Periusissiaq nutaaq: KNR-ip kalaallisut aallakaatitai amerlanerulissasut
Kalaallisut oqaatsit aallakaatitassiallu siunissami pingaarnerutinneqarnerulissasut, aamma Naalakkersuisunut isumaqatigiissutt allanngortinneqassasoq, KNR-ip siulersuisuini siulittaasoq oqarpoq.
KNR-i ukiuni kingullerni ajornartorsiorpoq, suliffeqarfimmi sulisut taarseraannerujussuannik ilaatigut pisoqarluni.
Assi: Oscar Scott Carl
KNR-ip periusissiaa nutaaq maanna piviusunngortinniarneqalerpoq, tusagassiorfiullu inuiaqatigiinni kalaallini qitiusumik akisussaaffeqarnera aallaaviussaaq. Taamatut KNR tusagassiuutitigut nalunaarummi ilisimatitsivoq.
– KNR-ip ilisarnaataasa pingaarnersaraat kalaallisut tusagassiortarnerput. Nunarsuatsinni naggueqatigiit Inuit oqaasii atorlugit ataavartumik tusagassiisartut annersaraatigut. Taamaattumillu oqaatsivut atorlugit kiffartuussinerput inerisartuarlugulu pitsanngorsagassatta annersaraat, KNR-ip siulersuisuini siulittaasoq Nukaraq Eugenius oqarpoq.
Periusissiaq nutaaq 2026-miit 2030-mut atuutissaaq. Tallimanik tunngaveqarpoq: tutsuiginassuseq, ataqqinassuseq, pitsaassuseq, nutaaliorneq tamakkiisumillu isiginnilluni paasinninneq.
KNR-ip kalaallisut aallakaatitassiat amerlanerulernissaat siunissami anguniagaasa ilagaat.
- KNR-i aatsaat taamak pingaaruteqartigaluni inissisimavoq. Nunarput avatitsinnit tatisimaneqartillugu periusissiaq aqqutigalugu atuisutsinnut aammalu sulisutsinnut akisussaaffeqarnerput ersarissarpavut. Oqaluttuat Nunatsinneersut nammineerluta oqaluttuarissavagut, taamaaliornitsinnilu piffissami nunanit tamalaanit isiginiarneqarnitsinni avaqqukkuminaalluta tutsuiginassuseqassaagut, pisortaq Hans Peter Poulsen oqarpoq.
IT-mi atortut, nittartakkat assigisaallu nutarsarnissaat aamma sulissutigineqassaaq, aqutsinerullu suleriaatsillu pitsaanerulersinneri aamma anguniarneqassallutik.
KNR-ip kiffartuussinissamut Naalakkersuisunut isumaqatigiissutaata allannngortinneqarnissaa aamma kissaatigineqarpoq. Isumaqatigiissut tassaavoq KNR-ip Naalakkersuisuillu KNR-imi sulinermi sinaakkutissatut isumaqatigiissutaat.
