Pavip eqqissinermik oqariartuuteqarluni poorski malunnartippaa

Pavi Leop poorskip sapaataa nunarsuarmi naalagaaffiit siuttuinut eqqissinermik toqqaanissamut atatippaa.

Sapaammi ullaap tungaani ilagiit katuullit qullersaat Ruumami Peterskirkep aneersuartarfiannit inunnut untritilinnut takkuttunut oqaaseqartoq, Reuters allappoq.

- Sakkulisartut sakkutik iperarlisigit!

- Sorsunnernik aallartitsinissamut pissaaneqartut eqqissineq toqqarlissuk, pavi oqarpoq.

Oqaaseqarneq “urbi et orbi”-mik qulequtaqartoq – kalaallisut: illoqarfimmut nunarsuarmullu – pisarneq malillugu Peterskirkemi poorskimi naalagiarnerup kingorna pivoq.

Pavi Leo aatsaat siullermeerluni poorskimi naalagiarnermik, kristumiut oqaluffianni ullorsiornerit annersaannik, aqutsivoq, taassumalu “urbi et orbi”mik oqaaseqarnerata aamma siullersaraat.

Pavi Leo siorna maajip qaammataani pavinngortinneqarpoq.

Naak erseqqissumik oqaaseqaraluarluni, pavi aternik saqitsaannernik sorsunnernilluunniit aalajangersimasunik oqaaseqarnermini taasaqanngilaq, oqaaseqarneralu nalinginnaanngitsumik naatsunnguullunilu toqqaannartuuvoq.

Pavi Leo naapertorlugu nunarsuarmi sorsuunnerit ima sungiusimaneqalertigipput, allaat inunnik persuttaanerit toqoraanerillu suunngitsutut isigineqalerlutik.

ATUARUK AAMMA

Meeqqatut palasitut pinnguarpoq - maanna naalagiartitsisarpoq

- Persutaaneq sungiupparput, akuersaarlugu soqutigiunnaarlugulu. Inuit tuusintilikkaat toqorarnerat soqutigiunnaarparput, pavi oqarpoq.

Taassuma poorskimik oqaluttuaq, Biibili malillugu Jiisusip poorskip ullaavani pinaasernani sanningasulimmut kikiattorneqarnerminit ullut marluk kingorna toqusunit makinneranik oqaluttuaq, Jiisusip “tamakkiisumik nakuusertuunnginneranik” takutitsivoq.

- Ullormi uani nalliuttorsiornitsinni saqitsaakkumassuseq, qulangiisimajumassuseq pissaaneqarumanerlu qimatsigit, Naalagarlu nunarsuarmik sorsuffiusumik eqqissinermik tunniussinissaanik qinnuigitigu, katuullit oqaluffianni qullersaq oqarpoq.

Pavi aatsaat siullermeerluni saqitsaannernik ingerlasunik isornartorsiullunilu eqqissinissamut kaammattuuteqanngilaq. Sapaatit akunnerini kingullerni arlaleriarluni taamaasiorpoq – ilaatigut Palmit sapaataanni Peterspladsemi naalagiartitsinermini.

- Jiisusip inuit sorsuuttut qinnutaat naalaarneq ajorpai, itigartillugilli ima oqartarpoq: Naak qinnuterpassuarnik aallartitsigaluartusi, naalaassanngilanga: Assasi aammik ulikkaarput, pavi Leo sapaatit akunnerata ataatsip siorna taama oqaaqqissaarivoq.

Oqaaseqarnermi saniatigut pavi Leo sapaammi ullup qiteqqunnerani oqaatsit qulit atorlugit Peterskirkip aneersuartarfianit poorskimi inuulluaqqusivoq – ilaatigut latinerisut, araberisut kiiniiseritullu.