Naleraq Naalakkersuisut angalanerinut: Innuttaasunut iluaqutaanngillat

Naalakkersuisunut ilaasortat naalakkersuisoqatigiit maanna atuuttut pilersinnerannit, ukioq manna juunip naanissaanut, tassa qaammatini 14-ini angalaneranni aningaasartuutit 10.4 millionit koruningajalluinnaapput. Tamanna Sermitsiap naalakkersuisoqarfinnut tamanut allagaatinik noqqaassutaani takuneqarsinnaavoq.

AAMMA ATUARUK:

Naalakkersuisut ilaat 8,9 millioninik atuillutik angalasut

Angalasarnerit tunngaviatigut pisariaqartartut, Inatsisartuni partiit illuatungiliuttut annersaanni, Naleqqami siulittaasup, Pele Brobergip, nalunagu Sermitsiamut oqaatigaa. Taamaattorli Naalakkersuisut maanna angalasimaneri innuttaasunut iluaqutaasimanngitsutut taassuma nalilerpai.

- Angalaqattaarsimanerit inuit ulluinnarsiutaannut qanoq iluaqutaasimanersut takusinnaanngilakka. 

- Illersorsinnaanngilara oqassallunga ukua angalaqattaarnerit innuttaasut iluaqutigisimagaat. Taamaammat akisugisassaapput, soorunami, Pele Broberg Sermitsiamut oqarpoq.

Taama oqarnera Naalakkersuisut Siulittaasuata, Jens Frederik Nielsenip (D), Sermitsiamut allakkatigut akissutaata akerlerluinnaraa. Angalanitimmi akisugisassaagaluarlutik innuttaasunut iluaqutaasutut, Naalakkersuisut Siulittaasuata siusinnerusukkut Sermitsiamut akissutigaa.

AAMMA ATUARUK:

Naalakkersuisut Siulittaasuat angalanermini 18-ini millionit sinnerlugit aningaasartortoq

- Annertusutut isigineqarsinnaapput kisiat pisariaqavissuusut isumaqarpunga, ingammik piffissami matumani pisariaqavippoq iligut naapissagigut oqaloqatigalugit pilersaarusioqatigalugillu.

- Assersuutigalugu Qallunaat nunaannut isumaqatigiissusiornermi Ittoqqortoormiuni mittarfik, kujataani talittarfik aammalu peqqinnissaqarfimmut pitsanngorsaatit annertuut anguangut. Aningaasarpassuit milliard-it pissarsiaraagut, Jens Frederik Nielsen Sermitsiamut siusinnerusukkut allappoq.

Naalakkersuisut Siulittaasuata taama allannermini ilaatigut innersuussutigisaa tassaavoq, Danmarkip kalaallinut Danmarkimut peqqissariartunut akiliisartussanngornera pillugu isumaqatigiissut. Tamanna Kalaallit Nunaata nunap karsianit ukiumut 130 millionit koruunit missaat atorlugit akilertaraluarpaa.

Tunngavilersuut tupaallaatigigaa

Naalakkersuisut Siulittaasuata tunngavilersuutai tupaallannartuusut, Pele Broberg oqarpoq. Taanna isumaqarpoq, angalanerit nunap karsiata aningaasaateqarnerulerneranik kinguneqanngitsut. Taassuma Kalaallit Nunaanni inuuniarnerup ukiuni tulliuttuni akisunerulertussaaneranut suliniutaasut innersuussutigai:

- Ataasinnguamilluunniit koruunimik taakkunannga (milliardit, aaqq.) takusaqarnikuunngilagut. Ineqarneq naalakkersuisoqatigiit suli 75 procentimik akitsorniarpaat, kallerup innera 22,5 procentimik ukiuni marlunni tulliuttuni akitsorniarpaat. Suna tamaat akitsoriartortippaat taamaammat ilumuunngiivissorpoq pissarsiaqarsimasut inuiaat kalaallit, Pele Broberg oqarpoq.