Inatsisartuni ilaasortat 18-it – ilaatigut Naalakkersuisut siulittaasuat Jens-Frederik Nielsen (D) – nalunaaqutaq UTC-3-mut utertinneqarnissaanut aasaaneranilu nalunaaqutaq atorunnaarsinneqarnissaanut marlunngornermi oktobarip 13-ianni taasipput.
Taamaattumik allannguutissatut siunnersuut Inatsisartuni sapaatip-akunnerani matumani pingasunngornermi inaarutaasumik oqaluuserineqarnerani, akuerineqarnissaa ilimanaateqarsinnaavoq.
Inatsisartuni ilaasortat 18-it – ilaatigut Naalakkersuisut siulittaasuat Jens-Frederik Nielsen (D) – nalunaaqutaq UTC-3-mut utertinneqarnissaanut aasaaneranilu nalunaaqutaq atorunnaarsinneqarnissaanut marlunngornermi oktobarip 13-ianni taasipput.
Taamaattumik allannguutissatut siunnersuut Inatsisartuni sapaatip-akunnerani matumani pingasunngornermi inaarutaasumik oqaluuserineqarnerani, akuerineqarnissaa ilimanaateqarsinnaavoq.
Sermitsiami allaaserisami nassuiarneqarpoq inatsisip allanngortinneqarnissaanut tusarniaanermi akissuteqartorpassuit amerlanerpaartaat isumaqataanngitsut.
Jens-Frederik Nielsenip oqallinnermi oqaluttarfimmit kingullermi oqaatigaa, nalunaaqutaq allanngortinneqarpat aningaasaqarnermut napparsimasullu utaqqisut allattorsimaffiannut annertuumik sunniuteqarsinnaasoq.
Sooq siunnersuut tapersersorneraa paasiumallugu, Jens-Frederik Nielsen apersorparput.
- Inatsisartuni partiit inatsisissatut siunnersuutaat, Naalakkersuisunit saqqummiunneqanngilaq. Taamaattumik partiit tunngavilersuutigisaat pingaaruteqarput.
- Naalakkersuisut tungaannit siullermeernermi aappassaaneerinermilu erseqqissarneqarpoq piffissamik allanngortitsineq kinguneqarnerlussasoq. Suliffeqarnermut aningaasaqarnermullu kingunerluuteqassaaq. Kisianni soorunami aamma partiit inatsisissatut siunnersuutinik saqqummiussisut akuerisariaqarpavut, Inatsisartunilu oqallinneq aalajangiisuussaaq, oqarpoq.
Inatsisartuni Inatsisinut Ataatsimiititaliap allannguutissatut siunnersuutaa akuerineqarpat 2027-mi aasaanerani nalunaaqutaq nikisinneqassanngilaq, 2028-milu aasaanerani nalunaaqutaq atorunnaarsillugu UTC-3-mut utissaagut. Tamanna Danmarkimut nalunaaquttap nikinneranut seqernullu qaqugu nuinissaanut sunniuteqassaaq.
Najoqqutaq: Inatsisinik Atuutsitsinermut Ataatsimiisitaliap allannguutissatut siunnersuutaa
- Tassa taamaa ippoq
Jens-Frederik Nielsenip naqissuserpaa Inatsisartuni aalajangiisoqarneranut Naalakkersuisunit tapersersuineq aallunneqassasoq, taamatullu partiit naalakkersuisooqatigiit qanoq taasinissaannut sunniuteqarsinnaanatik. Taassumalu oqaatigaa kingunerlutsitsisinnaasut kisiisa Naalakkersuisunit oqaatigineqarsinnaasut.
- Taamatuttaaq isiorpuguttaaq, Inatsisartunili partiit tunngavilersuipput aasaanerani nalunaaqutaq januaarip aallaqqaataani atorunnaarsinneqarnissaa pillugu, UTC-3-mullu ingerlaannaq piffissap aalajangersarneqarnera utertinneqarnissaa. Takusinnaavaralu inatsisartuni amerlanerussuteqarluartut tamanna tapersersoraat, tassa taama ippoq.
Inatsisissatut siunnersuutinut tusarniaanermut akissutit aalajangiinermi pingaarnerutinneqarsimannginnerat uggornartoq, Naalakkersuisut siulittaasuat oktobarip 13-ani oqallinnermi oqarpoq.
- Partiilli tunngavilersuutaat soorunami arlaatigut paasinarpoq, tassami aamma innuttaasut amerlasuut tusarniaanermut akissuteqarput, Sermitsiamut oqarpoq.
Innuttaasut 46-t tusarniaanermut akissuteqarput, aamma 4000-it sinnillit atsiornernik katersinermi atsiorput, tamannalu Inatsisartut oqallinneranni arlaleriarluni marlunngornermi eqqaaneqarpoq.
4000-it Kalaallit Nunaanni qinersisinnaasut 10 procentiisa missaat atsiorput. Isumaqarpit qinersisinnaasut 10 procentiisa kissaatigisaannik eqqarsaatiginnilluni politikkimik suliaqartoqartariaqartoq?
- Isumaqarpunga ajornanngippallaartumik aaqqinneqartoq. Nassuerutigisariaqarpara piffissami sivikitsuinnarmi inuit 4000-it atsiorsimasut. Aammali ammasumik oqaatigisarpara nunami maani inuit ilaat piffissap allanngornera nuannaarutigigaat.
Tamanna isumassarsiatsialaava?
Jens-Frederik Nielsenip Inatsisartuni oqaluttarfimmiit piffissap aalajangersarneqarnerata allanngortinneqarnerata kinguneri ajortut kisiisa eqqartorpai, isumassarsiaq taanna pitsaasutut isigineraa qularnarsinnaagaluarpoq.
Isumaqarpit aasaanerani nalunaaqutaq atorunnaarsillugu UTC-3-mut uternissarput isumassarsiatsialaasoq?
- Naalakkersuisut isumaqarput inatsisartut aalajangiinerat soorunami ataqqineqartariaqartoq. Naalakkersuisut pitillugit uanga kisima pineqanngilanga, Naalakkersuisulli pineqarput.
- Maani nunami Naalakkersuisoqarpugut. Isumaqarpugut oqallinneq naammassisoq, isumaqarpugullu kingunerisinnaasai saqqummiullutigit. Inatsisartut akuersissuteqareerpata uagut pisussaaffigaarput tamanna inuunermut atuutilersinnissaa, soorunami aamma aningaasaqarnikkut naleqqussaanerit tamatumunnga ilaapput.
Siulittaasorli Inatsisartuni oqaasissaqarputit marlunngornermilu akuersiinnarlutit. Tamanna allannguinermut akuersaarnittut paasineqarsinnaava?
- Naamik, isumaqarpunga maanna inatsisartuni suliarineqareersutut isigisariaqarisi. Soorunami Naalakkersuisut inatsisartut aalajangiinerat ataqqivaat, uagullu pisussaaffipput naammassissavarput, tassalu pissaanermik atuisutut tamanna naammassissavarput, taamaaliornissarpullu pilersaarutigaarput.
- Soorunami aamma aalajangersimasunik akuerinninnerput pillugu qanoq kingunerluuteqarsinnaanera pillugu partiit qanimut oqaloqatiginissaat siunertaraarput.
KALAALLIT NUNAANNI NALUNAAQUTTAT INGERLAAQATIGIIFFII
Kalaallit Nunaanni nalunaaquttap ingerlaaqatigiiffii assigiinngitsut pingasuupput.
Nunap annersaani UTC-2-uvoq.
Pituffimmi sakkutooqarfik Amerikap kangiata nalunaaqutaa malillugu UTC -4-miippoq.
Tunumi Nationalparkimi silasiorfik Danmarkshavn UTC +0-miippoq.
Kitaani Tunumilu nalunaaquttap ingerlaaqatigiiffia UTC -3-mit UTC -2-mut 2023-mi oktobarimi allanngortinneqarpoq.
Ittoqqortoormiit 2024-mi marsimi UTC-1-imit UTC-2-mut aamma nuuppoq.
Danmarkshavni Pituffillu Space Baselu kisimik pinnatik nunap sinnerani aasaanerani nalunaaqutaq atorneqarpoq.
Aningaasat sumit pissarsiarineqartassappat?
Piffissap aalajangersarneqarneranik allanngortitsineq minnerpaamik ukiumut 19 million koruuninik nunatta karsianut akeqassaaq. Tamatuma saniatigut aningaasaqarnikkut kingunerlutsitsissaaq, soorlu Jens-Frederik Nielsenip inuussutissarsiortullu tamanna mianersoqqussutigereeraat.
Aningaasat taakku sumit pissarsiarineqarpat?
- Soorunami tamanna aalajangerneqareerpat naatsorsuutigaara partiit allannguummut tassunga akuerseqataanikut tamarmik aningaasanik ataatsimoorluta nassaarniarnissatsinnut suleqatigiumaarivut.
- Aningaasanut inatsisip toqqaannartumik sunniutissaanik 19 millionit koruuninik missingersuusiornerup saniatigut inuussutissarsiortut aamma oqariartuuteqarput isertitaminnut tamanna ajortumik kinguneqaataassasoq. Tamanna aamma aningaasatigut akeqassaaq, Naalakkersuisut siulittaasuat oqarpoq.
Inatsisartut pingasunngorpat piffissamik aalajangersaanermut allannguutissaq akuersissutigigunikku, aappaagumiit aasaanerani nalunaaqutaq atorunnaarsinneqassaaq, 2028-milu UTC-3-mut utissaagut.
