Nerisassanik eqqaaneq milliuunilikkaanik Brugsenimut siorna naleqarpoq

Kalaallit Nunaanni Brugseni, Nuummi, Ilulissani, Sisimiuni, Qaqortumi, Maniitsumi, Narsami, Nanortalimmi Paamiunilu nerisassaarniarfittalinnik katillugit 16-nik pisiniarfeqarpoq.

Suliffeqarfiup nerisassat tuniniakkani tamaasa tunineq ajorpai. Nerisassanimmi ilaatigut eqqaaginnartariaqartarlutik, piujuartitsineq pillugu 2025-mut nalunaarusiaminni allapput. Brugsenip nerisassat 11,6 millionit koruuninik nalillit, siorna igippai.

- Nerisassanik eqqaaneq aningaasatigut annaasaqaataaginnarani aamma avatangiisinut ajoqutaangaatsiarpoq, suliffeqarfik allappoq.

Taama 2025-mi angusaqarneq ukiup siulianut, tassa 2024-mut, sanilliullugu pitsaannginneruvoq. Suliffeqarfiummi nerisassat igitai 2024-imi 2 millionit koruuninik nalikinnerupput, tassa 9 millionit koruunit missarigamigit.

- Suliffeqarfiup iluani inniminneeriaatsinik malittarinnittoqarluartannginneranik kaaviiaartitallu qaffariarujussuarneratigut taamalu nioqqutissanik tunisaqartoqarneruneratigut pissusissamisoortumik siuariartoqarneranik pissuteqartoq, Brugseni nerisassat igitamik oqimaannerulernerat pillugu taama nassuiaateqarpoq.

AAMMA ATUARUK:

Pilersuisup nerisassat 11,2 millionit koruuninik nalillit igiinnarai

Nerisassat siorna igitat qanoq oqimaatsiginerat oqimaalutarneqarsinnaasimanngilaq. 

- Pisiniarfiutitsinni nerisassanik eqqakkat oqimaassusiannik uuttuinissamut suliffeqarfitta iluani suli suleriuseqanngilaq, Brugseni allappoq.

Suliniuteqartussaq uninngasoq

Suliffeqarfiup 31.600-it missaannik ilaasortaqartup, nerisassanik eqqaaginnartarneq qanoq pitsanngorsassanerlugu nalornisigigallaraa, nalunaarusiami nassuerutaavoq.

- Nerisassanik eqqaannginnerunissaq pillugu suleqatigiissitat eqqaariikkatta sulinerat unitsikkallarparput suliffeqarfimmi piujuartitsinermut periusissiap nutartikkap atuutilernissaa utaqqigatsigu. Naatsorsuutigaarput periusissiaq nutaaq suliaqarfimmi matumani siunissami suliniutissanut tunngavissiilluarnerussasoq.

Taamaakkaluartoq maannakkumut suliniutaasimasut ilaatigut makkua eqqaaneqarput: Nioqqutissanut qaangiuttuulersunut immikkut nillataartitsiviliinerit aamma uumasunut nerisassatut tunniussinerit.

Sermitsiap Pilersuisumi nerisassanik igitsiinnartarneq marlunngornermi aamma allaaseraa. Suliffeqarfiup Namminersorlutik Oqartussanit pigineqartup, KNI-p nerisassaarniarfiata, nerisassat 11,2 millionit koruuninik nalillit, piffissami naatsorsuusiorfimmini kingullermi aamma igiinnarpai.