Borgmesteri aalisagartassanik qinusoq: Kujataani suliffissanik nutaanik pilersitsisissigit

Ingerlatseqatigiiffiit qulit maannakkut aalisagartassiissutinik marlunnik Naalakkersuisut neqeroorutigisaanni neqeroortitsinermi ajugaanniupput.

Ingerlatseqatigiiffiit peqataasut arlallit tamat oqallinneranni ilanngussatigut maluginiaqqupput, tassanilu soorunami imminut tunngasut illersorpaat, taamaalillutik namminneq suliffeqarfiutiminnik pisassiissutinik pilerinartunik tunineqarnissaat tunngavilersorlugu.

Maannalu kommuni ataaseq oqallinnermut akuliuppoq. Kommune Kujallermi borgmesteri Malene Vahl Rasmussen (D) aalisarnermut naalakkersuisumut Peter Borgimut (D) ammasunik allagaqarpoq, tassanilu Naalakkersuisut pisiassiissutinik agguaassinermi nunap immikkoortuini isiginninniartariaqarnerat tunngavilersorpaa:

– Aalisartut kommunitta inuussutissarsiornerata ineriartornerani nukittuumik inissisimaqqilernissaat pisariaqartipparput. Aalisartoqarpugut, umiarsualiveqarpugut, tunisassiassaqarpugut inuiaqatigiillu ullumikkut inissaqartinneqartunit periarfissanik annertunerujussuarnik ilioriarsinnaasut innuttaraagut, borgmesteri allappoq, imalu nangilluni:

– Aalisartut tamarmik Nuummiissinnaanngillat Avannaaniissinnaanatillu. Kalaallit Nunaat tamarmi ineriartortariaqartoq pimoorukkutsigu, taava periarfissat aningaasaliinerillu siaruarlugit agguaannissaannut aamma sapijaassuseqartariaqarpugut.

Borgmesteri naapertorlugu kujataa aalisarnermi imarsiornermilu inuussutissarsiornermi annertuumik periarfissaqarpoq:

– Periarfissalli imminermini suliffissanik pilersitsineq ajorput. Isumalluutinut atuisinnaaneq ungasissumullu sammisumik aningaasaliinissamut periarfissaqarneq tamatumani pisiaraqarput, borgmesteri tunngavilersuivoq.

“Suliffeqarfik Narsami aalisakkerivimmik muteerniusumik pilersitsinissamut kissaateqarpat”, taava suliniummut taamaattumut ikorfartuinissaq inuiaqatigiit soqutigisariaqaraat innersuussutigaa.

Sermitsiap paasissutissat pissarsiai naapertorlugit ingerlatseqatigiiffiit neqeroortut ilaat ataaseq pilersaarummik taamaattumik suliaqarpoq.

Ingerlatseqatigiiffiit arfineq pingasut Neqeroortitsineq 1-tut taaneqartumi, kitaani 2.470 tonsinik qaleralittassanik, 1.950 tonsinik saarullittassanik 170 tonsinillu nataarnartassanik imaqartumi unammisut, Sermitsiap siusinnerusukkut oqaluttuaraa.

Tamatuma saniatigut ingerlatseqatigiiffiit marluk Neqeroortitsineq 2-mi, kitaani 2.470 tonsinik qaleralittassanik nunattalu kangiani 5.000 tonsinik saarullittassanik unamminermi akuupput.

Neqeroornissamut 24. Juli killigitinneqarpoq. Allaaserisap uuma suliarinerata nalaani ingerlatseqatigiiffiit sorliit pisassanniunnermi ajugaanerat Naalakkersuisut suli nalunaarutiginngilaat.