Tunumi internetsi nutaamik suleqatigiissusiortoqarneratigut sukkanerulersoq
Tusass Eutelsatimik suleqateqalernermigut OneWeb-imut attaveqaatit atorlugit Tunumi sukkanerusumik internetseqalersitsivoq.
Assi: Tusass
Tusassip Tunumi atuisut sukkanerusumik internetseqalersinnaanerat marlunngornermi periarfissanngorpaa. Tamatumalu saniatigut atuisuuffik nutaarluinnaq maannamut sanilliullugu pitsaanerusumik attaveqarfiusinnaasoq atulersinneqarpoq.
Allannguineq Tasiilami Ittoqqortoormiunilu atuisut kiisalu najugaqarfinni internetsimik periarfissaqarnerulersut, Tusass tusagassiuutitigut nalunaarummi allappoq. Suliffeqarfiup Eutelsatimik isumaqatigiissuteqarneratigut OneWeb-imut attaveqalersinnaaneq pissutaalluni nutarterisoqarpoq.
Attaveqaasersueriaatsit marluk ataatsimoortinneqartut
Tusassip attaveqaasersueriaatsit marluk, GreenSat qaammataasatigut attaveqaat maanna atuuttoq OneWebimullu attaveqaat nutaaq, ataqatigiissaarinermut sukkanerusumik aalajaannerusartumillu internetseqalerpoq:
TUNUMI ATTAVEQAATIT SUKKANERUSUT
Atuisut qaammataasatigut attaveqaatillit periarfissanik marlunnik maanna toqqaasinnaasut, tusassa allappoq: 3/1 Mbit 299 koruunilik aamma 6/2 Mbit 599 koruunilik.
Atuisut decembarip 16-ianiit attaveqaatit 6/2 Mbit-imiit 10/2-nngortinneqassaaq. Akia tassani allanngortinneqassanngilaq.
6/2-mik atuisuusut sukkassutsimut nutaamut qaffanneqarumaartut.
Atuisuuffik nutaaq aamma periarfissaalerpoq, tassa 15/5 Mbit 799 koruunilik.
- Attaveqaasersueriaatsit taakku ataatsimut atorsinnaannerannik suliniuteqarnerput assut tulluusimaarutigaarput. Qaammataasatigut attaveqaateqartunut tamanna internetitigut attaveqaasersuinermi nutaarsiassatsialaavoq. Ukiumilu naalersumi aamma 2026 ingerlanerani misissuinerit tassuunatigullu aaqqissuinerit ingerlatsissavagut, attaveqaatit pitsaanerpaaniitsinniarnissaat anguniarniarlugu, IT-mik Sullissinermi Pilersuinermilu pisortaq aammalu Next Gen Satellitimut programmip aqutsisoqarfianni siulittaasoq Thomas Hansen oqarpoq.
Avannaamiut suli utaqqigallassasut
Tusassip qaammataasamut attaveqarnermut aningaasaliinera sulilu annertuumik aningaasaliisarsimanera aaqqiissutissap nutaap pilersinneqarneranut pissutaasoq, aamma oqarpoq:
- Una aaqqiineq piffinni qaammataasatigut attaveqaasersukkani, attaveqaatit pitsanngorsarniarlugit aningaasaliisimanitsinnit aallaaveqarpoq, tamannalu siunissami pitsaanernik pilersitsivigisinnaanissaat suli takorluugaalluni.
Qaanaami Savissivimmilu OneWeb-imut tigusissutinik suli ikkussuisoqanngimmat qaammataasamut suli attavinittoqarsinnaanngitsoq, Tusass allappoq.
- Qaanaamut Savissivimmullu tikilluta ikkussiartorsimaleriarutta atuisut nutaanik aamma periarfissaqalerumaarput, Tusass allappoq.
