Trump nutaamik oqariartuuteqartoq: Umiarsuarmik napparsimmavimmik Kalaallit Nunaanukartitsiniarpoq
USA-p præsidentia Donald Trump inuit attaveqatigiittarfiutimini Truth Socialimi napparsimasunik katsorsaajartortitsilluni umiarsuarmik napparsimmavimmik Kalaallit Nunaannukartitsiniarluni allappoq.
Præsidenti Donald Trump Kalaallit Nunaannullu immikkut aallartitaq Louisianamilu guvernøri Jeff Landry arfininngormat nereqatigiipput.
Foto: Aaron Schwartz/Reuters/Ritzau Scanpix
Donald Trump nunarput pillugu nutaamik oqariartuuteqarpoq. USA-p immikkut aallartitaa Jeff Landry suleqatigalugu umiarsuarmik napparsimmavimmik Kalaallit Nunaannukartitsiniarluni allappoq:
- Louisianap guvernøritsialassua Jeff Landry suleqatigalugu inunnut napparsimasorpassuarnut katsorsarneqarneq ajortunut passusisussamik umiarsuatsialassuarmik Kalaallit Nunaannukartitsissaagut, præsidenti allappoq, imalu erseqqissaalluni:
- Aggerpoq!!!
Oqariartuut assimik AI-mit pinngortinneqartumik umiarsuarmik napparsimmavimmik Amerikamiut erfalasuannik erfalasulimmik assitalerneqarsimavoq.
Donald Trumpip oqariartuutaa assimik uannga ingiaqateqartinneqarpoq.
Foto: @realDonaldTrump / Truth Social
Præsidentip Amerikami oqartussanit paasissutissanik erseqqinnerusunik innersuussinaniluunniit taama ingerlatsinerup qanoq sunniuteqarnissaanik allamik innersuussinngilaq.
Jeff Landryp Trumpip ivertitaata X-ikkut ingerlateqqippaa, tassanilu præsidenti qutsavigalugu, immikkoortumilu pingaarutilimmi tassani suleqatiginera tulluusimaarutigalugu allalluni.
Trumpip illersortaasa arlallit Danmarkip nunatsinni peqqissutsikkut pissutsinik pitsaanngitsunik atugassaqartitsinera siusinnerusukkut isornartorsiortarpaat. Peqqinnissaqarfimmut oqartussaaffik 1992-mi tiguneqarpoq nunatsinnit akisussaaffigineqarluni. Danmarkilli kalaallinut napparsimasunut Danmarkimi katsorsarneqartunut ukiumut 200 milliuunit koruuninik akiliisarnissaa ukioq manna isumaqatigiissutigineqarpoq.
Donald Trumpip tapersersortaasalu sammisamik qajannartumik eqqartuiniassagunik, taamaappat peqqinnissaqarfiup eqqartornissaa eqqorluarpaat. Peqqinnissaqarfiummi sullissinera pitsaassusaalu oqallisaakkajupput.
Peqqinnissaqarfik ilaatigut taartaasunut aningaasartuuterpassuarnit tatineqarpoq. Naalakkersuisut peqqissutsimut siunnersuisoqatigiivi nalunaarusiaminni siullermi, 2025-mi ukiakkut saqqummersumi, inerniliipput peqqinnissaqarfik “ataavartumik sulisussaaleqinermik taartaasartunillu amerlavallaartunik” ilungersuuteqartoq.
USA-p nunami isumannaallisaanermut tunngatillugu nunarput pisariaqartikkaa Trumpip arlaleriarluni oqaatigisareeraalu, Amerikamiut isumannaallisaanikkut soqutigisaat qanoq ililluni eqquutsinneqarsinnaanersut anguniarlugu USA-p, Kalaallit Nunaata Danmarkillu akornanni isumaqatigiinniartoqalerpoq.
Naalakkersuisut qallunaallu naalakkersuisuisa erseqqissarpaat isumaqatigiinniarnermi kunngeqarfiup killeqarfii, tassaasut kunngeqarfiup kisimi oqartussaanera nunallu ataqatigiinnera kiisalu kalaallit namminneq aalajangiisinnaatitaanerat ataqqineqartariaqartut.
Sermitsiamit Naalakkersuisut pisumi oqaaseqartinniarneqarput.
