Qaqortumi akunnittarfiliornissaq soqutigineqarluartoq

Qaqortumi suluusalinnut mittarfissaq nutaaq apriilimi atulerpat, takornariat tikittartut amerleriarujussuarnissaat naatsorsuutigineqarpoq. 

Ilaasunik angallassinerup nassatanillu assartuinerup pitsaanerulernera akunnittarfinnik, neriniartarfinnik, takornarianullu misigisassarsiortitsinernik assigiinngitsunik, maannakkorniit amerlanerusunik pisariaqartitsinermik kinguneqassaaq. 

Mittarfiullu nutaap ukiuni arlalinni oqaluuserineqareerluni, kiisami piviusunngortussanngornera, Qaqortumi inuussutissarsiornermut annertuumik kivitsissasoq, Kommune Kujallermi kommunalbestyrelsimut ilaasortaq, Simon Simonsen, Demokraatit, oqarpoq. 

Mittarfissaq nutaaq millionilikkaanik aningaasaliinissamut tunngavissaqalersitsisoq, Qaqortumi namminersortoq, Heidi Mortensen Møller oqarpoq. 

Taassuma akunnittarfik Inuit House aamma Café Heidi-mut ingerlappai - mittarfiullu aqqutaani nutaamik 60-inik initalimmik akunnittarfiliornissaminut pilersaaruteqarpoq.

Siunissamut nalornineq

Heidi Mortensen Møllerip unnuisarfik (vandrehjem) Siniffik Inn, maannakkut Inuit Housemik ateqartoq, kiisalu tassunga ataasoq Café Heidi-mut, 2000-imili ingerlappai. Ukiup siulliup ingerlanerani paasinarsivoq suliffeqarfik takornarianit atorluarneqartoq, taamaattumillu ineriartorteqqinnissaanut tunngavissaqarluartoq. 

Qaqortumi suluusalinnut mittarfiliornissaq pillugu politikkikkut oqallinneq aallartimmat, ingerlatap annertusarnissaa siunniussimallugu, taassuma oqaatigaa.

- Mittarfissaq pillugu oqallinneq 2016-imi annertuseqqimmat, unnuisarfiup allilernissaa siunniussimagaluarparput. Kisianni tamatuma kingorna mittarfissaq piviusunngorsinnaanersoq nalorninarsivoq.

- Tamannalu pissutaalluni siunissamut isigisumik pilersaarusiornissaq ajornakusoortorujussuusimavoq, taanna oqarpoq.

Mittarfissarli pillugu politikkikkut oqallinneq nutaaq ukiuni tulliuttuni aallarteqqimmat, siunissamut isumalluarnerulersimalluni, Heidi Mortensen Møller erseqqissaavoq.

Periarfissaq ammartoq

2018-imi Inatsisartut aalajangerput Kalaallit Nunaanni suluusalinnut mittarfissat nutaat pingasut Nuummi, Ilulissani Qaqortumilu sananeqassasut. Kisiannili Inuit Housep allilernissaanut atatillugu, 2018-imi 2019-milu Kommune Kujallermut nunaminertamik qinnuteqaatit tamarmik itigartinneqartut, Heidi Mortensen Møller oqarpoq.

Taassuma qanoq isilluni ingerlariaqqinnisani sivisuumik eqqarsaatigisimavaa. Siornali kommunalbestyrelsimut qinersisoqareernerata kingorna, Kommune Kujallermi kommunalbestyrelsip borgmesterillu nutaap ivertinneqarnerisa kingorna, periarfissat nutaat ammarsimasut, taanna oqarpoq.

- Allaanngilaq tassanngaanniit suna tamarmi oqinnerulersoq. Nutaamik akunnittarfiliornissaq pillugu pilersaarut aningaasaliisartunut nunani allaminngaanneersut saqqummiutissagiga, kommunimiit innersuussutigineqarpoq. Pilersaarullu tigulluarneqarpoq.

- Nunaminertap sanaartorfissatut kissaatigisama pissarsiarinissaa siullermik ajornakusoorsimavoq. Kisianni akunnittarfiliornissaq pillugu pilersaarutip naammassinissaa siunertaralugu suliaqartussanik katersivunga.

- Tamatuma kingunerisaanik nunaminertaq akunnittarfiliornissamut kissaatigineqartoq, kommunalbestyrelsip 22. februar akuersissutigaa. Sanaartornissamullu akuersissutit ukiup ataatsip ingerlanerani pissarsiarineqarsimanissaat tassani piumasaqaataavoq, Heidi Mortensen Møller oqarpoq.

Nunaminertap pineqartup siunertamut atorneqarnissaa pillugu tamanut ammasumik tusarniaaneq maannakkut ingerlavoq.

Alloriarneq annertooq

Qaqortumi mittarfiup aqqutaani akunnittarfik nutaaq sanaartorneqartussatut pilersaarutigineqartoq 60-inik initaqarpoq, inunnut 140-t missaannik inoqarsinnaasumik neriniartarfeqarluni, ataatsimiittarfeqarlunilu.

- Pilersaarummik millionilikkaanik marlunnik kisitsisitalimmik aallartitsinissamut, Qaqortumi mittaarfittaarnissaq tunngavissaqalersitsivoq.

- Unnuisarfimmiik akunnittarfimmut angisuumut nutaaliaasumullu alloriarneq annertoorujussuuvoq.

- Pilersaarut aporfeqanngippat sanaartorneq septemberimi oktoberimiluunniit aallartissinnaasoq neriuutigaara. Akunnittarfiup 2028-mi aasakkut ammarnissaa siunertaavoq, Heidi Mortensen Møller oqarpoq.

Qaqortumi mittarfissaq Kujataani inuussutissarsiortut annerusumik minnerusumilluunniit siunissamut aningaasaliinissaannut ammaassisuusoq, namminersortoq angisuumik takorluugaqartoq isumaqarpoq.

Namminersortut amerliartortut

Kommune Kujallermi kommunalbestyrelsimi Aningaasaqarnermut Inuussutissarsiornermullu Ataatsimiititaliami ilaasortap, Simon Simonsenip, Demokraatit, oqarnera naapertorlugu, Qaqortumi mittarfittaarnissaq inuussutissarsiornerup siornatigumut naleqqiullugu annertunerujussuanngoreerneranik kinguneqarpoq.

- Namminersorlutik inuussutissarsiuteqartut, annermillu takornarialerisut, amerliartorput, tamannalu soorunami qujamasuutigaarput.

- Kommuneplani nutaaq avataaneersunik ikiorteqarluni apriilimi suliarineqarluni aallartissaaq. Taanna tusarniutigineqareerpat neriuutigaara ukiamut kommunalbestyrelsimit akuersissutigineqarumaartoq.

- Tassunga atatillugu ilaatigut mittarfissap nutaap aqqutaani nunaminertat sanaartorfigineqarsinnaasut amerlanerusut periarfissaalissapput. Taamaattumik siunissaq isumalluarfigaarput, taanna oqarpoq.

Qaqortumi akunnittarfiliorniarlutik qinnuteqaatit suliarineqartut maannakkut marluupput. Akunnittarfiliorniarlutilli pilersaarutillit arlallit suli qinnuteqanngitsut ilisimagitsik, Simon Simonsen oqarpoq.