Politiit angallataanni tallimaasuni marluk qaqeqqasut

Kalaallit Nunaanni Politiit angallataasa ilaat, Nakuaq, septembarimi ikuallappoq. Angallat alla, Kimik, ileqquusumik suliarineqareerluni qaqeqqatinneqarpoq.

Taamaalillutik politiit angallataanni tallimaasuni marluk qaqeqqatinneqarput.

Kalaallit Nunaanni Politiit Sermitsiamut taama paasissutissiipput.

Kimik aserfallatsaaliorniarlugu immamit qaqinneqarpoq, ilaatigut naqqa umiarsuarnik nakkutilliisoqarfimmit ukiut tallimakkaartumik misissuiffigineqarluni. Tassani angallat atorneqaqqilissappat iluarsisariaqakkanik nassaartoqarpoq.

Kalaallit Nunaanni Politiit katillugit tallimanik sukkasuunik angallateqarput, taakkualu immami suliassanut atorneqartarput. Taakkunannga pingasut maannakkut atorneqarsinnaapput.

Umiatsianik attartornerit

Politiit umiatsiamik pisariaqartitsigaangamik taava qanoq iliortarpat?

- Kalaallit Nunaanni Politiit upalungaarsimanermut oqartussat allat – assersuutigalugu Issittumi Sakkutooqarfik kommuninilu qatserisartut – suleqatigilluartarpaat, angallatinillu atorsinnaasunit amerlanerusunik pisariaqartitsiffiusumik suliassaqalerpat politiit Kalaallit Nunaanni upalungaarsimanermut oqartussat suleqatigisarpaat, taakku Sermitsiamut allapput.

Aammattaaq politiit assersuutigalugu imaani suliassaqartillugu politiit nammineq angallataat ungasikkaangat pisariaqartitsinertik naapertorlugu angallatatinik attartortitsisartunit namminersortunit attartorsinnaapput.

Politiit angallataat marluk atorsinnaanngimmata immami suliassanik suliaqarnissaq ajornakusoornerunersoq Sermitsiap apeqqutigaa.

- Kalaallit Nunaanni Politiit angallatitik marluk maannakkut atorsinnaanngikkaluarlugit upalungaarsimanermut oqartussaasut innuttaasullu suleqatigiilluarnerisigut immami upalungaarsimaneq pisariaqartoq ingerlatiinnarsinnaavaat, akipput.