Politeeq maalaarutigineqartoq: Unnerluutigineqartoq ilisimannittumut niaqulaartuuneraraa
Politiip pinngitsaaliisoqarnikuunerani suliami unnerluutigineqartoq niaqulaartuugunarnerarlugu ilisimannittumut oqaatigaa. Akuerineqarsinnaanngitsoq, unnerluutigineqartoq illersuisualu isumaqarput. Politiit pillugit maalaaruteqartarfik arlaannaanulluunniit attuumassuteqanngitsoq pisumut naliliisussanngorpoq.
Misissuinermi naapertuutinngitsumik pissusilersortoqarneranik pasitsaassineq Kalaallit Nunaanni Politiit naammagittaalliuutigineqarnerannik kinguneqarpoq.
Assi: Toqqorsivik.
Pinngitsaaliisoqarnikuunerani siorna suliani eqqartorneqarnerpaaq Qaqortumi pisimasuuvoq, tassani sungiusaasuunikuullunilu politiiunikoq Kujataani niviarsiaqqanut marlunnut pinngitsaaliisimasutut allatigullu kannguttaatsuliorsimasutut pineqaatissinneqarluni. Suliaq Nunatta Eqqartuussisuuneqarfini 2025-mi juulip 22-ani naammassineqarpoq.
Politiiunikoq eqqartuussinermi naggataarutaasumik oqaaseqarnermini, suliap ingerlanerani suleqatigisimasaminit naapertuutinngitsumik pineqarsimalluni oqarpoq. Ilisimannittumut niaqulaartuunerarneqarsimanini naammaginagu oqarluni.
Piffissangaatsiaq qaangiutereersoq suliami tassani pisimasut naammagittaalliuutigineqarlutik suliassanngortinneqarsimasut maanna paasivarput.
Politiip pisumi ilisimannittup apersornerani immiussaq Sermitsiap uppernarsarsinnaavaa. Politiip politiiunikoq niaqulaartutut isigalugu ilisimannittoq oqarfigigaa erseqqissumik tusaaneqarsinnaavoq.
Tamanna uppernarsarsinnaavarput, tassami 2025-mi juulimi eqqartuussinermi immiussaq angutip pineqaatissinneqartup illersuisuanit Finn Meinelimit Nunatta Eqqartuussisuuneqarfiani eqqartuussut sioqqutitsiarlugu tusarnaartinneqarpoq. Allakkatigut maanna ima itisiliivoq:
– Misissuinerup ingerlanera ajortutut pinikuunera uppernarsarniarlugu immiussat tusaatippakka. Ingammik killisiuinerit. Unnerluussisussaatitaasoq misissuinermi kinaassusersiortussaanngilaq illuatungaanillu illersuilertussaanani. Misissuinermi aqutsisoq illuinnasiorpaluttumik kinaassusersiorpaluttumillu pissuseqartoq immiussani taakkunani tusaaneqarsinnaasoq isumaqarpunga.
Angut pineqaatissinneqartoq illersuisualu niaqulaarneraanerup saniatigut pisuni allani aamma isorisaqarput. Sermitsialli misissorlugillu uppernarsaatisisinnaasani taamaallaat eqqaavai.
Politeeq maalaarutigineqartoq
Soormiuna politiip unnerluutigineqartoq niaqulaarnerarlugu nalilersinnaanngikkaa? Finn Meinel ima akivoq:
OQALUTTUAQ SOOQ AATSAAT MAANNA SAQQUMMERPA?
Nunatta Eqqartuussisuuneqarfiani eqqartuussineq 2025-mi aggustimi naammasseqqammertoq Sermitsiap suliaq samminiaraluarpaa. Pineqaatissinneqartoq maalaaruteqarnissamik kissaateqanngimmat taamaatipparput.
Aatsaat piffissarujussuaq ingerlareertoq 2025-mi decembarimi maalaaruteqartoqarsimasoq paasivarput. Kina maalaaruteqartuussanersoq paatsoortoqarsimanera pissutaalluni kingusinaarluni maalaaruteqartoqarsimasoq atuarneqarsinnaavoq.
– Suliami misissuisoq, ingammik killisiuinermi, nammineq isummersortussaanngilaq. Taamatut periaaseqartoqarpat politiit kinaassusersiortuunngitsutut isigineqalersinnaapput, illuatungaanilu isummiussereersimasutut pissusilersorsinnaapput. Tamanna suliassarinngilaat, illersuisusoq allappoq, politiillu pissaaneqarnerat akisussaaffiallu pillugit eqqaasitsilluni.
Finn Meinelip politeeq pillugu maalaarut akkanngilaa. Angutip pineqaatissinneqartup angutaata erni sinnerlugu allagaqarpoq.
Inuit sallummik taama ittumik tusartinneqarnerat upperinninnissaallu ernerminut nanertuutaasoq naammagittaalliummi naqissuserneqarpoq.
Sermitsiap paasisai naapertorlugit politeeq pillugu maalaaruteqarneq suli Politiinut Nakkutilliisoqarfimmit (DUP) suliarineqarpoq.
Politiit suliaat pillugit naammagittaalliuutit nalunaarutillu, Politiit pillugit maalaaruteqartarfik arlaannaanulluunniit attuumassuteqanngitsunit, DUP-mit suliarineqartarput. Kalaallit Nunaanni Poliit pillugit maalaarutit DUP-mit 2023-miilli suliarineqartalernikuupput.
Oqaasissaqarpallaanngitsut
Kalaallit Nunaanni Politiit suliaq inunnut tunngasuummat oqaaseqarfigerusunngilaat. Nunattali Eqqartuussisuuneqarfiani 2025-mi juulip 22-anni naggataarutaasumik oqaaseqartoqarnerani suliamut atatillugu oqaaseqartoqartutut taaneqarsinnaavoq.
Tassani unnerluussisup illersuisoq Finn Meinel ilumoornerarlugu politiit killisiuinerminni sianiilliorsimasut naqissuserpaa. Soorlu niaqulaarneraalluni oqarneq eqqarsaatigalugu.
Unnerluussisup killisiuinermi kukkusoqarsimagaluarpalluunniit, ilimannittup oqaasii ilumuunngitsutut nalilerneqarsinnaanngitsut aamma erseqqissarpaa. Taamaattumik suliami tassunga tunngasoq allami suliarineqartussaasoq, oqarpoq.
Politiit pillugit maalaaruteqartarfik arlaannaanulluunniit attuumassuteqanngitsoq politii naapertuilluanngitsuliorsimasutut naliliiguni arlannik kinguneqartitsisinnaavoq. Soorlu mianersoqqusinikkut, naqqiinikkut akiligassiinikkulluunniit. Sermitsialli paasisai naapertorlugit DUP suli naliliinikuunngilaq.
Taamatut aalajangiisoqarpat sungiusaasuunikup politiiunikullu Nunatta Eqqartuussisuuneqarfianiit pineqaatissiinneqarnikuunera allanngussanngilaq. Suliamili kukkusoqarsimanera, soorlu angutip pineqaatissinneqartup ilaqutaatalu oqarnerattut, uppernarsarneqassalluni.
Sermitsiap politeeq killisiuinermini niaqulaarneraasoq attaveqarfigaa, taannnali oqaaseqarusunngilaq.
Politeeq pineqartoq Danmarkimi politiini maanna sulivoq. Politiip allamik suliffittaarnera maalaaruteqarnermut attuumassuteqarpasinngilaq.
Angutip pineqaatissinneqartup ataataa, ernini sinnerlugu oqaaseqarsinnaatitaasoq, Sermitsiap aamma attaveqarfigaa. Ilaqutariit maanna oqaaseqarusunngikkallartut, oqarpoq.
