Ataqqinartorsuaq Kunngi Frederik qulingat Nuummut pingasunngornermi februarip 17-iani tikikkuni innuttaasut akornanni nuannarineqarluarnissani ilimagisinnaassavaa.
AG-mit aqqusinermi inunnik apersuinitsinni innuttaasut kunngikkormiut qanoq isumaqarfigineraat kiisalu kina kunngikkormiuni nuannarinerpaaneraat paasiniarparput.
Ataqqinartorsuaq Kunngi Frederik qulingat Nuummut pingasunngornermi februarip 17-iani tikikkuni innuttaasut akornanni nuannarineqarluarnissani ilimagisinnaassavaa.
AG-mit aqqusinermi inunnik apersuinitsinni innuttaasut kunngikkormiut qanoq isumaqarfigineraat kiisalu kina kunngikkormiuni nuannarinerpaaneraat paasiniarparput.
Kunngip inuppalaarnera nuannarineqarluarpoq, Dronning Margrethelu maqaasineqarluni. Prinsesse Isabella, Prins Vincent kiisalu Prinsesse Josephine nuannarineqartunut aamma ilaapput.
Arnartaq Løvstrøm, Nuuk.
Kunngikkormiut qanoq isumaqarfigivigit?
Arnartaq Løvstrøm, royalist.
Assi: Oscar Scott Carl
- Kunngikkut uanga ajorinngilakka, nuannarivakka aamma, mikisuullungali kunngikkormiunik nuannaartorisaqartarama. Arlaannik Kalaallit Nunaannut tikikkaangata takorusuttuaannarpakka, taavalu fjernsynikkut isiginnaartarlugit.
Kunngikkormiuni kina nuannarinerpaaviuk?
- Massakkuugallartoq marlulissat Prinsesse Josephine Prins Vincentilu nuannarinerpaavakka. Paniga mikisuaraasoq Nuutoqqami takunikuugatsigit, paniga ilassinikuummassuk, taava kommunep eqqaani takoqqikkatsigit paninnut ilisarsigamik marluullutik. Taava nuannarilernikuuakka alutoralugu ilisarseqqittut.
Mikkel Thomassen, Nuuk.
Kunngikkormiut qanoq isumaqarfigivigit?
Mikkel Thomassen, kongip iluarisimaarinnittua.
Assi: Oscar Scott Carl
- Kunngerput nunatsinnut asannittuummat nuannareqaara, taannaqa tikinnissaa.
Kunngikkormiuni kina nuannarinerpaaviuk?
- Soorunami Kunngerput Frederik nuannarinerpaavara.
Asta Høy, Nuuk.
Kunngikkormiut qanoq isumaqarfigivigit?
Asta Høj, prinsesse Isabellip iluarisimaarinnittua.
Assi: Oscar Scott Carl
- Kunngikkut imatorsuaq malinnaaffigiunnaarnikuuakka, Dronning Margrethe malinnaaviginerunikuuara, kisianni massakkut kunngi ersinnginnermut soqutigivallaanngilara.
Kunngikkormiuni kina nuannarinerpaaviuk?
- Soorunami Prinsesse Isabella, paneqarama Isabellamik atilimmik.
Athena Andersen, Nuuk.
Kunngikkormiut qanoq isumaqarfigivigit?
Athena Andersen, dronning Margrethep iluarisimaarinnittua.
Assi: Masauna Peary
- Uanga kunngikkormiut soqutigisorsuunngilakka, aamma malinnaffiginikuunngilakka inuunera tamangajaat. Naluakkaluunniit sulerisarnersut. Kunngikkoqarneq misigigama qangarpalaalersimasoq. Ersarinnerusumik immaqa takutinneqartartuuppat soorlu sulerisartunuku qanoruku sunniuteqartartut inuiaqatigiinnut, ataqqinaannarnatik susartunuku, qanoruna inuiaqatigiinnut sunniuteqartarnersut soqutiginassagaluarpoq.
Kunngikkormiuni kina nuannarinerpaaviuk?
- Dronningiunikoq Dronning Margrethe nuannarinerpaavara, torragisarpara kipparippallaarnani imminut saqqummiuttarnera, dronninngiugaluarluni kisianni inuppalaarluni. Eqqumiitsuliortutut pinngorartitsisinnaanera, mersortarnera, tamakkua takulaartarnikuuakka annertuallaanngikkaluartumik, taanna taasinnaavara, nuannaartorinerpaallugu kunngikkormiuni.
Lise Motzfeldt Svenningsen, Nuuk.
Kunngikkormiut qanoq isumaqarfigivigit?
Lise Motzfeldt Svenningsen, dronning Margrethep iluarisimaarinnittua.
Assi: Masauna Peary
- Uanga imatut soqutigisorsuunngilakka, nassuerutigisariaqarpara, imaanngilaq ajorigikka. Inuppassuit nuannarivaat, anaanama nuannarisorujussuugamigit, kisianni ataatama nuannarivallaarnagit, uanga immaqa angusisarsimavunga. Ajorinngikkaluarpakka.
Kunngikkormiuni kina nuannarinerpaaviuk?
- Dronning Margrethe uanga nuannarinerpaallugu oqartariaqarpunga. Isumaqarpunga aamma Prins Henrik nuannarisorujussuunikuugaluarlugu, toqujaarporli. Isumaqarpunga Dronning Margrethe nuannarinerpaallugu, annerusumik malinnaaffiginngikkaluarlugu, aqutseriaasia, isumai, eqqumiitsuliortarnera. Ukiortaami oqalugiaraangata tusarnaartalugit oqartariaqarpunga. Oqalugiaatai oqariartuuteqarluartarmata taakkua malinnaaffigisaqaakka assut.
Therkild Benjaminsen, Nuuk.
Kunngikkormiut qanoq isumaqarfigivigit?
- Imatorsuaq kunngikkormiut pillugit malinnaanngilanga. Isumaqarfigivakka kunngikkormiutut atorfitsik tunngavigalugu inatsisit malillugit sulisut, allamik naamik.
Therkild Benjaminsen, kongip iluarisimaarinnittua.
Assi: Masauna Peary
Kunngikkormiuni kina nuannarinerpaaviuk?
- Kunngi Frederik qulingat inuppalaartuummat nuannarinerpaasinnaavara. Pingasunngorpat tikippat inuit ussatissajunnarsivaat, immaqami ilaagaanni ussattunut.
