Tusarniaaneq: Nipisanniarnissamut pisassiissutit ikilisinneqartariaqarput
Nipisanniarnermi pisassiissutit 15 procentimik ikilineqartariaqartut, Naalakkersuisut tusarniaassutigineqartutut siunnersuutaanni atuarneqarsinnaavoq.
Nipisanniarnissamut pisassiissutit 2025-mi 1.475,3 tonsiupput, 2026-milu 1.238 tonsinut ikilineqassallutik, tassa siunnersuisoqatigiinnit siunnersuutigineqartunit 217 tonsinik amerlanerusunik.
Apeqqutaavorli Kitaani pisassiissutit ikilineqarnerat aalisarnermut sunniuteqassanersoq, 2025-mimi nipisannik arnarlunnik taamaallaat 1.098 tonsinik pisaqartoqarsimavoq, naak pisassiissutigineqartut amerlanerugaluartut.
Tunumi killilersugaanngitsumik nipisanniarneq
Nipisanniarnermi pisassiissutit ukiumut ataasiarluni aalajangersarneqartarput, ilisimatitsissutigineqarlunilu Tunumi nipisanniarneq killilersuiffigineqassanngitsoq.
- Tunumi nipisanniartarneq ineriartortinniarlugu taamaaliortoqartoq, ilisimatitsissutigineqarpoq.
Tusarniaanermi sinerissami qanoq pisassiisoqartigisimaneranut tunngasut uani takuneqarsinnaapput.
Tusarniaaneq marsip aappaannut killeqartinneqarpoq, erseqqissarneqarporlu „akissuteqartoqanngippat siunnersuutigineqartut akuerineqartutut isigineqassasut“.