Naalakkersuisut angallassisoqartarunnaarnera timmisartuutileqatigiiffimmut oqaloqatigiissutigigaat
Icelandair Islandimiit Kulusummut ukiukkut timmisartuussisarunnaarpoq, Naalakkersuisulli timmisartortitseqatigiiffik oqaloqatigalugu ukiukkullu timmisartuussisaleqqinnissamik periarfissanik misissuipput.
Icelandairip Kulusummut timmisartuussisarnini siorna unitsippaat. Nalunaaruteqarnermiit unitsitsinermut piffissaq sivikitsoq atorneqarpoq.
Assi: Jesper Hansen
Icelandarip Kulusummut ukiukkut timmisartuussisarnissani siorna juulliliivissoq unitsimmagu Tasiilami eqqaanilu innuttaasut ajuusaarutigaat. Timmisartuussisarnerit taamaatinneqarnerat innuttaasut Reykjavikimiit pilersorneqarsinnaanerannut ilaatigut kinguneqarpoq.
Naalakkersuisut Icelandairimut ukiuunerani timmisartuussisarnerit sooq unitsinneqarnerat paasiniarlugu, aamma ukioq kaajallallugu timmisartuussisarnerup attanneqarsinnaanersoq misissorniarlugu oqaloqateqarneq aallartippaat.
Ineqarnermut, attaveqaasersuutinut isorliunerusunullu naalakkersuisoq Aqqaluaq B. Egede (IA) Inatsisartunut ilaasortamut Lars Poulsenimut (S) allakkatigut akissummini kiisalu pingasunngornermi tusagassiuutitigut nalunaarummi allappoq.
Nioqqutissat amigaataalernissaat annilaanngatigineqartoq
Tasiilami innuttaasut 373-it atsioqataasut Royal Arctic Line umiarsuarmik pajuttaamik juullertinnagu tikittoqaqqinnissaa piumasarigaat KNR-imit sapaatip-akunnerani matumani allaaserineqareersorlu taama nalunaaruteqartoqarpoq. Umiarsuaq pajuttoq kingulleq sapaatip-akunnerata siuliani Tasiilamut tikippoq, tullialu aatsaat qaammatit arfineq-marluk qaangiuppata tikinnissaa naatsorsuutigineqarluni. Taamaattumillu innuttaasut nioqqutissanik amigaateqalernissaq annilaangatigalugu.
Air Greenland, Norlandair, Royal Arctic Line kiisalu DMI-p Sikunut alapernaarsuiffia unammilligassat iliuuseqarfiginiarlugit aamma oqaloqatigineqartut naalakkersuisoq Aqqaluaq B. Egedep pingasunngornermi aamma paasissutissiissutigaat.
Aqqaluaq B. Egedep Lars Poulsenimut akissummini silap pissusiata allanngoriartornerata kingunerisaanik Tasiilap eqqaani sivisunerumik imaroqqasalernikuunera eqqaavaa, Kalaallilli Nunaata Islandillu akornanni sikuuneranit anorersuarnillu suli sunnerneqaqqasartoq ilaatigut eqqaavai.
- Tamatumalu kingunerisaannik Royal Arctiv Linep umiarsuaannut piffissami tassani imartami angalanissaq suli navianarluni, Aqqaluaq B. Egede akissummini allappoq.
Naalakkersuisoq: Kiffartuussinissamut isumaqatigiissusiortoqarsinnaanngilaq
Icelandair Kulusummut timmisartuussisarunnaarnera ukiukkut angalasut ikiliartornerat pissutigalugu timmisartuussineq imminut akilersinnaajunnaarnera pissutaasoq timmisartortitseqatigiiffik Sermitsiamut ilisimatitsivoq. Aamma Nuummiit Kulusummut timmisartuussisarnerit amerlineqarnerat pissutaasoq.
Naalakkersuisup Aqqaluaq B. Egedep tamanna Lars Poulsenimut akissummini aamma erseqqissaatigaa, soorluttaaq Aqqaluaq B. Egedep aqqut taanna ukioq kaajallallugu angallassiffiusarmat Naalakkersuisut kiffartuussinissamut isumaqatigiissusiorsinnaanngitsut erseqqissarpaa – tassa ingerlatsinermut tapiissuteqarnissaq eqqarsaatigalugu.
Angallassisoqarsinnaanngikkaangat Naalakkersuisut kiffartuussinissamik aatsaat isumaqatigiissuteqarsinnaasut Aqqaluaq B. Egede akissummini nassuiaatigaa.
