Tarnikkut nappaatillit arlaleriarlutik pinngitsaalillugit iliuuseqarfigineqartariaqartut

Inuup eqqarsartaatsimigut nappaatillip assigisaalluunniit nappaateqartup, illersorneqarsinnaanngitsutut nalilerneqarpat tarnikkut nakorsat pinngitsaaliillutik iliuuseqarsinnaapput, ilaatigut pinngitsaaliilluni uninngatitsisinnaallutik.

Pinngitsaaliilluni taama iliuuseqarnerit ingammik inersimasunut inuusunnerusunut atorneqartartoq 2024-imi tarnikkut nappaatillit pinngitsaaliissummik unitsitat allatigullu pinngitsaaliissummik iliuuseqarfigineqartut atuarneqarsinnaavoq.

Pinngitsaaliilluni unitsinneqartut 2024-mi 47-t nalunaarsorneqarput. Ukiut agguataarnerat naapertorlugu pinngitsaaliilluni unitsinneqartut 20-niit 29-nut ukiulinni amerlanerupput, taakkunani 21-t nalunaarsorneqarsimapput.

Angutit arnallu akornanni agguataarinermi arnat amerlanerupput, pinngitsaalillugit unitsinneqarsimasut 28-t arnaapput 19-illu angutaallutik.

Pinngitsaaliilluni uninngatitsisarnerit napparsimasut peqqissusaat pissutigalugu imaluunniit allanut imminnulluunniit ulorianartuunerat pissutigalugu uninngatinneqarnersut aamma immikkoortinneqarput. Pinngitsaaliillugit uninngatitassat amerlanerpaartaat navianartorsiornerat pissutigalugu uninngatinneqarput, taakku 33-upput, 14-illu napparsimasut peqqissusaat pissutigalugu uninngatinneqarlutik.

Pinngitsaaliissummik aalaakkiinerit uninngasunit amerlanerusut

Tarnip nappaatilinnik sullissinermi inuk imminut inoqamminulluunniit ulorianartorsiortitsisinnaappat pinngitsaaliissummik aalaakkiinerit atorneqarsinnaapput. Pinngitsaaliissummik aalaakkiinermi qiterutit, paffinnut singernernullu ungerutit aaqqatillu atorneqartarput.

Napparsimasut 15-it pinngitsaalillugit aalaakkiinerit katillugit 35-riarluni pisimasut, 2024-mi ukiumoortumik nalunaarusiami takuneqarsinnaavoq. Napparsimasut ataasiakkaat arlaleriarlutik aalaakkerneqarsimaneranik takussutissiilluni.

"Pinngitsaaleeriaatsini arlalinni pinngitsaaliinerit napparsimasunit amerlanerunerat, naatsorsuinerit takutippaattaaq, tamannalu napparsimasut ilaasa ikittut arlaleriarlutik pinngitsaaliissummik iliuuseqarfigineqarsimanerannik tikkuussivoq. Tamanna ilaatigut pinngitsaaliissummik unitsitsinerni, pinngitsaaliissummik uninngatitsigallarnermi pinngitsaaliissummillu aalaakkiinerni atuuppoq pisunillu paasilertoruminaatsunik utikattunillu paasinarsisitsilluni," nalunaarusiami allassimavoq.

Katillugit 20-riarluni qiterusiisoqarsimavoq, 15-eriarlunilu ungerusiisoqarsimalluni.

Pinngitsaaliilluni aalaakkiinerit agguaqatigiissillugu ulloq ataaseq, akunnerit arfineq-marluk minutsillu 55-it aalaakkiisoqarsimavoq. Ungerusiinermi piffissaq sivikinnerpaaq atorneqartoq minutsimi pisimavoq, sivisunerpaamillu ullut tallimat, nalunaaquttap-akunneri marluk minutsillu 30-t.

AAMMA ATUARUK

Tarnikkut nappaatillit naammagittaalliuuteqartarfiata pinngitsaaliilluni akuliunnerit sisamaagaangata pingasut akuerisarai

Pinngitsaaliissummik malittarineqarneq

2019-imi tarnikkut sullissinermi inatsit nutarterneqarpoq, nalunaarusiamilu piffissami pineqartumi atorneqarluni.

Dronning Ingridip Napparsimavissuani tarnip pissusaanik immikkoortortaqarfimmi nakorsaanerup napparsimasoq angerlartinnagu katsorsarneqarnerminik unitsitsinissaa aarlerinartoqartippagu, napparsimasoq pinngitsaalineqarluni napparsimavimmi uninnganermi kingorna malittarineqarsinnaavoq.

Napparsimasoq angerlartitaareerluni pisariaqartitaminik katsorsarneqartariaqarpat pinngitsaalillugu malittarineqarsinnaavoq.

Iliuuseqarnerup tamatuma angerlartinneqareernermi malitseqartitsinertut isikkoqarnini, nammineersinnaajunnaarsitsinermit pinngitsaaliissummillu pinasuagassanit allanit immikkoorutigaa.

Napparsimasut pingasut — arnaq ataaseq angutillu marluk — agguaqatigiissillugu 50-inik ukiullit pinngitsaalillugit 2024-mi malittarineqarput.

Taakkunannga marlunni malittarinninneq ingerlanneqarpoq, taakku angerlareernermik kingorna nakorsartinnissaminnut takkutinngitsoornerat pissutigalugu pingasoriarlutik politiit ikiorsiullugit aaneqarput.