Naalakkersuisut Siulittaasuat angalanermini 18-ini millionit sinnerlugit aningaasartortoq

Naalakkersuisut Siulittaasuat, Jens Frederik Nielsen (D), Naalakkersuisut Siulittaasuattut Inatsisartunut siorna qinersereernerup kingorna inissippoq. Taamanernit Naalakkersuisut Siulittaasuattut atuunnermini qaammatini 14-ini 18-riarluni angalavoq.

Naalakkersuisut Siulittaasuat angalanerni taakkunani 1.390.912,48 koruunit, akileraartartut aningaasaataat atorlugit angalavoq. Tamanna Sermitsiap, Naalakkersuisut Siulittaasuata Naalakkersuisoqarfianut allagaatinik noqqaassutigisaata akissutaani takuneqarsinnaavoq. 

Kisitsisit amerlasutut isigineqarsinnaasut angalanerilli pisariaqarluinnartuusut, Naalakkersuisut Siulittaasuat allappoq.

- Annertusutut isigineqarsinnaapput kisiat pisariaqavissuusut isumaqarpunga, ingammik piffissami matumani pisariaqavippoq iligut naapissagigut oqaloqatigalugit pilersaarusioqatigalugillu.

- Taamatuttaaq nunatsinni innuttaasut tikittariaqarpagut oqaloqatigalugillu. Taamaasiunngikkutta annaasaqassaagut sulinitsinni atorsinnaasatsinnik. Aamma nalunngilara innuttaasut Naalakkersuisunit tikinneqarnissartik ujartortaraat, Jens Frederik Nielsen (D) Sermitsiamut allakkatigut akissummini allappoq.

AAMMA ATUARUK:

Naalakkersuisut ilaat 8,9 millioninik atuillutik angalasut

Angalanerni taakkunani angalanerit marluk pillugit akiligassat suli akiligassiissutigineqanngitsut, naalakkersuisoqarfik ilisimatitsivoq. Taamaattumik Naalakkersuisut Siulittaasuata angalanerisa naligat kisitsisinit qulaani taaneqartunit akisunerunissaa naatsorsuutigineqarsinnaavoq.

Qeqertarsuarmit Strasbourgimut

Sermitsiap Naalakkersuisunit siorna ivertitsinermit ukioq manna juunip naanera tikillugu angalanernut aninagasartuutit noqqaassutiginikuuai. Allagaatinik noqqaanermi angalanermut billetsit, ullormusiat, nerisaqarnerit, unnuinerit, taxanut ilaanerit, bilinik attartornerit, ataatsimiiffinnik attartornerit allallu angalanermi aningaasartuutaasut tamarmik pineqarput. Atorfilittat ilaappata taakkununnga aningaasartuutit aamma ilanngullugit.

Naalakkersuisut Siulittaasuata angalanerini 18-ini angalanerit akisunersaat 167.159,42 koruuninik akeqarpoq. Angalaneq ullunik aqqanilinnik sivisussuseqarpoq. Angalanermi tassani København aamma Strasbourg tikinneqarput. Angalanermi tassani suliarineqartut tassaapput European Political Community-mut peqataaneq, danskit ministeriunerannik, Mette Frederiksenimik ataatsimeeqateqarneq, Folketingip ammaanersiorneqarneranut peqataaneq aamma Strasbourgimi Europa Parlamentimi oqalugiarneq. Angalanermi tassani naalakkersuisoqarfimmi pisortaq, pisortaq, naalakkersuisup allattaa naalakkersuisullu inooqataa angalaqataasut, allagaatini allaqqavoq.

Jens Frederik Nielsenip nunat illoqarfiillu angalanermi ilaatigut makkua tikippai: København, Tórshavn, Finland, Nice, Sisimiut, Qaqortoq, Strasbourg, Ilulissat, Qeqertarsuaq, Berlin, Paris, Maniitsoq aamma Kangerlussuaq. 

Siulittaasoq angalasarnini innuttaasunut iluaqutaalluartutS inerniliivoq. 

- Assersuutigalugu Qallunaat nunaannut isumaqatigiissusiornermi Ittoqqortoormiuni mittarfik, kujataani talittarfik aammalu peqqinnissaqarfimmut pitsanngorsaatit annertuut anguangut. Aningaasarpassuit milliard-it pissarsiaraagut.

- Taakkua saniatigut Franskillu geomappingimut isumaqatigiissuteqarpugut uatsinnut iluaqutaasussamik. EU-mi aamma angalalluta suleqatigiinneq nukittorsarparput, aningaasaliinissaallu aamma qulakkeerlugu, mia. kr. arlallit, Jens Frederik Nielsen allappoq.

10.4 millionit koruunit 

Sermitsiap qinigaaffimmi maanna atuuttumi Naalakkersuisunut ilaasortat sinnerisa angalanerinut aningaasartuutit Naalakkersuisoqarfinnit assigiinngitsunit siusinnerusukkut pissarsiarai. Naalakkersuisut Siulittaasuata angalaneranit aningaasartuutit ilanngullugit angalanerpassuit  10.365.722,72 koruuniupput. Tassa 10.4 millionit koruuningajalluinnaat. Tamannalu Naalakkersuisut Siulittaasuata ima illersorpaa:

- Aningaasartuutigut Aningaasanut inatsimiipput tamanit takuneqarsinnaapput, qassit illuartinneqarsimanersut, ukiullu kingulliit arlalippassuit tamanna allanngornikuunngilaq, nutaartaqanngilaq. Naalakkersuisunut sinaakkutit iluanni aqutsivugut, Jens Frederik Nielsen allappoq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D) Naalakkersuisutut siorna atuutilernerminit Naalakkersuisut Siulittaasuata amerlaqataanik angalavoq. Angalanerni taakkunani 1.592.777,55 koruunit akileraartartut aningaasaataannit akilerneqarput.

Nunanut Allanut Naalakkersuisoqarfik angalanernut aningaasartuuteqarnersaavoq. Angalanernut aqqanilinnut katillugit 1.619.102,67 koruuninik aningaasartuuteqarpoq.