Ukioq manna umiarsuaq kingulleq novembarimi Tasiilamut tikippoq. Nioqqutissat umiarsuarmik tikittut qaammatini arfinilinni arfineq-marlunnilu tulliuttuni Royal Arctic Linep sikueruteqqippat angalasinnaalernissaanut naammattussaapput.
Tamanna nutaajunngilaq, pisiniarfiulli RF Electronic-ip containerini 40 fodsiusoq kingulleq ammaramikku nuanniitsumik tupaallaateqarput.
Ukioq manna umiarsuaq kingulleq novembarimi Tasiilamut tikippoq. Nioqqutissat umiarsuarmik tikittut qaammatini arfinilinni arfineq-marlunnilu tulliuttuni Royal Arctic Linep sikueruteqqippat angalasinnaalernissaanut naammattussaapput.
Tamanna nutaajunngilaq, pisiniarfiulli RF Electronic-ip containerini 40 fodsiusoq kingulleq ammaramikku nuanniitsumik tupaallaateqarput.
- Sodavandit affaasa missaat immiaaqqallu immikkut ittut qaammatini arfinilinni tulliuttuni atorneqartussatut immikkoortinneqarsimasut ilarpassui Tasiilami umiarsualivimmi inuit kukkunerat pissutigalugu aserorput, Majken Anning Andreassen, RF Electronicimi pisortap tullia ulluinnarnilu aqutsisoq oqaluttuarpoq.
Immiaaqqat sodavandillu qerillutik qaarsimasut
Nioqqutissat Tasiilamut apuummata containeri innaallagissamut ikkunneqarpoq, imeruersaatillu taamaalillutik qeritinneqarput. Tamanna arlallit qaarsimanerannik kinguneqarpoq.
- Nassiussatsinnut allagartaq naapertorlugu nioqqutivut novembarip aqqaneq-aappaanni tigusussaagaluarpagut, aatsaalli novembarip 17-iani tiguagut. Containerillu iluaniittut suunersut misissunngiivillugit containeri innaallagissamut ikkussimammassuk kingusinaareerpugut, taanna oqarpoq.
RF Electronic ilaqutariit namminersortut suliffeqarfiutaat, ukiuni 40-ni Tasiilami niuertarfeqarsimavoq. Tasiilami marlunnik niuertarfeqarput, taakkunanilu assigiinngitsorpassuarnik, ilaatigut imeruersaatinik, tuniniaasarput.
Imeruersaatit pineqartut qaammatini arfinilinni arfineq-marlunnilu tulliuttuni RF Electronicsip niuertarfiini tuniniarneqartussaagaluarput.
Assi: Majken Anning Andreassen
Oktobarimiit novembarimut nuunneqartut
Ukiuunerani imeruersaatissat oktobarimi tikiunneqareersimasussaagaluarput, taamanikkulli RF Electronicip inniminnersimasani allarpassuit tigusimavai.
- Nioqqutissat uagut pilersuisullu ilisimateqqaarnata Royal Arctic Linep qullersaqarfianit umiarsuarmut kingullermut nuunneqarsimapput, Majken Anning Andreassen oqarpoq.
Umiarsuaq novembarimi tikittoq sikunnginnerani kingulliummat, umiarsuup apuutinngitsoornissaa ilimanaateqarsinnaavoq.
- Taamaammat nioqqutissat pinissaat ajortuunnginnissarlu qulakkeerniarlugit oktobarimi umiarsuaqarnissaanut inniminniisimavugut, isumaqaraluarpugut.
Kukkusoqarsimaneranik nioqqutissat qerititinneqarsimasut Royal Arctic Linep Sermitsiamut uppernarsarpaa.
Teknikkikkut kukkusoqarsimanersoq imaluunniit periusit malillugit kukkusoqarnersoq misissuleruttorpaat. Taavalu atuisup Royal Arctic Linelu akornanni ajoqusernerit pillugit naatsorsuineq suliarineqarpoq.
Aammattaaq umiarsuarmik angallassiffiunerpaami nioqqutissat pingaaruteqavissut soorlu nerisassat, sanaartornermut atortussat ukiumullu pisariaqartitat tikiunneqarnissaat qulakkeerniarlugu usit ingerlaavartumik aqunneqartartut Royal Arctic Line ilisimatitsivoq. Umiarsuit usisinnaasaat sapinngisamik atorluaaffiginiarlugit usit ilaasa assartuinernut allanut nuussorneqartariaqarnerat pisariaqarsinnaasartoq Royal Arctic Line ilisimatitsivoq.
- Aammattaaq atuisunut paasissutissiisarnerup pingaaruteqarnera eqqumaffigaarput. Taamaammat atuisut paasissutissanik amigaateqartarnerat annikillisinniarlugu, tamatumalu saniatigut ingerlatsinerup pitsaasuunissaa qulakkeerniarlugu ingerlatseriaatsitsinnik pitsanngorsaaniartuartarpugut, Niuernermi Pisortaq John Aage Nielsen Sermitsiamut allappoq.
Kaaviiaartitanik annaasaqarneq akisusoq
Majken Anning Andreassen nioqqutissat annaasatik pillugit taarsiiffigineqassallutik oqaluttuarpoq.
- Taarsiissutilli taakkua nioqqutissanut aningaasartuutinut, tassa nioqqutissat akiinut, taamaallaat matussusiissaaq. Kaaviiaartitat annaasat matussuserneqarnavianngillat, taanna oqarpoq.
Qulinit 15-inut sulisoqarlutik, amerlanerillu aalajangersimasumik sulisuusugamik ukiuunerani suli akissarsiaqartussaasut taanna oqaluttuarpoq.
- Isertitatta kaaviiaartitattaluunniit ilarujussua annaariasaarutsigu sulisoriinnarnissaat ajornakusoortorujussuusarpoq. Tamannalu uggornarpoq, soraarsitserusunngilagummi. Soraarsitsisariaqarusunngilagut.
Taamaammat suliffeqarfiit namminersortut taamatut kukkusoqartillugu ikiorneqarsinnaanerulernissaat kissaatigaa.
- Suliffeqarfiit namminersortut samminerunissaat kissaatigaara. Kalaallit Nunaanni namminersortuuneq ajornakusooreerpoq, sineriammilu suli ajornakusoornerulluni.
Umiarsuaq immikkut ittumik ujartorneqarpoq
Royal Arctic Linep umiarsuaq alla nioqqutissanik aserorsimasunik taarsiissutissanik nassataqartoq aallartissinnaagaluarpagu pitsaanerpaassaaq, Majken Anning Andreassen oqarpoq.
Siornatigut decembarimi januaarimilu umiarsuarnik tikittoqartarsimammat umiarsuarmik tikittoqaqqissinnaanersoq RF Electronicimit apeqqutigineqarpoq, itigartinneqarpulli.
Tasiilami sikutinnagu umiarsuaqaqqinnissaanik kissaateqartuni kisimiinngillat. Tamanna pillugu atsiornernik katersuiniarnermi inuit 373-it atsiorsimapput. KNR taama allappoq.
Nalinginnaasumik Iceland Air nioqqutissanik nutaanik illoqarfimmut ukiuunerani pilersuisarpoq. Ukiukkulli Kulusummukartitsisarunnaarniarlutik siorna juulli sioqqutilaarlugu nalunaarutigaat.
Naalakkersuisut aqqut taanna ammaqqinniarlugu maannakkut sulissuteqarput.
