Burger Kingimi tulleriiaattut

Kalaallit Nunaanni Burger King siullerpaaq sisamanngormat Sisimiuni ammarneqarmat whopperituuttoqangaatsiarpoq. Pisiffiup Sisimiuni pisiniarfeqarfittaani nutaaq ammarmagu tamanna pivoq.

Tassami Pisiffik Akikimik immikkoortortarujussuartaarsimagaluartoq Torrak Fashionilu suli anginerusoq ammaanersiornermi akikitsunik neqerooruteqaraluartoq Amerikamiut burgerii piumaneqarluarput.

- Burger King ilimagisatsinniit ingerluarneroqaaq. Tulleriiaattoqarpoq - ullunilu siullerni kaaviiaartitat aatsaat taama annertutigaat. Sisimiuni pisiniartartut neriniartarfik tigulluarpaat, Pisiffimmi pisortaq Per Steen Larsen Sermitsiamut oqarpoq.

Pisiniarfik 2.000 kvadratmeterinik angissusilik

Pisiniarfeqarfilli nutaaq Burger Kingiinnaanngilaq. Illorsuaq 2.000 quleriinni kvadratmeterinik angissuseqarami Pisiffiup immikkoortortaanut allanut inissaqarnerulersitsivoq.

- Tamanna uagutsinnut pingaaruteqarpoq, tassami maanna Sisimiut qeqqani angisuumik nutaaliaasumillu pisiniarfeqalerpugut. Illoqarfimmi tassani AKIKI-mik pisiniarfiuteqareerpugut, pisiniarfimmili nutaami pisisartut pitsaanerusumik sullinneqarnissaminnut periarfissaqalerlutillu, nioqqutissat amerlanerulerlutillu inissisimaffipput pisisartunit ornikkuminarnerulerpoq.

- Torrak Fashion nutaamik pisatsersugaalluni inimi ataatsimiippoq, qisunnik pisataqarluarpoq, tamannalu nuannernerulersitsillunilu atisanik takutitsilluarnerulersitsivoq, Per Steen Larsen oqarpoq, taassumalu aamma sulisuni ammaanersiornissap tungaanut ulloq unnuarlu sulisimasut nersualaarpai.

- Sisimiuni sulisut pisiniarfiit neriniartarfillu piffissaq eqqorlugu naammassiniarlugit ulapissimapput, sulilluarnerallu tulluusimaarutigaarput.

Sisimiuni nutaarluinnarmik pisiniarfeqarfeqalerneratigut niuertarfeqarfiup pisiniarfiisa allat eqqarsaatiginissaannut piffissanngorpoq.

- Siunissaq pissanganarpoq, illoqarfinnilu allani pissanganartunik suliniuteqassamaarpugut. Pisisartutta pisariaqartitaat tunniussinnaaginnarumallugit pisiniarfiutigut ukiuni tulliuttuni nutarsassallugit pilersaarutigaarput, pisortaq illoqarfinni allani Pisiffiup pisiniarfeqarfigisaani sorlerni qaqugulu susoqarumaarnersoq itinerusumik oqaaseqarumanngitsoq oqarpoq.

Sanaartorneq pilersaarutit malillugit ingerlasoq

Najukkami sanaartortitsisut suliffeqarfiat B. J. Entreprise pisiniarfeqarfimmik sanaartortuuvoq.

Sanaartorneq ukiut marluk affarlu ingerlanneqarpoq, oqaatigisariaqakkanilli unammillernartoqarsimanngilaq, Jeppe Mortensen, B. J. Entreprisemi pisortaq piginnittorlu, oqarpoq.

- Sanaartornerput ingerlalluarpoq, ilaatigut sanaartornissamik pilersaarusiortut, sanaartortut sanaartortitsisullu siornatigut suleqatigeereersimanerat pissutigalugu.

- Pilersaarusiorluakkamik sanaartorniassagatta sasnaartornissamut pilersaarusiornermi pimoorussivugut – tamannalu iluatsilluarpoq.

B. J. Entreprise annertuumik sanaartorneq pissutigalugu piffissaq eqqorlugu naammassinissaq siunertaralugu sulisussanik avataaniit tikisitsisimavoq.

- Pisiniarfeqarfiup sanaartornerata saniatigut suliniutit allat aamma suliarigatsigit sanaartornerup ilaani sulisussanik avataaniit tikisitsisariaqarsimavugut. Kisitsisit misissorakkit sanaartornerup affaa sanasunit nunaqavissunit suliarineqartoq – affaalu sanasunit avataaneersunit suliarineqartoq paasinarsivoq, Jeppe Mortensen nassuiaavoq.

B. J. Entreprisep pisiniarfeqarfik naammassigaluarlugu suliassaaleqinngilaq.

- Maanna Sisimiuni napparsimmaviup allilerneqarnera suliaraarput – Namminersorlutillu Oqartussat ilinniartunut inaataat aamma sanaartorpagut.

- Sisimiuni tulattarfiup tamarmi iluarsarneqarnissaa ukioq manna aallartinneqarlunilu 2026-mi ukiassalernerani naammassisussaq aamma aallartissavarput, Jeppe Mortensen oqaluttuarpoq.