Ullormut nalunaarusiaq: Tasiilami kinguaassiutitigut pinngitsaaliineq Ilulissanilu nakuuserneq

Kalaallit Nunaanni Politiit ulloq unnuarlu ulapaarput.

Nuummi politiit aqqusinerni amerlanerunerisa saniatigut kinguaassiutitigut pinngitsaaliisoqarsimanera nakuusertoqarsimaneralu nalunaarutigineqarsimasut ulloq unnuarlu nalunaarusiami takuneqarsinnaavoq.

Tasiilaq

Arnaq 33-nik ukiulik marlunngornermi februaarip 18-ianni nalunaaqutaq 15.29 sinitsilluni angummit 19-inik ukiulimmit pinngitsaalineqarluni arneriffigineqalerluni itersimalluni politiinut nalunaarpoq.

Politiit naapertorlugit angut 19-inik ukiulik pasineqarpoq. Taanna suliamut atatillugu tigusarineqarpoq, inatsisilli tunngaviusut malillugit killisiorneqarnissaminut naammattumik uppernarsaatissaqanngimmat iperagaavoq.

Suliaq kinguaassiutitigut pinngitsaaliisimanertut suli misissuiffigineqarpoq.

19-inik ukiulik navianartorsiortitsisutut nalilerneqarsimanngimmat Tasiilami innuttaasut suliamut atatillugu toqqissisimasinnaasut politiit ilisimatitsipput.

Ilulissat

Ilulissani angerlarsimaffimmi eqqissiviilliornermut atatillugu angut 32-nik ukiulik pingasunngornerup unnuaani nalunaaqutaq 03.50 tigusarineqarpoq.

Politiit naapertorlugit angutip taassuma akuersissuteqarani angutip 37-nik ukiullip angerlarsimaffianut isersimavoq, tamatumalu kingorna nakuusertoqalersimalluni. Nakuusersimasutut angerlarsimaffimmilu eqqissiviilliortitsisimasutut unnerluunneqarpoq.

Pisumi imigassartortoqarsimavoq.

Angut 32-nik ukiulik killisiorneqareerluni iperagaavoq. Pinerlineqartoq politiit naapertorlugit annerusumik ajoqusersimanngilaq.

Taama politiit pigaartuisa pisortaat Poul Kreutzmann nalunaarpoq.