Marie Didriksenip aningaasat nammineerluni qinnutiginngisani akiligassarilerpai - taamaammallu akerliussutsimik takutitsiniarpoq

Marie Didriksenip, Nuummi peqqissaasutut sulisup, e-Boksikkut oktobarip tallimaani allagarsigami 3.883 koruuninik akiligassaqalersimalluni paasivaa - Suila-tapisivallaarsimavormi. Aningaasat taakkua kingusinnerpaamik novembarip aappaani akilinngikkunigit ernialersorneqassasut allagarsiamini aamma atuarsinnaavaa.

- Akunnattoornarpoq, nammineq qinnutiginikuunnginnatsigit tapisiaqarnissarput. Aamma nammineq naatsorsuinikuunngilagut immersuinikuunngilagut, oorit nueriataaginnarnikuupput, taanna oqarpoq.

Marie Didriksen siullermeerluni 2025-mi marsimi Suila-tapisivoq. Tapisianilu siulliit kontominut ikineqareersut ilumut pinissaanut pisinnaatitaaffeqarnerluni nalornilerami Akileraartarnermut Aqutsisoqarfimmut paasiniaavoq.

- Paasitinneqarpunga ajunngilarooq, taamaattussaasimavoq, sussanngilanga. Upperalugit akueriinnarpakka nakkartalersut.

Tapisisarnerup suliarineqarnera akerliuffiginiarpaa

Marie Didriksen Suila-tapisivallaarnermi kingorna akiligassaqalersuni kisimeeqqajanngilaq. Innuttaasummi 7.521-t katillugit 31,9 mio. koruuninik akiligassaqalersut, Akileraartarnermut Aqutsisoqarfiup naatsorsueqqereerluni paasivaa.

Taamaattumik Nuummi arfininngorpat oktobarip qulinganni akerliussutsimik takutitsisoqarnissaa aaqqissuuppaa.

AAMMA ATUARUK

Innuttaasut 7.161-it Suila-tapisivallaarsimallutik akiliisussanngortut: – Paatsuunganarujussuarpoq

Akerliussutsimik takutitsisussat Amisuni nal. 13.00 naapissinnarlutik Inatsisartut ataatsimiittarfiata tungaanut ingerlaaqatigiissapput. Innuttaasut 350-it sinnerlugit akerliussutsimik takutitseqataanissamut soqutiginnillutik Facebookikkut sisamanngornermi nalunaarutigisimavaat.

Sooq kukkusoqarsimanera aamma suliap qanoq ingerlanneqarsimanera akerliussutsimik takutitsinikkut akissutisissallugu Marie Didriksenip neriuutigaa. 

- Susoqarmat kukkusoqarsimanera suliallu qanoq ingerlanneqarsimanera paaserusupparput. Aamma innuttaasut sooq maannakkut aatsaat akiligassaqalernersut. Pingajuattut neriuutigaarput naapertuunnerusumik aaqqiisoqassasoq, Marie Didriksen oqarpoq.

Innuttaasut ajortumik isumaqaratik iliuuseqarsimasut naapertuunnerusumik pineqartariaqartut taanna aamma isumaqarpoq.

- Taamaattumik akiligassiineq eqqarsaatigineqaqqittariaqarsoraara, aamma erniat allallu kinguneri suliap misissuiffigineqarnerani unitsinneqarallartariaqartut isumaqarpunga.

Naatsorsuinerni kukkunerit arlallit

Akileraartarnermut Aqutsisoqarfik Suila-tapit pillugit piffissami sivitsortumi ajornartorsiuteqarpoq.

Suliffeqarnermut ilanngaat 2024-mi akileraartarnermik aaqqissuusseqqinnermi atuutilertussatut akuerineqarpoq, sulinerup orniginarnerulernissaa siunertarineqarluni.

Marie Didriksenilli oqarnera naapertorlugu innuttaasut isertitakinnerusut ilanngullugit akiligassinneqarmata naapertuilluanngitsuliortoqarpoq.

Facebookikkut saqqummiussereernermi kingorna innuttaasorpaalunnit attavigineqarsimavoq.

- Ilai utoqqalinersiallit, ilai angajoqqaat kisimiittut, ilai akissakinnerit. Taakku aamma akunnattoornarami eqqugaasimasut. Imatut paasinarami suila-tapit pissakinnernut iluaqutissaat, kisianni aamma pissakinnerit eqqugaapput akiligassitsillutik.

Akiligassinneqarneq ilaqutariippassuit aningaasaqarnerannut eqquinerlussasoq aarleqqutigaa.

- Juulli qalliartorpoq, akiligassitserujussuarpugut. Ulluinnarni aningaasaqarnerput ajalusoortilaarlugu ikerinnaq akiligassinneqaratta. Taanna aamma isumaqatiginnginnakku taamaattussaasoq. Arlaatigut aaqqiissummik nassaartoqarsinnaassooq, oqaannarnatik “Kukkusimavugut, ilissi akilissuarsi kukkunerput.”

Marie Didriksen akerliussutsimik takutitsinissamut tapersersuisunit Nuup avataaniit attavigineqarsimalluni oqaluttuarpoq, illoqarfinnili allani akerliussutsimik takutitsisoqarnissaanik pilersaaruteqartunik tusagaqarsimanngilaq.

Arfininngorpat oktobarip qulinganni nal. 13.00 akerliussutsimik takutitsisoqassaaq. Peqataaniartut Amisuni naapissapput, kingornalu Inatsisartut ataatsimiittarfiannut ingerlaaqatigiissallutik.