Elektroniskimik nipilersorneq takorluuerpalaarnerlu. Ivaanap aamma
Andachanip saqqummersitaat nutaaq, taaguutilik ”Andachan x Ivaana” taama
misigisaqarfigaara.
Nipilersugaanni erinarsornerit nipilersuutillu elektroniskiusut
akuleriissinneqarput, tusarnaartumillu nipilersoriaatsit assigiinngilluinnartut
marluk akornanni misigissutsikkut angalaartitsillutik.
Elektroniskimik nipilersorneq takorluuerpalaarnerlu. Ivaanap aamma
Andachanip saqqummersitaat nutaaq, taaguutilik ”Andachan x Ivaana” taama
misigisaqarfigaara.
Nipilersugaanni erinarsornerit nipilersuutillu elektroniskiusut
akuleriissinneqarput, tusarnaartumillu nipilersoriaatsit assigiinngilluinnartut
marluk akornanni misigissutsikkut angalaartitsillutik.
Tusarnaartoq Kalaallisut Tuluttullu taallat atorlugit
nipilersornikkut angalanissamut qaaqquneqarpoq, tamannalu Kalaallit
nipilersortartuisa nutaaliorlutillu nukittuumik suleqatigiinnerannik
ersersitsivoq.
Andachanip Ivaanallu suleqatigiillutik suliniutaanni nutaami, nipit
asseqanngitsut marluk, ulluinnarpalaartut nipilersukkallu elekroniskiusut
ataatsimoortinneqarput, Arctic Sounds Management saqqummersitaq pillugu taama
allappoq.
Andachanip Ivaanallu saqqummersitaat nipilersukkanik qulinik
imaqarpoq, taakkunannga arfineq-pingasut nutaarluinnarmik erinarsuusiaallutik,
marlullu tassaallutik Ivaanap siusinnerusukkut saqqummerseriigai nutartikkat,
“Nipaassuseq” aamma “Oqarfigilaarusukkumma”.
Andachan aamma Ivaana nipilersortartut nutaajunngitsut, tamarmik
immikkut saqqummersitaqareerput, nipilersoriaatsimikkullu kinaassutsiminnik
Nunatsinni, Issittumi Europamilu nukittuumik pilersitsisimallutik.
Nipilersoriaatsimikkut kinaassutsitik assigiinngilluinnartut
atorlugit nipilersoqatigiinnermik pilersitsipput, Ivaanap pop-imik
nipilersornera takorluuerpalaartoq Andachan-illu nipilersoriaasiata
erseqqarissup rytmillu atorlugit elektroniskimik ilungersorpaluttoq
akulerutsinneqarlutik — nalissaqanngitsumik.
Nipilersukkat tiguartinnartut
Suleqatigiinnerat nipilersortartunut soorlu Sverigemeersumut
Robyn-imut, popimik elektroniskimillu nipilersoriaatsinik
akuleriissitsinermigut ilisimaneqartumut, aamma qallunaamut MØ-mut,
immikkuullarissumik nipilersoriaatsimigut elektroniskiusumik popimik immikkut
ilisarnaateqartumut, eqqaanartuuvoq.
Erinarsukkat ilaat ”Ningorit” allaanerulluinnarpoq,
nutaarluinnarnillu najoqqutassiilluni. Piniartumut tuttumik pannermik
angisuunik nassulimmik takunnittutut imaluunniit meeqqatut mikisutut Disneylandimik siullerpaamik takunnittutut
misigisimavunga. Erinarsugaq taanna eqqumiitsuliortoq tamatigoortoq HH Suersaq
peqatigalugu erinarsuusiarineqarpoq, taassumalu alutornarluinnartumik
torlussornerata tupinnartup erinarsuutillu erinaanut nuannaangaarnermik
ersersitsisoq tusarnaartumut alutornarluinnarpoq. Qujanaq.
Andachanip aamma Ivaanap nipilersugaat imminut tatigerpaluttut,
oqariartuutilinnik taallartaqartut, taallartaallu misigissutsinik nuannersunik
oqariartuuteqarput, nuannaalersitsisunik, tulluusimaalersitsisunik qitinnissamullu
pilerilersitsisunik.
Naammagisimaarinninneq qisuariaatillu pitsaasut
Nipilersortartut taakku marluullutik saqqummersitartik ukiumi
ataasingajammi suliarisimavaat naammassisartillu naammagisimaarpaat.
- Periaatsit assigiinngitsut misilerarpavut,
isumassarsiorsinnaanitsinnik unammilleqatigiittarluta, inuttut ataasiakkaatut
nuannarisavut ataatsimoorullugillu nuannarisavut nassaaralugit, Ivaana
oqaluttuarpoq.
- Saqqummersitatta saqqumminnginneranni, erinarsukkavut
tusarnaartunut Nuummi, Sisimiuni aamma Reykjavikimi
tusarnaartitsissutiginissaannut periarfissaqaratta, tusarnaartunillu
ilassilluarneqaqaluta. Taamaattumik saqqummersinnissaa qilanaarisimaqaarput, Andachan
oqarpoq.
Ilinnut nipilersukkanik sakkortuunik technonik, sallaatsumik popimik
akusanik misileraarusuttumut, saqqummersitaq tulluarluinnassaaq.
Saqqummersitaq ”Andachan x Ivaana” nittartakkatigut
tusarnaartarfiit, soorlu Spotify aamma Apple Music aqqutigalugit, novembarip
arfineq-aappaanni 2025-mi saqqummersinneqarpoq.
