Immikkut ilisimasalik Trumpip umiarsuaa napparsimavik pillugu: Kalaallit Nunaannik eqqunngitsumik takutitsisinnaavoq

Kalaallit Nunaanni peqqinnissaqarfik ilungersunartorsiorpoq amigaateqarlunilu – USA-lli præsidentiata toqqaannanngitsumik isornartorsiuinera eqqunngilaq.

Taama aningaasarsiornermi professori soraarneq, assigiinngitsunillu suliaqarluni nunatsinni peqqinissaqarfimmik nalersuisartoq, Kjeld Møller Pedersen naliliivoq.

- Eqqunngilluinnartoq isumaqarpunga, Kjeld Møller Pedersen Trumpip oqariartornera innersuussutigalugu oqarpoq.

Sapaammut unnuaani Amerikamiut umiarsuuaat napparsimavik “inuppassuarnik napparsimasuni, naammattumillu tassani passunneqarneq ajortunik passussiartorluni Kalaallit Nunaannukartoq” Trumpi inuinnarnut qarasaasiakkut naapeqatigiittarfiutimini Truth Socialimi allappoq.

Kjeld Møller Pedersen Kalaallit Nunaanni Peqqissutsimut isumalioqatigiissitamut, 2024-mi nunatsinni peqqinnissaqarfik pillugu isumaliutissiissummik, peqqinnissaqarfiup ilungersunartorsiorneranik inerniliisumi siulittaasumut tulliuvoq.

Illersornissamut ministerip umiarsuarmik napparsimavimmik ilisimasaqannginnerartoq

Ukioq ataasingajak qaangiuttoq Nunatsinni Peqqinnissamut Siunnersuisooqatigiit siulittaassuuffigaa, ukiumoortumi nalunaarummik peqqinnissaqarfiup suli ilungersunartorsiorneranik inerniliisumik saqqummiipput.

Aalajangersimasumilli atorfeqartut pingaarnertut pineqarnerat taassuma erseqqissaatigaa.

- Ilungersunartorsiornerannut ataavartumik sulisussaaleqinerat patsisaavoq. Sulisullu qiviaraanni atorfeqartut sivikitsumik taavaniittarput. Ikippallaat aalajangersimasumik tappavaniittarput, taanna oqarpoq.

Tamannarpiarlu assersuutigalugu umiarsuup napparsimaviup aaqqissinnaanngilaa.

Umiarsuarmik napparsimavimmik Kalaallit Nunaannukartitsinermik ilisimatinneqarsimanani, illersornissamut ministeri Troels Lund Poulsen (V) sapaammi ullaakkut P1 Morgenimut oqarpoq.

Tamatumalu saniatigut nunatsinni innuttaasut pisariaqartitsinertik malillugu peqqissutsimikkut katsorsarneqartartut ilanngullugu erseqqissarpaa.

- Immikkut ittumik katsorsarneqarnissamik pisariaqartitsigaangamik, tamanna Danmarkimi naammassisarpaat, taanna oqarpoq.

Immikkut ilisimasaqarfiit killeqartut

Kalaallit Nunaata peqqinnissaqarfimmut akisussaaffik ukiut 30-t sinnerlugit matuma siorna tiguaa.

Kunngeqarfimmi qeqertat avannarlersaat peqqinnissamut immikkoortumut Danmarkimik isumaqatigiissuteqarpoq. Tamatuma ilaatigut kalaallit napparsimasut immikkut ilisimasalinnik katsorsarneqarnissamik pisariaqartitsisut, tamatumannga Danmarkimi ikiorserneqartarnerat kinguneraa.

Tamatuma saniatigut danskit immikkut ilisimasallit assersuutigalugu qaammammut ullualunni suliartorlutik Kalaallit Nunaannukartartut, Kjeld Møller Pedersen oqarpoq.

Kalaallit Nunaannimi qanoq annertutigisumik immikkut ilisimasaqartoqarsinnaanera killeqarpoq.

- Innuttaasut 57.000-t missaannaanniitsillugit qanoq annertutigisumik immikkut ilisimasalinnik peqarnissaq killeqarpoq, taanna oqarpoq.

2025-mut ukiumoortumik nalunaarusiami assersuutigalugu Danmarkimut sanilliullugu Kalaallit Nunaanni tartuliinissamut napparsimasut ikippallaartut inerniliutaavoq.

Danmarkimi ukiumut 250-t missaat nutaamik tartulersittarput, naatsorsueqqissaarnikkullu isigalugu nunatsinni ukiumut marluk missaanniissapput.

- Tamanna akisussaassuseqannginnerussaaq, nakorsammi assersuutigalugu ukiumut ataatsimik marlunnilluunniit tartuliissagunik, kingunerluttoqarnissaanut ilimanaat annertuallaarujussuassaaq, Kjeld Møller Pedersen oqarpoq.

Nunatsinni Peqqissutsimut Siunnersuisooqatigiit ukiumoortumik nalunaarusiaminni kingullermi peqqinnissaqarfiup ajornartorsiutai ataatsimut isigalugu sulisunik aalajangersimasumik atorfilinnik amigaateqarnermik sorlaqartut inerniliutigaat.

- Peqqinnissaqarfimmi pitsannguinissamut periarfissat amerlasuut atorfinitsitsinissamik sulisunillu tigumminniinnarsinnaanermik toqqammaveqarput, aaqqissutillu ajornaatsut ajoraluartumik nassaassanngitsut, oqarput.