NUTARTIGAQ: Nuup ungasinngisaani apummik sisoornermi ajutoortoqaqqittoq - inuusuttoq ajunaarpoq

Nuup tunuani arfininngornermi ualikkut apummik sisoortoqareersorlu annaassiniarnermik aallartittoqarpoq. Kalaallit Nunaata Politiivisa uppernarsarpaat inuit maannamut qassiunerinik ilisimaneqanngitsut – ilimagineqartorli sisamaasut – apummut matoorussaasimasut.

Nuummi nunataani apummik sisoortoqareernerani annaassiniaanermik aallartitsisoqarpoq.

Foto: Oscar Scott Carl

KASSAALUK KRISTENSEN KASSAALUK KRISTENSEN KASSAALUK KRISTENSEN Digitalredaktøri

Saqqummersinneqarpoq 4. Apriili 2026 - 17:14

Annonse

Nal 20:10 nutarterneqarpoq: Politiit nalunaarput angut 17-inik ukiulik apummik sisoortoqarnerani appussaanermi kingorna ajunaarsimasoq. Taanna napparsimmavimmut oqqunneqareernermini nal. 19.05 toqusutut nalunaarutigineqarpoq.

Angutit marluk allat napparsimmavimmukaanneqarputtaaq, inuunerminnilli ulorianartorsioratik.

Sisamaat ajoqusersimanngilaq. Ilaqutaasut kalerrinneqareerput.

Ajutoorfik Nuup ungasinngisaani ”Qassi”-imi pivoq.

Arfininngornermi ualikkut nal. 15.45 politiinut nalunaarutigineqarpoq apummik sisoortoqarnerani ajutoortoqarsimasoq. Kalaallit Nunaata Politiviini pigaartut pisortaata Karsten Højrup Kristensenip tamanna Sermitsiamut uppernarsarpaa.

- Maannamut ilisimanngilagut qassit apummit matoorussaasimanersut, tusakkagulli siulliit malillugit inuit sisamat maanna ujarpagut, pigaartut pisortaat Karsten Højrup Kristensen Sermitsiamut oqarpoq.

Taassuma ilisimatitsissutigaa annaassiniarnermik maanna aallartitsisoqarsimasoq, tassanilu Arktisk Kommando politiillu suleqatigiittut.

- Qulimiguulimmik aamma aallartitsisoqarpoq. Annaassiniarneq suli ingerlavoq. Maanna pinasuartumik suliaqarpugut, taamaattumik aamma annertunerusumik oqaaseqarsinnaanngikkallarpunga, oqarpoq.