Ilisimatusartup qilalukkanik qernertanik inassuteqaat isornartorsiorneqareersorlu illersorpaa
Tunumi qilalugartassiisoqartarunnaarnissaanik inassuteqaat ilisimatuussutsikkut tunngavissaqarluartuullunilu nunani tamalaani akuerineqartuuvoq, Pinngortitaleriffimmi immikkoortortaqarfimmi pisortaq ilisimatusartorlu oqarpoq.
NAMMCO-p Tunumi qilalukkat qernertat illersorniarlugit kinguaariillu tulliuttut iluaqutserniarlugit piniagaannginnissaat innersuutigaa.
Assi: Ardea Picture Library/Ritzau Scanpix
NAMMCO-p Tunumi qilalukkanik pisaqannginnissamut innersuussutaa naammattumik uppernarsarneqarlunilu ersarissumik tunngaveqanngitsoq Siumut isumaqarluni Naalakkersuisunut allakkatigut ammasuni mianersoqqussuteqarpoq.
Pinngortitaleriffimmi immikkoortortaqarfimmi pisortap ilisimatusartullu Fernando Ugartep tamanna naqqiissuteqarfigaa:
- Siunnersuutip tunngavia sukumiisumik uppernarsaatissaqarpoq tamaniillu atuarneqarsinnaalluni, Fernando Ugarte Sermitsiamut allakkatigut paasissutissiivoq.
Nalunaarusiat tamanit atuarneqarsinnaasut
Ilisimatuussutsikkut nalunaarusiat allattukkallu NAMMCO-p, Naalakkersuisut, Inatsisartut, Pinngortitaleriffiup allarpassuillu nittartagaanniittut innersuussutigai.
Pisaqaqqusinnginneq uumasoqassutsip 2008-mi, 2016-imi, 2017-imi aamma 2022-mi kisitsisoqarnerani ineriartornermiit ilaatigut tunngaveqartoq taakkunani atuarneqarsinnaapput. Paasissutissallu taakku Siumup ujartugarai.
Tasiilap eqqaani nunaqarfinni arlalinni Ittoqqortoormiinilu qilalugarniartartut 2022-mi kisitsisoqarnissaanik pilersaarusiornermi peqataalluarsimasut Fernando Ugartep aamma oqaatigaa.
Piniartut kisitsinermi aamma nakkutilliisuupput, kisitsisoqareerneratalu kingorna inernerit misissorneqarlutillu oqallisigineqarnerannut peqataallutik.
Inernerit ilisimatuussutsikkut atuagassiani saqqummersinneqartut
Siumut NAMMCO-p naliliinera qulimiguulimmik kisitsisarnernik tunngaveqartoq aamma isumaqarpoq.
- Qilalukkat qernertat — arferit allat aarrillu assigalugit — timmisartunit Twin Otterinit, qulimiguulimmiunngitsoq, kisinneqartarput, Fernando Ugarte oqarpoq.
Siumut "Kalaallit Nunaat periutsinik misilittagaqarfiulluartunik nunanilu tamalaani akuerisaasunik atuilertariaqartoq" mianersoqqusinermini aamma allappoq.
Fernando Ugartep Tunumi qilalukkanik qernertanik kisitsisarnerit inerneri nunani tamalaani ilisimatuussutsikkut atuagassiani ataqqineqartuni saqqummersinneqartarsimasut, taakkulu ilisimasallit allat naliliiffigisaraat, erseqqissarpaa.
- Tamanna ilisimatuussutsikkut tunngavissaalluarpoq nunanilu tamalaani akuerineqartuulluni, Fernando Ugarte oqarpoq.
