Naalakkersuisoqatigiit siorna marsip 28-anni inuttalersorneqarput. Taassuma kingorna angalanerit amerlasuut pipput.
Sermitsiap angalanernit aningaasartuutit ukioq manna juunip naanera ilanngullugu pisut naalakkersuisoqarfinnut tamanut noqqaassutigai. Akissutit amerlanersaat maanna pissarsiarineqareerput.
Naalakkersuisut Siulittaasuata Naalakkersuisoqarfia qanoq aningaasartorsimatiginerminnik maannammut suli nassiussinngilaq. Allagaatinilli nassiussiumaarnertik neriorsuutigalugu ilisimatitsipput.
Allagaatinik noqqaanermi angalanermut billetsit, ullormusiat, nerisaqarnerit, unnuinerit, taxanut ilaanerit, bilinik attartornerit, ataatsimiiffinnik attartornerit allallu angalanermi aningaasartuutaasut tamarmik pineqarput. Atorfilittat ilaappata taakkununnga aningaasartuutit aamma ilanngullugit.
Naalakkersuisunut ilaasortat, Naalakkersuisut Siulittaasuat, Jens-Frederik Nielsen (D) pinnagu, piffissami pineqartumi 8.974.810,24 koruunit atorlugit angalapput. Tassa 9 millionit koruuningajalluinnaat.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D) Naalakkersuisutut siorna atuutilernerminit Naalakkersuisunut ilaasortaqatiminit allanit amerlanerpaariarluni angalasoq, allagaatit misissorneranni paasinarsivoq. Nivi Olsen piffissami pineqartumi 18-riarluni angalavoq. Angalanerni taakkunani 1.592.777,55 koruunit akileraartartut aningaasaataannit akilerneqarput.
Sermitsiap Nivi Olsen sooq taama angalatigisimanersoq tamannalu inuiaqatigiit qanoq iluaqutigissaneraat pillugu aperaa. Naalakkersuisup Sermitsiamut allakkatigut akissummini sumi sunalu siunertaralugu angalasarsimanerluni ilaatigut allappoq. Taakkulu kinguneqarluartutut nalilerpai.
- Piffissami pineqartumi sulinermut atatillugu angalanernut atorneqarsimasut, katillugit 1,6 mio. koruunit missaat, massakkumut isumaqatigiissutinut aalajangersimasunut, aningaasatigut tapiissutinut kiisalu Kalaallit Nunaannut iluaqutaasumik suleqatigiinnernik nukittorsaanernut kinguneqareersimapput.
- Taamaattumik naliliivunga angalanerit pisariaqartuusimasut aammalu nunatsinnut naleqarluartumik iluaqutaasimasut, Nivi Olsen allappoq.
Taassuma angalanermut aningaasartuutini Inatsisartut inatsisaanni aningaasaliissutit iluanni pinerat erseqqissaatigaa.
USA-mut angalaneq akisooq
USA-p præsidentiata, Donald Trumpip Kalaallit Nunaat aqukkusullugu arlaleriarluni oqaaseqartareerpoq. Nunanut allanut Naalakkersuisuusimasoq, Vivian Motzfeldt (D), Kalaallit Nunaata tatineqarnerani USA-mut Danmark peqatigalugu januaarimi isumaqatigiinniariartorpoq suleqatigiissitamik pilersitsinermik kinguneqartumik. Angalaneq taanna 457.643,18 koruuninik akeqarpoq. Atorfilittat sisamat angalaqataapput.
Nunanut allanut Naalakkersuisoqarfik ukioq ataaseq sinnilaarlugu angalanernut aqqanilinnut katillugit 1.619.102,67 koruuninik aningaasartuuteqarpoq. Taakkunani USA-mut ataatsimeeqateqariartorluni angalaneq akisunerpaavoq.
Angalaneq ataaseq 700.000 koruunilik
Angalanerit ataasiakkaassagaanni angalanerit akisunersaat tassaavoq Aatsitassanut Inuussutissarsiornermullu Naalakkersuusimasup, maanna danskit inatsisiliortuinut, Folketingemut, ilaasortaasup, Naaja H. Nathanielsenip (IA), atorfilittani tallimat peqatigalugit nunarsuaq tamakkerlugu aatsitassarsiorneq pillugu saqqummersitsivissuit anginerpaat ilaannut, PDAC-imut, Canadami Torontomi angalanera ullunik arfinilinnik sivisussuseqartoq.
Angalaneq taanna katillugu 695.699 koruuninik akeqarpoq.
Naalakkersuisoqarfiup taassuma, tassa Inuussutissarsiornermut, Aatsitassanut, Nukissiuutinut, Inatsisit Atuutsinneqarnerannut Naligiissitaanermullu Naalakkersuisoqarfiup angalanernut 14-nut aningaasartuutai katillugit 1.388.878 koruuniupput. Taakkunannga angalanernut aningaasartuutit affaasa missaat, Canadami Torontomut angalanermut atorneqarput.
Peter Borg apeqqutinut akinngitsoq
Naalakkersuisoq millionit sinnerlugit angalasoq kingulleq tassaavoq, Aalisarnermut Piniarnermut Nunalerinermut Imminullu Pilersornermut Naalakkersuisoq, Peter Borg (D). Taanna Naalakkersuisoqarfimmi ataani quleriarluni angalanermini 1.160.336,91 koruuninik aningaasartorpoq.
Taassuma taama aningaasartornini qanoq illersorsinnaaneraa angalanerillu innuttaasut qanoq iluaqutigissaneraat Sermitsiap aamma aperaa. Saaffiginnissulli naalakkersuisumit qisuariarfigineqanngilaq.
Angalanerni qulaani pineqartuni, tassa naalakkersuisoqarfinni sisamaneersuni, nunat, illoqarfiit savaateqarfiillu ilaatigut makkua tikinneqarput: Kuopio, København, Kittilä, Qaqortoq, Narsaq, Nanortalik, Ilulissat, Aalborg, Toronto, Boston, Aruba, Qaanaaq, Sisimiut, Helsinki, Kangerlussuaq, Akureyri, Reykjavik, Brussels, Tromsø, Paris, Torshavn, New York, Berlin, Rom, Helsingborg, Paamiut, Upernaviarsuk, Narsarsuaq, Milano aamma Whitehorse.
Millionit inulaarlugit
Naalakkersuisunut ilaasortat ilaasortaasarsimasullu sinneri tamarmik angalanermut aningaasartuutaat millionit inorpaat. Naalakkersuisoqarfilli ataaseq millioningajalluinnarnik aningaasartuuteqarpoq.
Attaveqaasersuutinut, Ineqarnermut Isorliunerusunut Upalungaarsimanermullu Naalakkersuisoqarfik siorna naalakkersuisunngortitseqqaarnermit maannamut marlunnik akisussaaffigineqarpoq. Aallaqqaammut Aqqaluaq B. Egede (IA), Iddimanngiiu Jensen Bianco (IA), upernaaq manna tassani akisussaasuulerpoq.
Taakkua katillugit quleriarlutik angalanerat 920.723 koruuninik akeqarpoq. Taakkunannga 845.881 koruunit Aqqaluaq B. Egedep atorfilittaasalu arfineq pingasoriarlutik angalanerannut akiliutaapput. Taakkua angalanerit tamarmik Kalaallit Nunaanni, Danmarkimi Norgemilu pipput.
Angalanerit sinneri
Meeqqanut Inuusuttunut Ilaqutariinnullu Naalakkersuisoqarfik piffissami pineqartumi sivisunerpaamik Mads Pedersen (IA), akisussaaffigineqarpoq. Taassuma nammineq toqqakkaminik tunuarnerata kingorna Nivi Olsen akisussaasuugallareersoq Mariane Paviasen Jensen (IA) naalakkersuisut atuutilerpoq. Inuit taakkua pingasut angalaneranni angalanerit qulingiluaapput. Aningaasat 744.576,25 koruunit atorneqarput.
Aningaasaqarnermut Akileraartarnermullu Naalakkersuisoqarfik piffissami pineqartumi Múte Bourup Egedemit (IA) kingornalu Aqqaluaq B. Egedemit akisussaaffigineqarpoq. Angalanerni arfineq-pingasuni aningaasat 498.137 koruunit atorneqarput.
Isumaginninnermut Suliffeqarnermullu Naalakkersuisoqarfik Atassummeersunit marlunnit Naalakkersuisuuffigineqarpoq. Siullermik Bentiaraq Ottosen maannalu Maritha Broberg. Taakkua katillugit arfineq-marloriarlutik angalanerminni 425.788 koruuninik aningaasartorput.
Peqqissutsimut Inunnullu innarluutilinnut Naalakkersuisoq, Anna Wangenheim (D), Naalakkersuisunut ilaasortani qinigaaffik tamaat maannamut atuuttuni,S angalanernut aningaasartuutikinnersaavoq. Taanna arfinileriarluni angalanermini 350.360 koruuninik atuivoq.
Pinngortitamut Avatangiisinullu Naalakkersuisoqarfik ikinnerpaanik angalasimavoq. Angalanerit sisamat. Demokraatineersut naalakkersuisoqarfimmut tassunga akisussaasuusarput. Aallaqqaammut Peter Borg maannakkullu Jørgen Rosbach. Naalakkersuisoqarfiup angalanernut taakkununnga aningaasat 274.130,86 koruunit atorpai.
Angalanerit illersorai
Aningaasaqarnermut Naalakkersuisoq, Aqqaluaq B. Egede, Inatsisartut aningaasanut aappaagumut inatsisissaattut Naalakkersuisut siunnersuutaat sisamangornermi 20. august saqqummiukkamiuk Naalakkersuisunut ilaasortat angalasarneri arlaleriarlugit eqqaavai. Taassuma angalanerit pingaaruteqartuusut oqaatigisaqattaarpaa.
- Maluginiarparput Naalakkersuisut angalaneri inuiaqatigiinnit piffissami kingullermi qiviallakaaneqartut. Aningaasanik atuiffigineqarpallaartutut immaqa naqissuserniarneqartutut paasineqangajassinnaasumik oqallinnerit pisarput. Naalakkersuisunili sulinitsinni takusinnaavarput taamaaliunngikkutta (angalanngikkutta, aaqq.) navianartorujorujussuarmik inississalluta.
- Angalasariaqartarsimavugut ilaanni pilersaarutiginngisatsinnik. Ima pissutsit nikeriataartartigipput naalakkersuinikkut suliassat ilai tunulliullugit nunarsuarmi pissutsit, aaqqiiniapiloornerit, oqaloqateqartariaqapiloornerit, nunanik allanik ikiortissarsiornerit, ilissarsiornerit aammalu iligiit akornanni ikinngutigiinnerup patajaallisapallattariaqarneranik suliassanik assut takkuttoqaqattaarpoq, Aqqaluaq B. Egede, tusagassiortunut sisamanngornermi sassarnermini ilaatigut oqarpoq.
