Burger King pisiniarfissuarmi nutaami ammartussanngortoq
Sarfaarsuit Center Nuummi Nuussuarmi ukioq manna kingusinnerusukkut ammassaaq. Tassanilu pisiniarfiit ilaat tassaassaaq Burger King biilerluni pisiniarfigineqarsinnaasoq.
Sarfaarsuit Center ukiup ingerlanerani ammassaaq.
Assi: Sarfaarsuit Center / Pisiffik
Sarfaarsuit Centerip sanaartorneqarnera pillugu nutaarsiassaqarpoq,
centeri ammarneqarnissaa ukioq manna kingusinnerusukkut
naatsorsuutigineqartoq, Pisiffik ilisimatitsivoq.
Pisiniarfik 9.000
kvadratmeterinik angissusilimmik Nuummi Nuussuarmi inissisimavoq,
quleriinnullu marlunnut agguataarneqarpoq arlariinnillu
pisiniarfeqassaaq.
Pisiffik
pisiniarfissuarnik sanaartortuuvoq, suliffeqarfillu naapertorlugu
pisiniarfiit JYSK, ILVA aamma Pisiffiup ulluinnarni atortussanik
pisiniarfia pineqarput.
Aammattaaq Burger
Kingi biilerluni pisiniarfigineqarsinnaasoq ammassaaq, Pisiffik
Facebookimi allappoq.
Sisimiuni Burger
King-it siullersaat ammarmat burgerinik pisiniat tulleriiaat ukiaq
amerlapput. Maannalu illoqarfiit pingaarnersaanni aamma
neriniartarfiuteqartoqalissaaq.
Pisiniarfissuarmi
nutaami maannamut sanaartorneqartumut sanaartornermi tuniniaavik
pilersinneqarnissaa sulissutigineqarpoq, suliffeqarfiullu
pisiniarfiit nutaat aamma periutsit nutaat pisiniarfissuarmiittussat
allat piffissami aggersumi saqqummiutissavai, Pisiffik
ilisimatitsivoq
”Nuummi
niuerfittut naapittarfittullu sumiiffimmik nutaamik pilersitsinissaq
assut qilanaaraarput. Tassaassaaq sumiiffik pisiariniakkanik
isumagisaqarnissamut pisariunngitsoq, aammali uummaarissoqarlunilu
misigisassatsialaqartoq,” Nonfoodtinut pisortaq Peter Thomsen
oqarpoq.
