Tarnikkut nappaatillit naammagittaalliuuteqartarfiata pinngitsaaliilluni akuliunnerit sisamaagaangata pingasut akuerisarai
Kalaallit Nunaanni tarnikkut napparsimasut naammagittaalliuuteqartarfiat amerlanertigut nakorsat tarnikkut nappaateqartunut pinngitsaaliissummik iliuuseqartarnerannik isumaqatiginnittarpoq. Tamanna ukiumut nalunaarusiaanni 2025-moortumi takuneqarsinnaavoq.
Pinngitsaaliissummik iliuuseqarneq pillugu naammagittaalliuutit 16-it Kalaallit Nunaanni Tarnikkut Napparsimasut Naammagittaalliuuteqartarfiata 2025-mi suliarisimavai.
Assi: Bo Amstrup/Ritzau Scanpix
Nunatsinni tarnikkut nappaatillit naammagittaalliuuteqartarfiat pinngitsaaliissummik katsorsartinnerit assigiinngitsut pillugit naammagittaalliuutinik 14-inik 2025-mi tigusaqarsimavoq.
Suliani aqqaneq-marlunni aalajangiisoqarpoq, suliallu kingulliit marluk utertinneqarput. Naammagittaalliuteqartarfiup pinngitsaaliissummik katsorsaanerit naammagittaalliutigineqartut 75 procentii akuerisimavai.
Tamanna tarnikkut nappaatillit naammagittaalliuuteqartarfiata 2025-mut ukiumoortumik nalunaarusiaani atuarneqarsinnaavoq.
Naammagittaalliuutit katillugit 16-it suliarineqarput. Taakku pinngitsaaliilluni unitsitsinernut, pinngitsaaliilluni katsorsaanernut, pinngitsaaliilluni aalajangiinernut allanullu agguataarsimapput.
Pinngitsaaliilluni akuliunnerit aqqaneq-marluk tarnikkut nappaatillit naammagittaalliuuteqartarfiata akuersissutigai.
Tarnikkut nappaatillit naammagittaalliuteqartarfiata ukiumoortumik nalunaarusiaannit 2025-meersumit takussutissiaq.
Suliaq ataaseq Kalaallit Nunaanni eqqartuussivimmut ingerlateqqinneqartoq
Naammagittaalliuutit aqqaneq-marluusut ilaat sisamat unitsinneqaprut. Tassa naammagittaalliuutip suliarineqarnerata nalaani pinngitsaaliilluni iliuuseqarneq unitsinneqarpoq.
Tarnimikkut nappaateqartunut naammagittaalliuuteqartarfiata naammagittaalliuutit suliarinissaannut ullut agguaqatigiissillugu 7,58-it atortarpai.
Suliani sisamani napparsimarulunnermik nalunaarusianik allattuineq pinngitsaaliissummik uninngatinneqarnermillu nalunaarsuinerit peqqissaarnerusariaqartut tarnimikkut nappaatillit naammagittaalliuuteqartarfiata piumasarisimavaa.
Suliami ataatsimi nakorsaaneqarfimmit allagartaq amigaataasoq eqqartuussiviup isornartorsiorpaa, aamma suliani arlalinni napparsimasup naammagittaalliorneraniit naammagittaalliuutip tarnimikkut nappaateqartunut naammagittaalliuuteqartarfimmi ingerlateqqinneqarnerata tungaanut piffissaq sivisuallaartoq ingerlasimavoq.
Tarnimikkut nappaatillit naammagittaalliuuteqartarfiata aalajangiinerata ilaat 2025-mi naammagittaalliuutigineqarpoq. Suliarli suli Kalaallit Nunaata Eqqartuussiviani suliarineqanngitsoq naammagittaalliuut atorunnaarsinneqarpoq.
