Avatangiisinut pitsanngorsaataasinnaasunik suliniutillit tamarmik aningaasanik qinnuteqarsinnaalertut
Avatangiisinut aningaasaateqarfik avatangiisinut pitsanngorsaataasinnaasunut suliniutinut 10 millionit koruunit ukioq manna immikkoortinneqarput, taakkununnga eqqagassalerineq, anartarfilerineq, imaani eqqakkat aammalu aalisarfinni piniariarfinnilu saliinissamut suliniutinut atorneqassapput.
Assi toqqorsivimmiit: Nina-Vivi Møller Andersen / Sermitsiaq.AG
Avatangiisinik pitsanngorsaataasinnaasunik isumassarsiatsialannik peqartut maanna Avatangiisinut Aningaasaateqarfimmit aningaasaliiffigineqarnissamut qinnuteqarsinnaalerput.
Naalakkersuisut millionilippassuit qanoq agguaanneqassanersut siumut aalajangereerpaat:
- 6 mio. koruunit ikuallaavinni eqqagassalerinermilu allani suliniutit aaqqiivigineqarnissaannut.
- 1 mio. koruunit anartarfilerinermi atortunik suliniutit aaqqiivigineqarsinnaasunut.
- 1,4 mio.kr. suliffeqarfiit, sullissiviit, inissiat eqqaanni imaluunniit asimi eqqakkanik isumaginninnermut.
- 1,4 mio. koruunit aalisarnermi piniutaarsiutinut imaanilu eqqakkanik isumaginninnermut.
- 228.164,91 koruunit aalisarfinni piniarfinnilu saliinermut.
Naalakkersuisut
ukioq manna aningaasaleeqataanissamut piumasaqaatit
aaqqissuuteqqippaat, taamaalilluni inuit amerlanerusut aningaasanik
qinnuteqarsinnaalerput. 10.000 koruunit ataallugit qinnuteqartunut
aningaasaleeqataanissamut piumasaqaateqartoqanngilaq.
10.000 koruunit sinnerlugit qinnuteqartut
10 procentimik aningaasaleeqataassapput.
-
Naalakkersuisut avatangiisinut politikkiat innuttaasunit
takuneqarsinnaassaaq malugineqarsinnaassallunilu –
aalajangersimasuussaaq ersarissallunilu. Uannut Avatangiisinut
Aningaasaateqarfimmi politikkikkut aalajangiinerit nunaqarfinnut,
illoqarfinnut pinngortitamullu politikkikkut aalajangiinerit
pitsannguiniarnerillu pingaaruteqarput. 2026-mi Naalakkersuisuni
eqqakkat, imartatsinni avatangiisit piniariartarfiillu pillugit
nukingernartorsiorfiusinnaasunut aningaasaliinissamik
salliutitsissaagut. Taakkunani nukingernartut ersarinnerpaammata –
aammalu aaqqiissutissanik maannarpiaq pisariaqartitsiffiummata.
-
Tamatuma peqatigisaanik aningaasaleeqataassuteqarnissamut
piumasarineqartut appartissavagut, taamaalilluni amerlanerusut –
taakkununngalu innuttaasut ilanngullugit – najukkaminni
akisussaaffimmik tiguseqataasinnaalissammata. Taamaalilluta
attanneqarsinnaasunik angusaqassaagut –taamaalilluta aamma suli
amerlanerusut pinngortitami avatangiisinilu najukkatsinni
eqqiluitsuutitsiniarnermi innuttaasut suleqataasinnaalernissaat
angussavarput, aalisarnermut, piniarnermut, nunalerinermut, imminut
pilersornermut avatangiisinullu naalakkersuisoq Peter Borg oqarpoq.
Paasisaqarnerorusukkuit tapiissutinullu
qinnuteqarniaruit
una tooruk
