Oqaluuserisassat pingaarnerit: Umiarsualiviit imminnut napatittut, inuit nalunaarsorsimaffiat cannabisillu inerteqqutaajunnaarnissaa

Inatsisartut apriilip 14-ianni upernaakkut ataatsimiissapput. Ataatsimiinneq sivisooq pilersaarutit naapertorlugit juunip 18-iata tungaanut ingerlasussaq.

Inatsisartuni ilaasortat oqaluuserisassaannut nutaanik 48-nik ilanngussisoqarsimavoq, Naalakkersuisut oqaluuserisassanngortitaat 33-it aamma 2025-mi ukiakkut ataatsimiinnermi oqaluuserisassat kinguartinneqartut 66-it oqaluuserineqassapput. Oqaluuserisassat katillugit 147-t, Inatsisartuni siulittaasoq Kim Kielsen tusagassiutitigut nalunaarummi allappoq.

Oqaluuserisassat ilaat Sermitsiamit misissorlugillu inatsisissatut siunnersuutit ilai pingaarnersiorneqarput.

Sikuki Nuuk Harbour nutaamik taaguuteqalissasoq

SIKUKI Nuuk Harbour nutaamik taaguuteqalissasoq Nuullu avataani umiarsualivissanik piginneqataanissamut ingerlatsisinnaanissamullu pisinnaatitaaffeqalissasoq Isumaginninnermut, Suliffeqarnermut, Ineqarnermut, Attaveqaqatigiinnermut Isorliunerusunullu Naalakkersuisup Aqqaluaq B. Egedep (IA) siunnersuutigaa.

Immaqa ilisarnarpoq. Oqaluuserisassaq tamanna 2025-mi ukiakkut ataatsimiinnermi oqaluuserineqartussatut pilersaarutigineqaraluarpoq, ullormili oqaluuserineqartussanngortumi nassuiaatissaqarani peerneqarpoq.

Maanna siunnersuutigineqaqqippoq. Maannakkorpiaq Namminersorlutik Oqartussat pigisaat Nuuk Sikuki Harbour Nuummiinnaq umiarsualivimmik ingerlatsivoq, inatsisissatulli siunnersuummi nunap sinnerani aamma taamaaliortoqarsinnaasoq piumasarineqarpoq.

Sikukip umiarsualiviit niuernermut atorsinnaanngorpagit taamaalilluni umiarsualivinnik ingerlatsineq aserfallatsaaliinerlu aningaasalersorneqarsinnaanngussapput.

Siunnersuummut tunngavilersuut naapertorlugu umiarsualiviit Namminersorlutik Oqartussanit pigineqartut 2021-mi aserfallatsaalineqarnissaannut 270 million koruuninik kinguaattoorfiupput. Nunatta karsia artukkerumanagu nunatta sinnerani umiarsualivinnik niuernikkut ingerlatsinissaq siunertaavoq.

"Sikuki Ports A/S-ip Nuup avataani umiarsualivinnik pisinissamut ingerlatsinissamullu inatsisitigut tunngavissinneqarnerani, Sikuki Ports A/S-ip umiarsualivinnik ingerlatsinermik misilittagaasa immikkullu ilisimasaasa tamanit iluaqutigineqarsinnaalernissaat iluaqutaassaaq. Iluaqutissaq taanna innuttaasunut tamanut iluaqutaasussaavoq.

Umiarsualiviit Namminersorlutik Oqartussanit pigineqartut toqqakkat Sikuki Ports A/S-imut tunniunneqarnerisigut aserfallatsaaliuinissamut kinguaattoorutit angummaffiusinnaapput, Sikuki-p umiarsualiviit toqqarneqartut niuernermik tunngaveqarluni ingerlassinnaammagit," taama allassimasoqarpoq.

Tamatuma saniatigut ingerlatseqatigiiffik Sikuki Ports A/S-imik taaguuteqalissaaq.

Oqaluuserisassaq taanna apriilip 30-ani ataatsimiinnermi siullermeerlugu oqaluuserineqassaaq.

Cannabis pinerluutigiunnaarli

Atassutip siulittaasua Aqqalu C. Jerimiassen aamma arlalinnik siunnersuuteqarpoq, ilaatigut cannabisip pinerluttuliornerunnginnissaanik.

- Inerteqqutaajunnaarsaaneq imerniartarfittut ittunik pisortat pigisaanniuppat, pisortalluunniit akuerisaannik ingerlanneqartunik pilersitsinikkut ingerlanneqarsinnaapput, taanna allappoq.

Nunami ikiaroornartunik atuinerup annertusinissaa siunertarineqanngitsoq — akerlianilli siunertaqartoqarpoq aalajangiiffigisassatut siunnersuummi erseqqissarpaa.

„Cannabis-imik inerteqqutaajunaarsaanikkut, sumiiffinnilu taamaallaat akuerisani atorneqarsinnaatinneratigut, aningaasat kaaviaartinneqartut katsorsaanernut peqqinnissaqarfiullu ingerlanneqarneranut toqqaannartumik kakkiunneqartariaqarput. Inerteqqutaajunnaarsitsinermi tassaasariaqarmata ikiaroornartumik atuinerup akiorniarneqarneratut isigisariaqartoq.

Sumiiffinnit allanit cannabisimik inerteqqutaajunnaarsitsisunit paasissutissat takutikkaat ikiaroornartunut tunngasunik pinerluttoqarpallaarunnaartoq ikiaroornartullu sakkortuut annikilliartortut Aqqalu C. Jerimiassenip tikkuarpaa.

Oqaluuserisassaq ataatsimiittarfimmi maajip arfernani siullermeerluni oqaluuserineqassaaq.

Kalaallit Nunaanni nunap inoqqaavinik nalunaarsuineq

Oqaluuserisassani 147-ni Naleqqamit 41-t siunnersuutigineqarput.

Siunnersuutit ilaat ilisimaneqarluarpoq. Tassami partiip siulittaasuata Pele Brobergip Inatsisartut Kalaallit Nunaanni nunap inoqqaavi pillugit paasissutissanik nalunaarsuisoqartassasoq Naalakkersuisut peqquniarpai.

Pele Brobergip Inuit nalunaarsorneqartalernissaat siornatigut siunnersuutigisimavaa. Naalakkersuisut inuit namminneq kajumissutsimik nalunaarsorneqartarnissaq tunngavigalugu qinersisartunik nalunaarsuisarnissaq 2023-mi siunnersuutigaa.

Inuit nalunaarsorneqartalernissaata kinguneri pisariaqarneralu pillugit Naalakkersuisut nalunaarusiornissaannut pisussaaffilerneqarnissaannik allannguutissatut siunnersuut IA-mit Siumumillu saqqummiunneqarpoq.

Inatsisartut inatsisit pisinnaatitaaffiillu atuuttut eqqortikkusukkunikkit Kalaallit Nunaanni inuit nalunaarsuisariaqalersut Pele Broberg siunnersuuteqaammini nutaami allappoq.

Taanna ILO-p isumaqatigiissutaanut nr. 169-imut innersuussivoq, tassanilu nalunaarsuineq eqqaaneqanngilaq, nunalli inoqqaavinut ilaasutut imminut ilisarisimaneq eqimattat isumaqatigiissummi pineqartut kikkuunerannik paasiniaanermi tunngaviusumik najoqqutassaassasoq allassimavoq.

Paasissutissat katersorneqartut sumut atorneqartassanersut imaluunniit qanoq nalunaarsuisoqassanersoq Pele Brobergip siunnersuutaani toqqaannartumik allassimanngilaq.

„Nunap inoqqaavi “Inuit” Kalaallit Nunaanniittut pisinnaatitaaffii qulakkeersinnaaniassagutsigit aaqqissuulluakkamik paasissutissanik katerseriaaseqarnissaq piffissanngorpoq. Nunarsuarput taamatut peqqusivoq. Inatsisitigut taamatut peqqusisoqarpoq. Susassaqartut taamatut peqqusipput. Inuiaqatigut pillugit taamaasiortariaqarpugut," Pele Broberg allappoq.

Piffissaq, soraarnerussutisiaqalernissaq sakkussanullu inatsit

Eqqaaneqareersutut oqaluuserisassat 66-it siorna ukiakkut ataatsimiinnermi suliarineqartut maanna naammassineqartussanngorput.

Ilaatigut Kalaallit Nunaata annersaa nalunaaquttap-akunneranut UTC-3-mut utertinneqarsinnaasoq siunnersuutigineqarpoq. Tamanna Naleqqap Siumullu siunnersuutigaat, Inatsisartunilu Ataatsimiititaliami 2025-mi oktobarip 14-iani siullermeerneqareerluni suliarineqaqqippoq.

Siunnersuutit allat tassaapput soraarnerussutisiaqalernissamut aaqqissuussinerup allanngortinnissaa, tamanna siorna qineqqusaarnermi sammineqangaatsiarpoq. Atorfillit ileqqaagaqarnissamik pisussaaffiata killilerneqarnissaa aamma akileraarutinut allagartamik akiliuteqartarunnaarallarnissaa Naalakkersuisut maanna siunnersuutigaat. Oqaluuserisaq novembarip aqqarnani siullermeerneqartoq Aningaasaqarnermut Akileraartarnermullu Ataatsimiititaliamut ingerlateqqinneqarpoq.

Kiisalu sakkussiat pillugit inatsisissatut siunnersuut suliarineqassaaq. Kalaallit Nunaanni sakkussianut inatsit nutaaq kingullermik ukiut 30-t sinnerlugit matuma siornatigut akuersissutigineqarpoq. Siunnersuummi aallaasinik tigumiarsinnaanermut ukiut killiliussat 15-inut qaffanneqarnissaat aamma aallaasit qaartartumillu qanoq toqqorsivigineqarsinnaanerat pillugu piumasaqaatit sukaterneqarnissaat ilaatigut pineqarput. Siunnersuut aalisarnermut, piniarnermut nunalerinermullu naalakkersuisumit Peter Borgimit (D) saqqummiunneqarpoq. Siunnersuut oktobarip aallaqqaataani siullermeerneqarluni Inatsisinut Ataatsimiititaliamut ingerlateqqinneqarpoq.