Politiit 2025-mi arfininngornermi januaarip 18-ianni Nuussuarmut ornigupput. Inuit ullaaq taanna nalunaaqutaq qulit qiteqqukkaa nukappiaraq pingasuinnarnik ukiulik Brugseni Nataliep saavani takusimavaat.
Naak taamanikkut issikkaluartoq nukappiaraq kisimiilluni, ikiaqutaannaalluni, angalaarsimavoq.
Politiit 2025-mi arfininngornermi januaarip 18-ianni Nuussuarmut ornigupput. Inuit ullaaq taanna nalunaaqutaq qulit qiteqqukkaa nukappiaraq pingasuinnarnik ukiulik Brugseni Nataliep saavani takusimavaat.
Naak taamanikkut issikkaluartoq nukappiaraq kisimiilluni, ikiaqutaannaalluni, angalaarsimavoq.
Nukappiaqqap ataataa tallimanngornerup arfininngornerullu akornanni unnuakkut imerniartarfimmukarsimasoq paasinarsivoq. Ataataasup aninermini ernini inersimasumit allamit paarineqarnersoq qulakkeersimanngimmagu, ullaarlu suli angerlarsimanngimmat, nukappiaraq nammineerluni issittumi ataataminik ujaasiartorsimavoq.
Pinerluttulerinermi inatsisit naapertorlugu sumiginnaaneq
Ajoraluartumik angajoqqaat meeqqaminnik paarsilluarnerusariaqaraluartut arlaqarput. Innuttaasulli pinerluttulerinermi inatsisit immikkoortua naapertorlugu „ilaqutariinnut angerlarsimaffimmullu innarliisut“ pillugit unnerluutigineqarlutillu eqqartuunneqartarnerat qaqutigoortuuvoq.
Immikkoortoq taanna tamarmi ima allassimasoqarpoq:
§ 75. Ilaquttaminik inoqutiminilluunniit narrunarsaasutut eqqartuunneqassaaq kinaluunniit aapparminik, qitornaminik imaluunniit inummik allamik oqartussaaffigisaminik isumagisassaminilluunniit imaluunniit ningaaminik sakiatsiaminillu imaluunniit siuaasatut ilaquttaminik paarsinerlulluni nikarnasaasumilluunniit pissusilersorfiginnilluni narrunarsaasoq.
Imm. 2. Taamatuttaaq pineqassaaq kinaluunniit pilersuisusaatitaanerminik imaluunniit akilersuisussaatitaanerminik sumiginnaalluni inunnik imm. 1-imi taaneqartunik ajorsalersitsisoq.
Ataataasoq aatsaat kingusinnerusukkut angerlarpoq, erninilu peqanngitsoq paasinagulu innarsimavoq. Politiinit nassaarineqarami ernini isumaginninnermut oqartussanit isumagineqartoq paasivaa.
Tamanna tunngavigalugu ataataasoq 28-nik ukiulik Sermersuup Eqqartuussiviani novembarip tallimaani qaammatini pingasuni meeqqaminik sumiginnaasutut parnaarussassanngortinneqarpoq.
Pissutsit ilungersunarluinnartut
Angutip 28-nik ukiullip pisuunini eqqartuussivimmi nassuerutigaa. Isumaqaraluarporli parnaarussaasariaqarnani. Pinerloqqikkuni pineqaatissinneqartussatut inuiaqatigiinniluunniit sulisitaasussatut piumasaqaraluarpoq.
Pineqaatissiissulli piumasaqaateqanngitsumik atuutissasoq eqqartuussivik isumaqarpoq. Ataataasoq parnaarussassanngortinneqarnermi saniatigut ernerminut 10.000 koruuninik taarsiisussanngortinneqarpoq.
Pinerlunneq ingasattumik ilungersunarsimasoq eqqartuussisoq Kristine Olsvig oqarpoq. Ilaatigut angutip 28-nik ukiullip angerlareerluni ernini sumiinersoq paasiniarsimanngilaa.
Angutip sakkukinnerusumik pineqaatissiisoqarnissaa kissaatigalugu eqqartuussut Nunatta Eqqartuussivianut suliassanngortippaa.
Sermitsiap paasissutissaatai naapertorlugit nukappiaraq pingasunik ukiulik tamatuma kingorna qanoq pineqarsimanersoq ilisimaneqanngilaq. Apeqqut tamanna isumaginninnermut oqartussaasunut tunngassuteqarpoq, taamaammallu eqqartuussinermi allagaatini pissarsiarisinnaasatsinni allassimanngilaq.
