Kapisilinnik tunisassiortoq Polar Salmon Hjerting Laks A/S Esbjergimiittoq Listeriamik tuniluuttoqarnera pissutigalugu suli ajornartorsiorpoq.
Ingerlatseqatigiiffik Polar Seafood Denmarkimut, Polar Seafood Greenlandimit ilaannakuusumik pigineqartumut, ilaagami Kalaallit Nunaannut attuumassuteqarpoq.
Kapisilinnik tunisassiortoq Polar Salmon Hjerting Laks A/S Esbjergimiittoq Listeriamik tuniluuttoqarnera pissutigalugu suli ajornartorsiorpoq.
Ingerlatseqatigiiffik Polar Seafood Denmarkimut, Polar Seafood Greenlandimit ilaannakuusumik pigineqartumut, ilaagami Kalaallit Nunaannut attuumassuteqarpoq.
Syd- og Sønderjyllandimi politiit inuit marluk suliffeqarfillu Polar Salmon suliffimmi listeriamik nappaateqarneranik misissuinermut atatillugu unnerluutigigaat Danmarkimi tusagassiuutit nioqqutissanik tunisassiornermik suliaqartut Food Supply pingasunngornermi februaarip 11-ani nalunaarput.
Taamaalilluni Danmarkimi kapisilinnik qaleralinnillu pujuukkanik tunisassiortut annersaat suli ilungersunartorsiorpoq.
Sermitsiap Polar Salmonip siulittaasua, Henrik Leth, Polar Seafood Denmark A/S-imi, Polar Salmonimik tamakkiisumik piginnittumi, pisortaasoq, suliamut tunngatillugu oqaaseqartikkumavaa.
Politiinut nalunaarutigineqartut qanoq isumaqarfigaagit?
- Akisussaaffimmik inissiiniarnermi siuariartoqarnera ajunngitsuuvoq.
- Polar Salmon Hjerting Laksimut pasilliummut atatillugu 2023-miit 2024-mut pissutsit isornartorsiornartut, Inuussutissalerinermut Aqutsisoqarfiup januaarimi 2025-mi maluginiagaasa paasiniarnissaannut suliffeqarfiup politiit soorunami tamakkiisumik suleqatigai, Henrik Leth Sermitsiamut mailikkut allappoq.
Pisortaasimasoq unnerluutigineqartoq
Politiit listeria pillugu suliaanni unnerluutigineqartut marluk aappaa tassaavoq Polar Salmonimi pisortaasimasoq piginneqataasorlu, Christoph Kjærgaard. Taassuma tamanna Jydske Vestkystenimut uppernarsarpaa.
Polar Salmon Hjerting Laksimi siulersuisunut ilaasortat, pisortaasut aqutsisullu arlaannaataluunniit politiinit unnerluutigineqarsimannginnera uppernarsarsinnaaviuk?
- Polar Salmon Hjerting Laksimi siulersuisunut, pisortat imaluunniit aqutsisut arlaannaalluunniit politiinit unnerluutigineqanngilaq, Henrik Leth oqarpoq.
Suliaq qanoq pimoorutsigaajuk?
- Suliaq ilungersunartorujussuuvoq. Taamaammat Polar Salmon Hjerting Laks suliap aallartinneraniilli immikkut ilisimasalinnik siuttuusunik isumasioqatiginnittarpoq, taakkualu tamarmik suliffeqarfik kivinniarlugu ilungersorput.
- Suliffeqarfiup atortui, periaasii sulisullu piginnaanngorsarnerannut millionilippassuit aamma aningaasaliissutigineqarput, Henrik Leth nangilluni Sermitsiamut oqarpoq.
Inuit sisamat toqusut
Food Supply naapertorlugu listeria Polar Salmonip tunisassiorfianiit aallaaveqartoq ukiuni arlalinni minnerpaamik 27-nik napparsimalersitsisimallunilu sisamanik toqussutaasimasinnaavoq. Tamanna Statens Serum Institutip Jydske Vestkystenimut 2025 aallartilaartoq uppernarsarpaa.
Taamanikkut Polar Salmonip siulersuisuini siulittaasup Henrik Lethip tamanna Jydske Vestkystenimut ajuusaarutiginerarpaa.
Taanna tunisassiat ataatsimoortut ataatsit utertinneqassasut nerisassanut nakkutilliisoqarfik nalunaarfigereersimagitsik, allalli pisisartut ilaata ingerlateqqeqqusaajunnaarsimammagit puigorsimallugit oqaluttuarpoq.
Syd- og Sønderjyllands Politiip suliaq misissoreeramikku unnerluussisussaatitaasunut ingerlateqqissavaat.
Unnerluussisussaatitaasut inuit marluk taakku suliffeqarfillu unnerluutigineqartariaqarnersut inatsisit tunngavigalugit nalilersussavaat. Unnerluussutigineqarpata suliaq eqqartuussivimmut ingerlateqqinneqassaaq.
Misissuineq qaqugu naammassineqarumaarnersoq politiit oqaatigisinnaanngilaat.
Listeria nerisassani bakteriaavoq nillataartitsivimmi nilleraluarpalluunniit alliartorsinnaasoq. Bakteria timikkut illersuutissakitsunut ulorianarsinnaallunilu eqqorneqartut 25 procentit missaannit toqussutaasinnaavoq.
Aningaasartuutaangaatsiartoq
Suliffik tatineqalersinnaammat politiinut nalunaarutiginninnerit suliffeqarfimmut sunniuteqangaarsinnaapput.
Sermitsiap Polar Salmonip siulersuisuini siulittaasoq politiit unnerluutiginninnerisa kingorna apeqqutinik arlalinnik aperaa:
Listeri pillugu suliaq sivisusimasoq Polar Salmon Hjerting Laksimut suliffeqarfimmullu piginnittuusumut Polar Seafood Denmarkimut aningaasatigut qanoq kinguneqarpa?
COOP-ip aamma Rema1000-p Polar Salmon suleqatigiunnaaraat siorna apriilimi allaaseraarput. Tamanna Polar Salmonimut aammali Polar Seafood Denmarkimut qanoq kinguneqarpa? Polar Salmonip suliaq aallartimmalli pisisartut qassit annaavai?
- Politiinut nalunaarut suliallu ilungersunarnera oqaaseqarfigiumavarput, suliffeqarfiulli sullitaanut aningaasaqarneranullu tunngasut oqaaseqarfigerusunngilagut.
- Tamatumunnga atatillugu 2025-mut ukiumoortumik naatsorsuutit suliarineqartut ilisimatitsissutigisinnaavara, tassanilu aningaasartuuterpassuit takuneqarsinnaassapput, Henrik Leth akivoq.
Kusanaatsuliaq rullepølsinut tunngasoq
Suliffeqarfik inuussutissanik tunisassiortoq Jørn A. Rullepølser A/S Hedehusenemi Roskildep eqqaaniittoq tusagassiutini "kusanaatsuliamik rullepølsinut tunngasumik" taaneqartoq 2024-mi matuneqarpoq, tunisassiaalu tamarmik niuerfinnit tamanit peerneqarput.
Inuussutissanut aqutsisoqarfiup rullepølsini savaaqqap neqaanik sanaani tunisaassiorfimmeersuni misissuinermini listeriamik nassaarnera pissutigalugu taamaaliortoqarsimavoq. Bakteriap inunnut 20-nut tuniluussimanissaa ilimanaateqarluarpoq, taakkunanngalu aqqaneq-marluk toqupput.
Sermitsiap kusanaatsuliaq rullepølsinut tunngasoq pillugu Henrik Leth ima aperaa:
Polar Salmon suliaq pissutigalugu matusinnaavisiuk, tassa Polar Seafood Denmarkip immikkoortortaqarfia matuneqassava?
Siulersuisulli siulittaasuata apeqqut taanna Sermitsiamut allakkamini akinngilaa.
Kapisilinnik tunisassiorfik Polar Salmon Hjerting Laks A/S eqqaaneqareersutut Polar Seafood Denmarkimit tamakkiisumik pigineqarpoq. Suliffeqarfik taanna Polar Seafood Greenland A/S-imit aamma qallunaanit S-13 Holding Aps-imit 50 procentimik pigineqarpoq. S-113 suliffeqarfimmit Islnadimiittumit Brim hf-imit pigineqarpoq.
Polar Seafood Greenland pisortaanernit Miki Brønsimit Bent Sallingimillu kiisalu tusagassiornermut akisussaasumit Laila Sallingimit pigineqarpoq.
Henrik Leth, ukiorpassuarni Polar Seafood Greenlandimi siulittaasoq, ukiuni pingasungajanni kingullerni Polar Seafood Denmarkimi pisortaavoq. Polar Salmon Hjerting Laksimi 2024-mi ukiakkut siulittaasunngorpoq.
