Sukumiisumik nalunaarusiaq: Kalaallit Nunaanni ima ilisimatusartoqartigaaq

Ilisimatusarnermik suliaqartut peqatigiiffiata Arctic Hub nalunaarusiaq siullermeerluni Kalaallit Nunaanni ilisimatusarnerup annertussusianik takussutissiisoq pingasunngornermi saqqummiuppaa.

Nalunaarusiami ilisimatusartut amerlasuut suminngaanneernerat sumilu ilisimatusarnersut allaaserineqarput. Kalaallit Nunaannilu ilisimatusarnerup annertussusiata, nalunaarusiami ersersinneqarpoq.

Arctic Hub tusagassiutitigut nalunaarummini ilisimatitsivoq piffissami 2015-imiit 2024-mut ukiut tamaasa Kalaallit Nunaat pillugu, ilisimatusarnikkut saqqummersitat 1.700-niit 1.800-t missaanniittut saqqummersinneqarsimasut.

- Tamatuma assigiinnarpaa Kalaallit Nunaanni innuttaasunut 1.000-inut ilisimatusarnermut tunngasunik 28-nik allaaserisaqarpat, taamaattumillu Kalaallit Nunaat innuttaasut amerlassusiat eqqarsaatigissagaanni silarsuarmi ilisimatusarnermut tunngasunik allaaserisaqarfiunerpaavoq, Arctic Hub allappoq.

Ilisimatusartut amerlassusaat ilisimatusarnermilu saqqummersitat nunarsuarmi Kalaallit Nunaata soqutigineqarluarneranut takussutissaasut, Arctic Hubimi allattoqarfimmi pisortaq Avijâja Rosing-Olsen oqarpoq.

– Nalunaarusiamilli aamma erserpoq ilisimatusarnerit tamakku tamarmik Kalaallit Nunaannut qanoq naleqarnerulersinnaanerat misissuivigisariaqaripput, Avijâja Rosing-Olsen oqarpoq.

Ilisimatusarnermi saqqummersitani taamaallaat 10 procentii kalaallimik suleqateqarput.

Arctic Hub naapertorlugu ilisimatusarnermi kalaallinik suleqateqartoqartinnagu sermeq, silap pissusia avatangiisillu pillugit sammineqartarput. Ilisimatusarnerli kalaallinit ilisimatusartunik immaqaluunniit ingerlatsivinnik suleqateqartoqartillugu, peqqissuseq, inuiaqatigiit sumiiffimmilu inuuneq initusarpoq, kattuffik ilisimatitsivoq:

– Ilisimatusarnerit amerlanersaasa silap pissusianut, sermimut avatangiisinullu tunnganerujussuusarnerat ajornartorsiutaasariaqanngilaq. Suliaqarfinnut taakkununnga tunngatillugu Kalaallit Nunaat nunani tamalaani pingaaruteqarluinnarpoq. Nalunaarusiamili erserpoq ilisimatusarnerit ataatsimut isigissagaanni equngassuteqartut. Taamaattumik oqallisigineqarsinnaasunut pingaarutilinnik tunngavissiivoq, Avijâja Rosing-Olsen oqarpoq.

Arctic Hubip inerniliussaa alla tassaavoq USA nunani Kalaallit Nunaat pillugu ilisimatusarnikkut allaaserisat amerlanerpaat saqqummersittartuni Canadamit 2024-mi qaangerneqarsimasoq.

Arctic Hub naapertorlugu amerikamiunit Kalaallit Nunaat pillugu ilisimatusarnikkut saqqummersitat 2015-imiit 2024-mut 23 procentinik ikileriarsimapput.

Kalaallit Nunaanni Ilisimatusarnermut nalunaarusiaq Aarhus Universitetimi Center for Forskningsanalyse-mit Arctic Hub sinnerlugu suliarineqarpoq, Arctic Hubillu nittartagaani atuarneqarsinnaavoq.