Air Greenland nalunaaquttap-akunneri pillugit: Aasaanerani timmisartuussisarnivut ajorsiartuinnassapput

Inatsisartut Inatsisinut Atuutsitsinermut Ataatsimiisitaliaata aasaanerani nalunaaqutaq aappaagu atorunnaarsinniarlugulu 2028-mi UTC-3-mut utertinniarpaa.

AAMMA ATUARUK

Jacob Nitter Sørensen: Europamiit akunnernik pingasunik kingulliuneq iluaqutissaqartorujussuuvoq

Niuernerup Europamut niueqateqarnissamut ullormut akunnermik ataatsimik sivisunerusumik piffissaqarnissaa, 2023-mi nalunaaquttap UTC-2-mut nuunnissaanut tunngavilersuutigineqartut pingaarnerit ilagaat.

Air Greenlandimut piffissap allanngornera immikkut ittumik periarfissaqalersitsivoq maanna annaaneqarsinnaasumik.

- Europamut akunnerit pingasut taakku, pingaaruteqarluinnarput unnukkut ullakkullu timmisartuussisarnissamut, tamannalu annertuumik iluatsilluarpoq. Takornariartitsinermillu inuussutissarsiornermillu allarpassuarnillu ineriartortitseqataallunilu, Air Greenlandip pisortaanera Jacob Nitter Sørensen oqarpoq.

Taassuma innersuuppaa Air Greenlandip Københavnimiit timmisartup kingusissukkut aallartarnera, Nuummilu unnuisinnarluni aqaguani ullaakkut utertartoq.

Tamamassuma anguneqarsinnaaneranut pissutaavoq nalunaaquttap ingerlaaqatigiiffiini pingasuni angalaneq nunap iluani timmisartornerit isigineqartarmat, nalunaaquttap ingerlaaqatigiiffii pingasut qaangerneqarpata ungasissumut timmisartuussinertut isigineqartarpoq. Timmisartumik sulisut piffissamik qasuersaarfissaannik tamanna sunniuteqarpoq.

Timmisartornissamut nalunaaquttap-akunnerinik pingasunik nikingassuteqarpata, Kalaallit Nunaanni nalunaaquttap-akunneri qulit Danmarkimilu nalunaaquttap-akunneri aqqaneq-marluk qasuersaartariaqarput.

Amerikamut aqqut ajornarsisinneqarpoq

Nalunaaquttat ingerlaaqatigiinneri allanngortinneqarpata, Nuummi nunat tamalaat akornanni timmisartumi sulisunik inuttaliinissaq, Air Greenlandip sivitsortumik pilersaarutigaa piviusunngortinneqarsinnaanngilaq.

- Piffissap nikinganerata kingunerisaanik sivisuumik qasuersaartariaqassapput, Nuummi inuttanut inissiisarfeqarnissaq ajornakusoorsinnaavoq. Taamaattumik Amerikamut avannarlermut angalasinnaaneq ajornakusuulersinnaavoq, immaqaluunniit ajornarluinnassalluni, Jacob Nitter Sørensen oqarpoq.

Timmisartortitseqatigiiffiup Amerikamut avannarlermut timmisartuussisarnissaq anguniagaraa, Københavnimi inuttat unnukkut angalasut Nuummi unnuisarput. Nuummilu inuttat nutaat Amerikamut avannarlermut aqaguanilu uternissamut piareersimatinneqartassapput. Inuttat Københavnimeersut unnuakukkut Danmarkimut utertinniarneqartarput. Tamannali aatsaat pisinnaassaaq Kalaallit Nunaata Danmarkillu akornanni aqqut najukkami timmisartuussinermi qasuersaarfimmut atatillugu aalajangersakkat atuukkallarnerani.

Timmisartuussinerit maannamut unnukkut ullaakkulluunniit pissutigalugit, Europami nunanut assigiinngitsunut ullormilu tamatumani angalasoqarsinnaasimavoq. Jacob Nitter Sørensenilu oqarpoq Københavnimi unnuinissaq pilersaarusiussagaanni ilaasut allamik toqqaanissaat ilimanaateqartoq – ernumarujussuanngilarli.

- Inuit timmisartortarunnaarnissaat, immaqaluunniit timmisartortuarnissaat piffissap kisimi takutikkumaarpaa

- Kalaallit Nunaannut timmisartuussisarnerit maannakkutut piumaneqartigippat, ernumaginngilara.

Putsumik annertuumik sunnerneqarneq

Kalaallit Nunaanni aasaanerani nalunaaqutaq atorunnaarpat, EU-mili suli atuuttoq, Kalaallit Nunaata Danmarkillu akornanni piffissaq ukiup affaani ataasiarluni nikerartartussaavoq.

Aasakkut Kalaallit Nunaat Danmarkimut Europallu kitaanut sanilliullugu nalunaaquttap-akunnerini tallimani nikingasassaaq, ukiukkullu nalunaaquttap-akunnerini sisamani.

Ullulli assigiinngissutaat allaffissornikkut unamminarsinnaavoq, aasallu ingerlanerani piffissap assigiinngissutaa Air Greenlandimut ajornartorsiutaanerpaassaaq, Jacob Nitter Sørensen oqarpoq.

Timmisartoq Københavnimiit nalunaaqutaq qulingiluanut aallartartussaappat, nalunaaquttap akunnerinik tallimanik siusinnerusukkut Kalaallit Nunaannut tikissaaq, tamannalu aasaanerani timmisartuussinissamut pilersaarutinut ajoqutaassasoq, Jacob Nitter Sørensen oqarpoq:

- Aasakkut ullaaralaakkut makittariaqartalissaagut, taamaalillutalu putsumik sunnerneqartalissalluta. Taamaammat oqartoqarsinnaavoq allatut ajornartumik kingusinnerusukkut Københavnimiit, aallartariaqalissasugut. Tamannali aamma isumaqarpoq kingusissukkut Københavnimut tikittalerumaarnermik.

Inatsisartut piffissamik aalajangersaanermut siunnersuutit marlunngornermi oktobarip 13-ianni oqaluuserissavaat. Inatsisinillu Atuutsitsinermut Ataatsimiisitaliap allannguutissatut siunnersuutaat akuerineqassanersoq piffissap kisimi takutikkumaarpaa.