniipput.

Tusarniaanermi akissuteqartut arlallit tikkuarpaat nittartakkatigut atsiornernik katersineq tamanut naleqqutinngitsoq, aamma atsiorsimasut tamarmik Kalaallit Nunaanni qinersisinnaatitaanerat qulakkeerneqarsinnaanngitsoq.

Inatsisartut piffissaq qanoq iliuuseqarfigissanerlugu inaarutaasumik pingasunngornermi aalajangiiffigissavaat.